a k s i y a

Fərhad Əliyev məhkəmədən qardaşı Rafiq Əliyevin həbsinin ev dustaqlığı ilə əvəz edilməsini xahiş edib

2007-07-18T14:13:00.000+05:00

Tofiq Paşayev məhkəmə istintaqının araşdırma mərhələsində olduğunu əsas gətirərək vəsatəti rədd edib

Bu gün Ağır Cinayətlərə Dair İşlər Üzrə Məhkəmədə sabiq iqtisadi inkişaf naziri Fərhad Əliyev, onun qardaşı - «Azpetrol» Şirkətlər Qrupunun sabiq prezidenti Rafiq Əliyev və təqsirləndirilən digər 17 nəfərin cinayət işi üzrə keçirilən prosesdə hakim Tofiq Paşayev «Azpetrol» Şirkətlər Qrupunun sabiq prezidenti Rafiq Əliyevin vəkilləri Əlimardan Sadıxov və Muxtar Mustafayevin müdafiə etdikləri şəxsin həbsdən azad edilməsiylə bağlı qaldırdıqları vəsatəti müzakirəyə çıxarıb.Müzakirələr zamanı əksəriyyət vəsatətin təmin edilməsini tələb edib. Sabiq iqtisadi inkişaf nazir F.Əliyev isə çıxışında bildirib ki, qardaşı R.Əliyev və həbsdə olan digər şəxslər ona görə məsuliyyətə cəlb olunublar: «Buna görə də, R.Əliyevin haqqında həbs qəti-imkan tədbirinin mümkünsə dəyişdirilməsini və ya ev dustaqlığı ilə əvəz edilməsini xahiş edirəm. Orada əyləşən hər kəs üçün veriləcək cəzanı çəkməyə hazıram». Dövlət ittihamçısı Nazir Bayramov qaldırılmış vəsatətin təmin edilməməsi yönündə çıxış edib. O, bildirib ki, qərarın dəyişdirilməsiylə bağlı tələb düzgün deyil. Bir saatlıq müşavirədən sonra hakim Tofiq Paşayev məhkəmənin qərarını açıqlayıb. Məhkəmə hesab edib ki, hazırkı mərhələdə bu vəsatət müzakirə edilə bilməz: «Məhkəmə istintaqı araşdırma mərhələsində olduğundan vəsatət rədd edilsin». Daha sonra hakim T.Paşayev Fərhad Əliyevin vəkili İsaxan Aşurovun müdafiə etdiyi şəxsin müalicə almasıyla bağlı vəsatətə münasibət bildrib: «Bununla bağlı təqsirləndirilənin saxlandığı təcridxananın rəhbərliyinə müraciət olunmalıdır. Məhkəmənin buna heç bir etirazı yoxdur». Daha sonra şahd ifadələrinin dinlənilməsi elan olunub. Lakin sabiq iqtisadi inkişaf nazirinini prosesdə cəmi bir vəkillə təmsil olunması prosesin təxirə salınmasına səbəb olub. F.Əliyev bildirib ki, vəkili Elton Quliyevin prosesdə iştirak etməsi vacibdir. Proseses saat 14-00-dək təxirə salınıb.

"Jurnalistlərə qarşı zorakılıq halları ciddi şəkildə araşdırılmalıdır"

2007-05-09T01:26:00.000+05:00

ABŞ Azərbaycanda beş jurnalistin həbsdə olması ilə bağlı beynəlxalq ictimaiyyətin keçirdiyi narahatlığı bölüşür. Biz inanırıq ki, jurnalistlərə qarşı zorakılıq halları, onların döyülməsi, hədə-qorxu gəlinməsi, təqibi və öldürülməsi faktları ciddi şəkildə araşdırılmalıdır».
Mayın 8-də ABŞ-ın Azərbaycandakı səfiri Enn Ders jurnalistlərlə söhbətində belə deyib. O, bildirib ki, ölkəsi Azərbaycan hökumətinin böhtanla bağlı maddəni Cinayət Məcəlləsindən (CM) çıxarması yönündə çağırışlarını davam etdirəcək.
Xanım Ders ümid edir ki, hökumət, qeyri-hökumət təşkilatları və cəmiyyət bir yerdə ölkədə azad sözün təmin olunması, mətbuatın inkişafı, bu sahədə peşəkarlığın artırılması yönündə səylərini artıracaq: «Azərbaycan bölgədə lider dövlət olmaq üçün böyük potensiala malikdir. Demokratik islahatların aparılması yönündə atılan addımlar Azərbaycanın bu böyük potensialının reallaşmasına yardım edəcək».
Azərbaycan rəsmilərisə bəyan edirlər ki, ölkədə söz azadlığı təmin olunur, diffamasiya haqda qanunun qəbulu, böhtanla bağlı maddənin CM-dən çıxarılması isə hələlik tezdir.
Ötən həftə «Freedom House» təşkilatı azad sözün durumuna görə, Azərbaycanı qeyri-azad ölkələr sırasına salmış, Beynəlxalq Jurnalistləri Müdafiə Komitəsi isə jurnalistlərin ən çox təqib olunduğu on ölkə sırasına daxil etmişdi.

Dünya iki yazarın müdafiəsinə qalxdı

2007-05-05T22:42:00.000+05:00

Rafiq Tağı və Samir Sədaqətoğlunun həbsi beynəlxalq qurumları hiddətləndirib

05.05.2007. Mayın 4-də Səbayel Rayon Məhkəməsi “Sənət qəzeti”nin baş redaktoru Samir Sədaqətoğlunu 4, yazar Rafiq Tağını 3 illiyə azadlıqdan məhrum edib. Hər iki jurnalist irqi, milli, dini ədavəti qızışdırmaqda ittiham edilirlər. Artıq məhkəmənin ədalətsiz və absurd qərarı beynəlxalq təşkilatlar tərəfindən də hiddətlə qarşılanıb. Nüfuzlu “Sərhədsiz Reportyorlar” Təşkilatı dünən yaydığı bəyanatda məhkəmənin hökmünü qəti şəkildə pisləyib: “Bu hökmlər Azərbaycanda azad sözə təhlükənin səviyyəsini göstərir. Biz Azərbaycan hökumətini mərhəmət göstərməyə, bu iki jurnalisti azad etməyə çağırırıq”. Daha bir etiraz bəyanatı qərargahı Nyu-Yorkda yerləşən Jurnalistləri Müdafiə Komitəsindən (JMK) gəlib. Təşkilat bəyanatında iki yazarın haqqındakı məhkəmə hökmünü pisləyib. JMK-nin icraçı direktoru Coel Saymon deyib: “Rafiq Tağı və Samir Sədaqətoğlunun fikrini ifadə etmək hüququ var. Ola bilsin ki, bəzi oxucular bu məqalənin onları təhqir etdiyini düşünürlər, ancaq jurnalisti yazısına görə həbs etmək olmaz. Biz Azərbaycan hökumətini hər iki jurnalisti azad etməyə çağırırıq”.

Məhkəmənin hökmü ilə Rafiq Tağıya 3 il, Samir Sədaqətoğluna isə 4 il iş verilib

2007-05-04T21:09:00.000+05:00

04.05.2007. Bu gün Səbayel Rayon Məhkəməsində hakim Yusif Kərimovun sədrliyi ilə “Sənət” qəzetinin baş redaktoru Samir Sədaqətoğlunun və yazıçı-publisist Rafiq Tağının işi üzrə məhkəmə prosesi davam etdirilib. APA-nın məlumatına görə, prosesin əvvəlində vəkil İsaxan Aşurov vəsatət qaldıraraq, ötən prosesdə insident yaradan bir qrup dindarın məhkəmə zalından çıxarılmasını tələb edib. Lakin vəsatət təmin olunmayıb. Daha sonra sərbəst ifadə vermək üçün söz istəyən R. Tağı dövlət ittihamçısı Fərhad Rəhimovu Konstitusiyanı pozmaqda günahlandırıb və özünün günahkar olmadığını bildirib. Hakim məhkəmə istintaqının bitdiyini elan etdikdən sonra dövlət ittihamçısı ittihamnaməni oxuyub. O, məhkəmə zamanı hər iki şəxsin cinayətinin sübut olunduğunu bildirərək, R.Tağının CM-nin 283.1 maddəsi ilə 4 il, S.Sədaqətoğlunun isə CM-nin 283.2.2 maddəsi ilə 5 il müddətinə azadlıqdan məhrum edilməsini tələb edib. Təqsirləndirilən şəxslər son sözlərində özlərini günahkar saymadıqlarını bildiriblər. Müşavirədən sonra hakim Y.Kərimov məhkəmənin qərarını elan edib. Məhkəmənin hökmü ilə R.Tağı 3 il, S.Sədaqətoğlu isə 4 il müddətinə azadlıqdan məhrum ediliblər.Prosesdə iştirak edən ABŞ-ın ölkəmizdəki səfirliyinin siyasi məsələlər üzrə müşaviri Rebekka Nedland məhkəmənin hökmündən sonra jurnalistlərə açıqlama verib. R.Nedland bildirib ki, ABŞ səfirliyi R.Tağının öz məqaləsində ifadə etdiyi fikirlərlə şərik deyil: “Lakin biz onun və hər bir Azərbaycan vətəndaşının öz fikrini azad şəraitdə ifadə etmək hüququnu dəstəkləyirik. Bu qərar Azərbaycanda söz və mətbuat azadlığına qoyulan və bizi narahat edən lüzumsuz məhdudiyyətlərin növbəti nümunəsidir”.

Əli İnsanov Elmlər Akademiyasının həqiqi üzvlüyündən çıxarıldı

2007-05-04T21:08:00.000+05:00

04.05.2008. Keçmiş səhiyyə naziri, Ağır Cinayətlərə Dair İşlər üzrə Məhkəmənin hökmü ilə 11 il müddətinə azadlıqdan məhrum edilmiş Əli İnsanov Azərbaycan Mili Elmlər Akademiyasının (AMEA) həqiqi üzvlüyündən azad edilib.
Ə. İnsanovun vəkili Ağaveys Şahverdi APA-ya bildirib ki, AMEA Rəyasət Heyətinin bu gün keçirilmiş iclasında məhkəmənin bununla bağlı təqdimatına baxıb və Rəyasət Heyətinin bütün üzvləri eks-nazirin həqiqi üzvlükdən azad edilməsinin lehinə səs verib. Bununla Ə. İnsanovun heç nə itirmədiyini deyən A. Şahverdi bildirib ki, eks-nazir AMEA-dan başqa, daha 4 ölkədə akademiya üzvüdür. O, Ağır Cinayətlərə Dair İşlər üzrə Məhkəmənin hökmünün hələlik qüvvəyə minmədiyini də diqqətə çatdırıb: “Hökm Apellyasiya Məhkəməsinin qərarından sonra qüvvədə sayılır. Bu işdə tələskənliyə yol verilib. Bununla yanaşı, Ağır Cinayətlərə Dair İşlər üzrə Məhkəmənin hökmündə Əli İnsanovun AMEA-nın həqiqi üzvlüyündən azad edilməsi barədə müddəa olmayıb”. O, müdafiə etdiyi şəxslə məsləhətləşəndən sonra bu məsələ ilə bağlı müvafiq addımların atılacağını da vurğulayıb.

Sabah Əli İnsanova hökm oxunacaq

2007-04-19T16:23:00.000+05:00

19.04.2007. Sabah Ağır Cinayətlərə Dair İşlər üzrə Məhkəmədə hakim Faiq Qasımovun sədrliyi ilə keçiriləcək prosesdə sabiq səhiyyə naziri Əli İnsanov və daha 10 nəfərə hökm oxunacaq.
APA-nın məlumatına görə, məhkəmə prosesində Ə. İnsanovla bərabər təqsirləndirilən şəxslər Səhiyyə Nazirliyinin əczaçılıq və tibbi texnika şöbəsinin sabiq müdiri Akif Məhərrəmov, həmin şöbənin əməkdaşları Eldar Rzayev, Hacı Əliyev, Şövqi Cəfərov, nazirliyin beynəlxalq əlaqələr şöbəsinin sabiq müdiri Aleksandr Umnyaşkin, nazirliyin büdcədənkənar tibbi xidmət şöbəsinin sabiq müdiri Vəkil Abbasov, nazirliyin digər əməkdaşları Fəxrəddin Abbasov, Pərviz Kazımov, Anar Namazov və Fuad Mahmudovun işinə baxılır. Sabiq nazirdən başqa, təqsirləndirilən digər şəxslərin hamısı zamindədir. Adıçəkilən şəxslər Cinayət Məcəlləsinin 179.3.2 (mənimsəmə və ya israfetmə), 306.2 (məhkəmənin hökmünü, qərarını, yaxud digər aktını icra etməmə), 308 (vəzifə səlahiyyətlərindən sui-istifadə), 311 (rüşvət alma), 313 (vəzifə saxtakarlığı) maddələri ilə ittiham olunurlar. Cinayət işi üzrə 10 nəfər zərərçəkmiş kimi tanınıb. Dövlət ittihamını prokurorlar Kamran Əliyev və Çingiz Şükürov müdafiə edir.
Qeyd edək ki, Ə. İnsanovun barəsində CM-in 220-ci (kütləvi iğtişaş) və 278-ci (hakimiyyəti zorla ələ keçirmə və ya onu zorla saxlama) maddələri ilə bağlı başlanmış cinayət işi ayrılaraq başqa icraatda davam etdirilir.

“Amnesty İnternational” Hadi Musəvi ilə bağlı İran dövlətinə müraciət edib

2007-04-19T16:16:00.000+05:00

19.04.2007. “Amnesty İnternational” Daxili İşlər Nazirliyinin Miqrasiya Xidməti tərəfindən aprelin 12-də Azərbaycandan İrana deportasiya edilən İran vətəndaşı, Güney Azərbaycan Milli Oyanış Hərəkatının (GAMOH) fəallarından biri Hadi Seyid Cavad Musəvi barəsində İran dövlətinə müraciət edib. Bu barədə APA-ya GAMOH-un Bakı bürosunun mətbuat xidmətinin rəhbəri Ağrı Qaradağlı məlumat verib. Müraciətdə İran dövlətinə H.Musəvinin taleyi ilə bağlı araşdırılma aparılması və ailəsinə bu haqda məlumat verilməsi istənilib. A.Qaradağlı H. Musəvinin İran xüsusi xidmət orqanlarının agenti olması haqda yayılan informasiyalara da münasibət bildirib. A. Qaradağlının sözlərinə görə, H. Musəvini 12 ildir tanıyır və onun İran dövlətinin xeyrinə məxfi əməkdaşlıq etdiyinə inanmır. O, GAMOH-un H. Musəvi barədə BMT-yə müraciət etdiyini də qeyd edib.

Müsavat prezident seçkilərini boykot etməyəcək

2007-04-19T16:13:00.000+05:00

19.04.2007. “2008-ci ildə keçirilən prezident seçkiləri ilə bağlı indidən boykot tələbini irəli sürməyin heç bir perspektivi yoxdur. Seçkilərin qanuna uyğun keçirilməsini arzulayan partiyalar indiki mərhələdə seçki qanunvericiliyində dəyişikliklərin edilməsi, demokratik şəraitin yaradılması istiqamətində fəaliyyət göstərməlidirlər”. Bu sözləri APA-ya açıqlamasında Müsavat Partiyası Mərkəzi İcra Aparatının rəhbəri Arif Hacılı bildirib. Onun sözlərinə görə, Müsavat boykot taktikasının əleyhinədir və partiya ölkədəki siyasi şəraitin dəyişməsi istiqamətində mübarizə aparacaq: “Xüsusilə də Avropa Şurası Parlament Assambleyasının sessiyasında 2008-ci ilin yanvarına kimi seçki komissiyalarının tərkibinin paritet əsaslarla təşkili və İctimai Televiziya ilə bağlı tələblər bu istiqamətdə müsbət addımların olacağını göstərir. Həmin tələblər konkret olaraq hakimiyyətin qarşısına qoyulub”. Bu tələblərə hakimiyyətin müqavimət göstərdiyini bildirən A. Hacılı hesab edir ki, ölkə daxilindəki siyasi qüvvələr də eyni tələblə çıxış etsələr, o zaman müsbət nəticəyə nail olmaq mümkündür: “Komissiyaların tərkibi paritet əsaslarla formalaşmayacağı halda isə biz hazırkı komissiyaların tərkibində təmsil olunmaq niyyətində deyilik. Bizi bu məsələdə yalnış mövqe tutmaqda ittiham edən bəzi opponentlərimiz onu da bilməlidirlər ki, seçki komissiyaları ilə bağlı məsələnin beynəlxalq təşkilatların gündəminə gəlməsinə səbəb məhz Müsavatın komissiyaların tərkibində iştirakdan imtina ilə bağlı qərarı olub”.

Hər kəsi satın aldılar

2007-04-10T13:19:00.000+05:00

Geri çəkilməyə yer qalmadı...

AKSİYAner

10.04.2007. Nə baş verir Azrəbaycanda? Hara gedirik? Hər gün daha bir az meydanımız daralır, hər gün daha bir az üstümüzə gəlirlər. Hara çəkilməli? Hara getməli? Ümumiyyətlə, geri çəkilməlimi?
Əvvəllər insanlar etiraz etmək üçün “Azadlıq” meydanlarına yığışardılar. Yasaq etdilər. Əvəzində “Qələbə”, “Motodrom” kimi yerləri təklif etdilər. Sonra oraların da yolunu bağladılar. Etirazlar tədricən partiyalar səviyyəsinə, daha sonra qəzetlər səviyyəsinə endirildi. İndi artıq qəzetləri də, pariyaları da satın aldılar. Yerdə nə qaldı?
İndi etiraz edən bir qrup gənc qalıb yalnız. Onlar da olsa-olsa virtual məkana sığınıblar. Yahoo-qruplara, forumlara, pulsuz bloglara… Hara gedirik biz?
Biz geri çəkildikcə meydan Vəhhabistlərə, Nurçulara, İranpərəstlərə qalır. Hakimiyyətdə mox qəribə bir şövqlə onların qol-qanad açmasına imkan verir. Ölkəyə içıq daşımaq istəyənlər küncə sıxışdırılır, qaranlıq, kəsafət daçıyanlara isə yol açılır.
Nə baş verir əcaba?
2008-in prezident seçkilərinə ciddi start verilib. Hətta özlərinin televiziya kanallarında illərlə bunlara qulluq etmiş şəxsləri azca “dikbaş” olduqları üçün çıxdaş edirlər. Bütün potensila etiraz ocaqları söndürülür.
“Yeni Müsavat” qəzetini satın aldılar. “Gündəliyi” də küncə sıxıblar- onu da ya alacaq, ya da bağlayacaqlar. “Alma” da uzun getməyəcək- yenidən bağlayacaqlar.
Az sonra yahoo-qruplara, forumlara girişəcəklər. Əmin olun buna. Bir daha təkrar edirəm, bütün real və potensial etiraz ocaqları söndürüləcək. Nəyin bahasına olursa-olsun, İlham Əliyevi prezident etmək istəyirlər. Edəcəklər də.
Adamı təccübləndirən başqa şeydir. Həmiçəkindən qat-qat zəif olan müxalifətdənmi çəkinirlər? İnanmıram. Hansısa üçüncü qüvvənin gözlənilmədən ortaya çıxağacağındanmı qorxurlar? İnandırıcı deyil, ortada qalan zaman məsafəsi buna yetərli deyil. Bəs nədir problem? Nədir bunların yuxularını ərşə çəkən? Bax, bunu müzakirə etməyə ehtiyac var!

Türkiyə və Azərbaycan arasında xəritə qalmaqalı baş verə bilər

2007-04-04T00:41:00.000+05:00

04.04.2007. Türkiyə Mədəniyyət və Turizm Nazirliyi tərəfindən hazırlanan və içərisində türk cümhuriyyətlərinin dövlət himnlərinin yazıldığı CD bu ölkənin Bakıdakı səfirliyinin etirazına səbəb olub. APA-nın Türkiyə mətbuatına istinadən yaydığı xəbərə görə, səfirlik diskin üzərində təsvir olunmuş xəritədə Naxçıvan Muxtar Respublikasının, işğal olunmuş Dağlıq Qarabağın, Kəlbəcər və Laçın rayonlarının Ermənistan ərazisi kimi göstərilməsinə etiraz edərək, xəritənin dəyişdirilməsini istəyib. Səfirliyin bununla bağlı fevralın 21-də Mədəniyyət və Turizm Nazirliyinə göndərdiyi məktubda deyilir: “Türk cümhuriyyətlərinin milli marşları CD-si üzərindəki xəritədə Naxçıvan Muxtar Respublikasının və Ermənistan tərəfindən işğal olunmuş Dağlıq Qarabağın, Laçın və Kəlbəcərin Azərbaycan torpaqları kimi göstərilməməsi ciddi yanlışlıqdır. Bu CD-lərin paylanması Azərbaycanın ərazi bütövlüyünün ölkəmiz tərəfindən tanınmaması mənasında qiymətləndirilə, bu durum iki qardaş ölkə arasında ciddi diplomatik narahatlıq doğura bilər”. Səfirliyin mədəniyyət və tanıtma üzrə müşaviri Fəthi Gədikli Türkiyə mətbuatına açıqlamasında diskləri Azərbaycanda paylamadıqlarını bildirib. O qeyd edib ki, xəritəni hazırlayanlar yəqin onu internetdən götürüblər və fərqinə varmadan çap ediblər: “Diqqətsizlik səbəbi ilə belə bir xətaya yol verildiyini düşünürəm”. F. Gədikli APA-ya açıqlamasında da eyni fikirləri təkrarlayıb. Xəritənin coğrafi xəritə olmadığını vurğulayan diplomat məsələ ilə bağlı lazımi addımları atdıqlarını, nazirliyin hər hansı tədbir görüb-görməməsindən isə hələlik xəbərsiz olduğunu deyib. Xəritəni hazırlayan Mədəniyyət və Turizm Nazirliyinin Gözəl Sənətlər İdarəsinin müdiri Bayram Bilgə Tokər isə xəritənin çox kiçik qrafik təsvirdən ibarət olduğunu və ərazilərin coğrafi sərhədlərinin göstərilmədiyini söyləyib: “Qrafik təsviri hazırlayan şəxs erməni deyil. Əksinə, millətçi baxışları ilə tanınan bir dostumuzdur. Lazım olsa, xəritəni dəyişdirə bilərik”. Qeyd edək ki, məlum disklər Türkiyənin türk cümhuriyyətlərindəki səfirliklərinə, həmçinin türk cümhuriyyətlərinin Ankaradakı səfirliklərinə göndərilib. Türkiyədə yaşayan azərbaycanlılar da diskin üzərindəki xəritədə yol verilən yanlışlığa etirazlarını bildiriblər.

Toni Bleyer İrana 48 saat vaxt verib

2007-04-04T00:40:00.000+05:00

04.04.2007. Böyük Britaniyanın baş naziri Toni Bleyer ingilis hərbçilərin həbsi ətrafında yaranmış böhranın həll edilməsi üçün İrana 48 saat vaxt verib.APA-nın məlumatına görə, Toni Bleyer bəyan edib ki, əgər hərbçilər 48 saat ərzində azadlığa buraxılmasa, Böyük Britaniya sərt tədbirlərə əl atacaq: “Bu böhrandan iki çıxış yolu var. Birincisi, problemi sülh yolu ilə həll etmək və hərbçiləri qısa müddətdə azad etməkdir. İkinci variant isə məsələnin həllinə sərt qərarlar çərçivəsində nail olmaqdır. İran Milli Təhlükəsizlik Ali Şurasının rəhbəri Əli Laricaninin bu durumu daha da çətinləşdirmək istəməməkləri barədə bəyanatı təqdiredicidir. Belə düşünürəm ki, danışıqlar üçün yeni perspektivlər yaranır”.

Qadınlar etiraz aksiyası keçirdilər

2007-04-04T00:37:00.000+05:00

Aprelin 3-də Azərbaycan Yolu Siyasi Hərəkatının Qadınlar Təşkilatının bir sıra üzvləri Üzeyir Hacıbəyov küçəsini, Hökumət Evinin arxasındakı avtomobil yolunu kəsiblər. Qadınlar bu il yanvarın 6-da Tarif Şurasının enerji daşıyıcılarının və bizi xidmətlərin qiymətinin artırılmasına etiraz ediblər.
Aksiya iştirakçıları “Xalqın cibinə girənlərə ar olsun!”, “Əhalinin güzəranını pisləşdirən hökumətə istefa!” və “Azərbaycan hökuməti, tələblərimizi eşit və əməl et!” şuraları səsləndirərək qiymət artımına etirazlarını bildiriblər. Aksiya insidentsiz başa çatıb.
Qadınlar avtomobil yolunu kəsməzdən əvvəl Beynəlxalq Mətbuat Mərkəzində “Tarif Şurasının 6 tarixli tarixli qərarına yenidən baxılsın” mövzusunda dəyirmi masa keçiriblər. Tədbiri giriş sözü ilə Azərbaycan Yolu Siyasi Hərəkatının Qadınlar təşkilatının sədri Zöhrə Şahsevənli açıb. O, Tarif Şurasının 6 yanvar qərarı ilə enerji daşıyıcılarının, su və digər komunal xidmətlərdən istifadəyə görə qiymətlərin artırılmasını xalqın maddi durumuna çox ciddi təsir etdiyiyni bildirib. Z.Şahsevənli onu də əlavə edib ki, Azərbaycan Yolu Siyasi Hərəkatı Tarif Şurasının qərarına yenidən baxılması ilə bağlı mayın 12-də paytaxtda etiraz mitinqi keçirəcək. O, bütün qadınları bu mitinqdə yaxından iştiraka çağırıb.

XOCALILARIN FACİƏSİ …

2007-04-03T18:20:00.000+05:00

Onlar Kətik meşəsində də susuz qalmışdılar, indi də suyu pulla satın alırlar

Cəmilə Babayeva

Xocalılarla görüşə gedirik. Naftalana. Bu bizim xocalılarla əyani olaraq ilk görüşümüz olacaqdı. Ancaq biz onların çoxu ilə Xocalı faciəsinə həsr olunmuş Azərbaycan Yolu Siyasi Hərəkatının təşəbbüsü ilə 3 – Azərbaycan, rus və ingilis dillərində hazırlanmış «Onlar heç vaxt böyüməyəcəklər» kitabından artıq tanışıq. Faciə zamanı erməni gülləsindən anasının kürəyində keçinmiş Səxavətin anası Nuridəni tanıyırdıq. Bilirdik ki, Nuridə oğlunun meyitini o faciədən, o gülləbaranda yerə atmayıb. Sevincin anası Mətanətlə söhbət edəndə qarın nahiyəsinə doldurulmuş güllələlərdən həkimlərin qutrara bilmədiyi Sevinci xatırladıq. Bu cür xatirləri tanışlarımız həddindən çox idi.
Gedişimizin məqsədi xocalılarla görüşüb, yaşadıqları sarsıntıları qeydə almaqdı. Axı bu tarixi faktdı.
Naftalan səfərinə bələdçimiz Teymur özü də Xocalıdan idi və bzim dərdləşdiyimiz ilk müsahibimiz idi. Naftalan rayonunun sovet dönəmində Azərbaycanın istirahət və müalicə zonası olduğunu bilirdim. Xocalılar Naftalandakı sanatoriyanın korpuslarında məskunlaşıb. Vaxtilə Azərbaycanın fəxri olan Naftalan rayonunun sanatoriyaları əvvələr istirahət və müalicə mərkəzi olsa da, indi həmin yerlər xocalılar üçün xəstəlik və əzab tüğyan edən məkana çevrilib. Sanatoriya korpuslarında kanalizasiya sistemləri işləmir və vaxtilə insanların müalicə aldığı yerlər hazırda bir çox xəstəliklərin mənbəyinə çevrilib.
İlkin olaraq yaxınlaşdığımız sanatoriyanın «Şirvan» korpusu oldu. Korpusun həyətində 4-5 gənc oğlan vardı. Həmkarım maşından düşüb onlara yaxınlaşır, gəlişinin məqsədini açıqlayır. Bələdçimiz Teymuru görən gənclərdən biri onu tanıyır. Qohum idilər. Çoxdandır ki, görüşmürdülər. Amid adlı həmin gənc bizi otaq-evlərinə dəvət edir. Korpusun dağınıq pilləkənləri ilə qalxıb insanın nəfəsini sıxan dəhlizlə keçib otağa daxil oluruq. Bu ailə və bundan sonra görüşəcəyimiz Xocalıdan olan ailələrin qonaqpərvərliyinin şahidi oluruq. Həmkarım Amidin xatirələrini qeyd edir. Amid xatirələrini danışdıqca o, faciənin sarsıntıların təkrar yaşayır. Amidin 3 kiçik yaşlı övladları ilə tanış oldum. Altı nəfər ailə yalnız təqaüdlə dolanır. Amidin işləyib ailəsini dolandırmaq arzusu var, lakin hərbi bileti olmadığından onu heç yerdə işə götürmürlər. Amid faciə günündə onunla bir yerdə Kətik meşəsini keçənləri bir-bir otağa çağırır. Həmkarım onların xatirələrini qeyd etdikcə dərman qəbul edir. Xocalı faciəsinin həqiqətləri barədə məlumatlı idim. Lakin faciə şahidlərinin özünü görüb danışıqların dinləmək çox ağır idi. «Şirvan» korpusunda 4-5 ailənin uşaqlarından müsahibə alıb şəkillərini götürdük.
«Azərbaycan» korpusuna yollanırıq. Bu korpusda da uşaqların xatirələrini qeyd edirik. Korpusların otaqlarında ümumi cəhətlər gördüm: sanatoriya vaxtından qalmış sınıq-salxaq kreslolar, dəhlizlərin cırıq döşəmə örtükləri. Dəhlizlərdən keçdikcə fikirləşirəm ki, bu insanlar bu cür şəraitdə necə yaşaya bilər? Xocalı qaçqınları artıq 15 ildir ki, bu şəraitsizlikdə yaşayır. Korpusların dəhlizlərində kiçikyaşlı xocalılar çox idi. Onlarda da bir ümumilik gördüm. Onların baxışlarında. Sanki xudmani yaşayışın nə olduğunu bilməyən bu uşaqlar…..
«Goran» korpusuna yollanırıq. Gəlişimiz və məqsədimiz xocalıların marağına səbəb olub. Gecələdiyimiz Nazənin müəllimənin evi həmin faciənin şahid uşaqları ilə dolub boşalırdı. Yenidən o faciə yaşanırdı. Fikirləşirdim faciənin üstündən düz 15 il keçib. Bu sarsıntı nədən belə?! Sən demə, yaşanmış faciə unudulmur. Üstündən illər ötsə də, xatırlananda bir də o facinəi yaşayırsan, bir də o sarsıntıya düçar olursan. Yaxşı ki, Nazənin müəllimənin bapbalaca, sarışın, mavi gözlü nəvəsi Asiman hərdən ortalığa şuluqlu qatıb bizi o sarsıntıdan ayırırdı.
Ertəsi gün biz qaçqınlar üçün salınmış Ağcakənd qəsəbəsinə yollanırıq. Xocalıların müəyyən hissəsi orada yaşayır. Yol boyu dağlar, şumlanmış torpaq, çiçəkləmiş ağaclar göz oxşayır. Ağcakənddə məskunlaşmış xocalılar qəsəbəni müvəqqəti Vətən hesab edir. Hətta bəziləri bildirdi ki, ürəyimiz gəlmir burada nəsə edək. Hər gün gözləyirik ki, Xocalıya qayıdacağıq. Biz Xocalıdan çıxmırdıq. Ermənilər ağır texnikaya ilə Xocalıya daxil olana qədər dözdük. Yalın əllə, adi pulemyot, tüfənglərlə nə etmək olardı? Nə isə…
Qəsəbədə bir evin yaxınlığında 2 uşaq diqqətimi çəkir. Yəqin qardaş idilər. Əllərində kiçik balta ağac budaqlarını xırdalayırdılar. Bizə bildirmişdilər ki, qəsəbəyə qaz çəkilməyib. Fikirləşdim ki, bu balacalar ev üçün odun yığırlar. Xırdaladıqları odunları özlərindən böyük ağ torbaya yığırdılar.
Ağcakənddə də soraqlayıb şahid uşaqları bir-bir tapırıq. Onların da xatirələrini soruşuruq. Yaşyarımlıq ekizlər - Elvin və İlkinin Xocalı faciəsindən sağ-salamat qalması möcüzəsinin də şahidi oluram. Geri dönürük. Üzü Naftalana sarı. Ağcakənddən xeyli uzaqlaşmışdıq ki, Ruslan (Naftalandakı bələdçimiz) yanımızdan maşınla ötüb keçən Turalı tanıyır və geri - Turalın getdiyi maşının arxasınca düşürük. Axı Tural da Xocalı faciəsinin şahididir. Onunla da söhbət edirik.
Ağcakənddən Naftalana olan yol boyu bəzi evlərin həyət qapılarına qırmızı lentin bağlanması diqqətimi çəkdi. Yol yoldaşlarım dedi ki, bu evlərdə toy olub. Ürəyimdən bir kənd toyuna getmək keçdi.
Yenidən qayıdırıq Naftalan sanatoriyasına. Gedişimizin artıq üçüncü günüdür. «Şirvan» sanatoriyasının həyətində yığıncaq vardı. Həmkaroım üzünü mənə çevirib dedi ki, «Cəmilə, qərib eldə qərib bir köç gedir». Bu Naftalan santoriyasında dünyasını dəyişmiş xocalılı Xanlar kişi idi. Xocalılar onu yola salırdı. Yaşlı xocalıların üzündə qərib eldə basdırılmaq kədərini, qorxusunu da gördüm…
Naftalan səfərimiz arxada qalıb. Lakin səfər təəssüratlarım hələ də mənimlədir. Xocalı faciəsini yaşamış insanların min cür əzablarla üzləşdiyi Naftalan sanatoriyalarında indi də onlara sanki zülm verilir. Sadəcə onu qeyd edim ki, xocalılara Allahın neməti olan su pulla satılır. Məni ən çox ağrıdan məqamlardan biri bu idi.
P.S. Bu mənim ilk publisistik yazımdır. İş elə gətirdi ki, mən bu yazını yol qeydləri kimi qələmə alası oldum. Alınıbmı, alınmayıbmı, bəyəndinizmi? Artıq mən bunu bilmirəm.

Naftalan-Bakı-Naftalan

«Miq-29» əməliyyatı

2007-03-30T18:36:00.000+05:00

Fuad Cəfərov

Ötən həftə külli Azərbaycan bəh-bəh ilə belə bir xəbər aldı ki, bəs nəhayət ki, yarandığı gündən ilk dəfə olaraq Silahlı Qüvvələrimiz yeni alınmış «Miq-29» təyyarələrini nümayiş etdirdi. Hətta, Müdafiə Nazirliyinin (MN) Hava Hücumundan Müdafiə (HHM) və Hərbi Hava
Qüvvələrinin (HHQ) Hacı Zeynalabdin Tağıyev qəsəbəsində yerləşən hərbi aerodromunda həmən təyyarələrin uçmasını da xalqımıza göstərdilər.
Adını da qoyublar ki, guya biz çoooox təzə qırıcı təyyarələr almışıq.
Elə düşünürəm ki, ölkəmizin müdafiə qabilyyətinin möhkəmləndirilməsi üçün nəzərdə tutulmuş hərbi texnikanın hansı yüksək keyfiyyətlərə, üstünlüklərə malik olması , hər birimizi düşündürən məsələdir. Məhz buna görə də, qərara aldım ki, bu «şok, təzə xəbər» barəsində ictimaiyyətə bir balaca məlumat verim.
Xalqımız yəqin ki, hələ unutmayıb ki, bir müddət bundan əvvəl də «şanlı sərkərdə» Səfər Əbiyevin alverçi biznesmenləri Ukraynadan ordumuz üçün «yeni hərbi texnika» almışdı. Özü də elə «yeni texnika» ki, hətta onu qonşumuz olan Gürcüstanın, eləcə də uzaq Afrikanın Uqanda dövləti də özlərinə götürməyi rəva bilməmişdilər. Ancaq, əlləri yalnız nəyi isə çırpışdırmağa öyrəşmiş MN-nin on illərlə oturuşmuş, harınlamış bəzi general və polkovnikləri həmən o üstü bəzək, altı isə təzək olan Piyadaların Döyüş Maşını-1-i alıb (BMP-1) Azərbaycana gətirdilər. Görün bizim MN-nin özünə arxayın olan həmin silah və sursat alverçiləri tutduqları mövqedə nə qədər arxayındırlar ki, ondan sonra da «NATO standartlı» ordumuz üçün bəzi-bəzi «təzə texnika»lar alıblar.
Martın 29-da Ukraynadan alınmış yeni «MİQ-29» markalı döyüş təyyarələri kimi bizə təqdim olunan qırıcılar da… əslində 1980-ci ilin
istehsalı olan təyyarələrdir. Nəzərə alsaq ki, bu gün 2007-ci ildir, 27 ilin öncənin buraxılışı olan təyyarə necə müasir ola bilər? Hələ öz «hərbi savadlarına» o qədər vurğun olan generallar heç utanmadan bildirirlər ki, guya bu təyyarələr NATO-nun arsenalında olan «F-16» və «Tornado»lardan da (?!) üstündürlər. Adamın Allahı olar, ay «parket generalları». Siz kimi aldadırsınız və ümumiyyətlə bu hərəkətlərinizlə nə demək istəyirsiniz?
Bir çox cəhətlərinə görə, az qala kosmik silahlara malik olan ətrafdakı dövlətlərdən niyə axı geridə qalmalıyıq. Bir də, Azərbaycanın həssas və kövrək geosiyasi məkanda yerləşməsini unutmaq nə dərəcədə düzgündür? Gördüyünüz kimi, suallar cavablardan qat-qat çoxdur.
Ermənistan isə çox sakitcə silahlanır. Özü də öz himayədarlarının birbaşa köməkliyi ilə. Elə bizim MN-də ermənilərin artıq hansı müasir silahlarının əldə etməsi haqqında çox ətraflı dosyelər var. Bundan əlavə, Rusiyanın Gümridə saxladığı 102-ci bazaya son vaxtlar gətirilən raket və digər ən müasir silahlara baxanda, vəziyyət tam çılpaqlığı ilə göz önünə gəlir.
Maraqlıdır ki, yerli telekanallarımız «müasir» «MİQ-29»larla bağlı elə pafosla danışdılar ki, adamı təəcüb götürməyə bilməz. Bu təyyarələr heç də tam qırıcı sayılmır. Onlardan daha çox hədəf vuran təyyarə kimi istifadə olunur.
Bu il Azərbaycanda hərbi məqsədlər üçün 1 milyarddan artıq vəsait ayrılıb. Özü də, hər addımda belə bir fikir səsləndirilir ki, guya biz ordumuzu müasirləşdiririk, onu NATO standartlarına uyğunlaşdırırıq.
Hələ hüquqi bazası formalaşdırılmayan (Hərbi nizamnamələr və digər rəhbəredici sənədlər nəzərdə tutulur-müəll.) Silahlı Qüvvələrdə hansı yeniləşmədən, inkişafdan söhbət gedə bilər?. Bir də nə vaxta qədər yalan-palandan ordunun əsgər və ya zabitlərin keçmiş sovet sistemindən fərqli sıra yerişinə görə «NATO standartlarına uyğunlaşması» haqqında nağıllarla yedizdirəcəksiniz?
MN-nin indiki uğursuz və döyüş görməyən, başı daha çox «döyüş əməliyyatlarına» (oxu- biznes fəaliyyətinə) qarışan təsadüfü generalları ilə biz heç vaxt Qarabağımızı geri ala bilməyəcəyik. Nə qədər ki, Səfər Əbiyevin başçılığı altında bax belə «müasir təyyarələr» və digər silah, sursat alacağıq, biz yerimizdə saymağa məhkumuq.
Ordumuzun daxilində olan çoxsaylı problem və məsələlərə təcili dövlət səviyyəsində müdaxilə tələb olunur. Özü də vaxt gözləmir. Sirr deyil ki, itirdiyimiz hər gün bizi müasir ordunu görmək imkanından, həmiçnin işğal altında olan torpaqlarımızdan uzaqlaşdırır.
Mən mülki sahələrdə öz vəzifələrindən sui-istifadə edərək şəxsi biznesini quranlarla işim yoxdur. Çünki, onların etdikləri, dövlətin təhlükəsizliyi üçün o qədər də təhlükəli deyil. Amma, ordunun müasir silahlarının olmaması, yaxud onların müasir tələblərə cavab verməməsi, artıq ÇOX TƏHLÜKƏLİDİR. Niyəsini isə, mənə elə gəlir ki, izah etməyə ehtiyac yoxdur.
Elə, bir misal göstərməklə, nə demək istədiyimi yəqin ki, biləcəksiniz.
Ötən aylarda, İran vertolyotlarının gəlib Astara Rayon İcra İcra Hakimiyyətinin binasının üstündə dövrə vurub geri qayıtması, sıradan bir məsələ deyildi. Düzdür, əvvəl səslərini çıxarmayan rəsmilər, xüsusən də generallar sonradan, başladılar ki, bəs, sən demə, doğurdan da İran vertolyotları Azərbaycan ərazisinə qeyri-qanuni girmişlərmiş. Fərz edək ki, «təsadüfən» birdən həmin vertolyotlar çaşıb bir təxribat hərəkəti edəydilər. Məsuliyyəti kim daşıyacaqdı?
Məndən demək, nəticə çıxartmaq isə məsuliyyətli şəxslərdən.

Azərbaycan ziyalısının sifəti

2007-03-30T18:09:00.000+05:00

SEYMUR BAYCAN
seymurbaycan@gmail.com

«Suda batan ilana sarılar»
Türk atalar sözü

Bu yazının yazılmasını şərtləndirən bir neçə amil var. Məsələn, bayramdan əvvəl işıq üzü görmüş «10 tanınmış adam İlham Əliyevə qarşı» yazısında Şahvələd Çobanoğlu buyurur: «Təsəvvür edin, 10 tanınmış adam, tutaq ki, Bəxtiyar Vahabzadə, Əkrəm Əylisli, Anar, Nurəddin Rzayev, Tofiq Hacıyev, Süleyman Əliyarov, Rüstəm İbrahimbəyov, Sabir Azəri, Bəkir Nəbiyev, Əhliman Əmiraslanov günün birində birgə bəyanatla çıxış edib İlham Əliyevə tələb irəli sürürlər. Ya ölkədən korrupsiyanı və qanunsuzluğu yığışdır, ya da istefa ver».
İlahi, nə böyük sadəlövhlük, illüziya, xoşniyyətli avantüra var bu cümlələrdə. Sabir Azərini qoyaq kənara. O, kişiylə işim yox. Tam səmimi deyirəm, Nurəddin Rzayev «çujoy poxmel» bu siyahıya düşüb. Tofiq Hacıyev ötənlərdə Gülağa Tənha haqqında adına yaraşmayan elə bir saxta yazı yazmışdı ki, oxuyanda xəcalət təri tökdüm.
Anar Cəbhə hakimiyyəti dövründə acıq edib Türkiyəyə getmişdi. Afaq Məsud tez «Qayıt, Anar» adlı janrı naməlum yazıyla Anarı vətənə səslədi. Anar qayıtdı və Heydər Əliyev haqqında «Qalib gəldi, qalib getdi» adında möhtəşəm, sürüşkən bir esse qələmə aldı. Bu adama çox cümlə sərf etməyəcəyik. Marağın itirib, zatən özü-özünü hara qədər desən öldürüb, gözdən salıb.
Təbii, Şahvələd bəyin siyahısında mənim üçün ən çox maraq kəsb edən adam akademik Bəkir Nəbiyevdir. Həqiqətən Bəkir müəllim həddən ziyadə, təsəvvür edilə bilməyəcək dərəcədə unikal bir şəxsiyyətdir, fikrimi daha dəqiq ifadə etsəm, əsl Azərbaycan ziyalısıdır. İnanın, heç üzgörənlik-filan etmirəm. Bəkir müəllimi siyahıdakı digər Azərbaycan ziyalılarından bunca fərqləndirməyin mütləq bir səbəbi var.
Deməli, dostlar, Rəfiq Zəka Xəndanın xatirə gecəsində çox xatirələr səslənir, xoş sözlər söylənir, arzular dilə gəlir. İspanlar deyir ki, mərhum haqqında ya xoş sözlər danışmalısan, ya da susmalısan. Bu qanuna vətənimizdə keçirilən xatirə gecələrində çox dəqiqliklə ciddi riayət olunur.
Mövzudan uzaqlaşmayaq. Xatirə gecəsində söz verilir akademik, ziyalı Bəkir Nəbiyevə. Ziyalı qalxır səhnəyə (mən bu kadrlara «Space» kanalında baxmışam) və gözəl nitq irad edir. Azərbaycan ziyalısının nəyi də olmasa, yaxşı qazı, pafosu var. Allah sovet hakimiyyətini dağıdanın evini yıxsın. Meymundan adam düzəldirdi.
Bəli, Bəkir müəllim səhnəyə qalxıb dedi ki, «Rəfiq Zəka Xəndan hələ orta məktəbdə oxuyanda türkçülüyü təbliğ edirdi. O vaxtlar bir adam «Süleyman Rəhimovun əsərlərində türk işğalçılarının ifşası» adlı məqalə yazıb «Azərbaycan» jurnalında dərc etdirmişdi. Yəni Rəfiq Zəka Xəndan hələ orta məktəbdə oxuya-oxuya türkçülüyü təbliğ etdiyi halda, kimsə türkçülüyü söyməklə özünə titul, balasına çörək qazanırdı».
Əvət, arkadaşlar, bizim yaradıcı, qardaşım və qələm dostum Zaminin təbirincə desəm, dağıdıcı gənclərimizi «Süleyman Rəhimovun əsərlərində türk işğalçılarının ifşası» adlı məqalənin müəllifinin kim olması, məqaləni kimin yazması çox maraqlandırır. Ölmürlər intriqa üçün?! Azərbaycan balaca ölkədir. Qısa araşdırmadan sonra məlum olur ki, «Süleyman Rəhimovun əsərlərində türk işğalçılarının ifşası» adlı məqalənin müəllifi elə Bəkir Nəbiyevin özüdür. İndi gördünüzmü ki, Bəkir müəllim necə unikal şəxsiyyət, sözün həqiqi mənasında əsl Azərbaycan ziyalısıdır?!
Bu unikal şəxsiyyətin özündən də unikal məqaləsi sizin üçün maraqlıdırsa, «9 iqlim» jurnalında oxuya bilərsiniz. Yaxud Süleyman Rəhimovun oğlu Şamo Arifə müraciət edin.
O ki qaldı Şahvələd bəyin siyahısındakı ağsaqqal şairimiz Bəxtiyar Vahabzadəyə, qardaş, hər şey gün kimi aydındır. Bir neçə gün əvvəl keçmiş Basin, səhv etmirəmsə, indiki Füzuli küçəsində divarda böyük hərflərlə iki misra oxudum:
«ŞAM ƏGƏR YANMIRSA,
DEMƏK DEPUTAT SEÇİLİB».
Keçmiş bayramınız mübarək.

Dalğanın aksiyasından yeni şəkillər

2007-03-08T01:31:00.000+04:00

Dalganın aksiyasından şəkillər

2007-03-08T00:55:00.000+04:00

Dalğadan Danimarkalı tələbələrə dəstək aksiyası

2007-03-06T19:47:00.000+04:00

“Dalğa” Gənclər Hərəkatı Danimarka hökumətinin tələbələrə qarşı münasibəti ilə bağlı beynəlxalq təşkilatların Bakı ofisləri qarşısında piket keçirib “Dalğa” Gənclər Hərəkatı Danimarka hökumətinin tələbələrə qarşı münasibəti ilə bağlı Avropa Birliyi, Avropa Şurası və ATƏT-in Bakı ofislərinin binaları qarşısında piket keçirib. APA-nın məlumatına görə, aksiya iştirakçıları öncə Avropa Birliyinin Bakı ofisinin binası qarşısında öz etirazlarını bildiriblər. Aksiya zamanı hərəkat üzvləri Danimarka hökumətindən tələbələrin hüquqlarını bərpa etməyi tələb ediblər və adı çəkilən qurumları bu ölkədə baş verənlərin qarşısını almağa çağırıblar. Sonra piket iştirakçıları Avropa Şurasının və ATƏT-in binaları qarşısına qədər yürüş keçiriblər. Piket iştirakçıları aksiyanın bəyanatını hər üç qurumun ofislərinə təqdim ediblər. Aksiya bitdikdən sonra hadisə yerinə gələn Səbayel Rayon Polis İdarəsinin əməkdaşları piket iştirakçılarından 7 nəfərini saxlayaraq, 9-cu polis bölməsinə aparıb. Polis bölməsində bir neçə saat saxlanılan piket iştirakçılarından izahat alındıqdan sonra sərbəst buraxılıblar.

Bu gün Xocalı soyqırımının 15-ci ildönümüdür

2007-02-26T16:41:00.000+04:00

Bu gün Xocalı soyqırımının 15-ci ildönümüdür. APA-nın məlumatına görə, bu münasibətlə Azərbaycanda və dünyanın müxtəlif ölkələrində anım mərasimləri, kütləvi aksiyalar keçirilir.
Qeyd edək ki, 1992-ci il fevralın 25-dən 26-na keçən gecə erməni silahlı dəstələri keçmiş SSRİ-nin Xankəndində yerləşən 366-cı motoalayının köməyi ilə Xocalıya hücuma keçərək, günahsız insanları qətliam edib. Mayor Seyran Ohanyanın (hazırda separatçı Dağlıq Qarabaq rejiminin “müdafiə naziri”dir) komandanlığı altında 366-cı alayın 2-ci batalyonunun, Yevgeni Nabokixinin komandası altında 3-cü batalyonun, 1 saylı batalyonun qərargah rəisi Valeri Çitçyan və alayda xidmət edən 50-dən artıq erməni zabit və praporşikin iştirakı ilə törədilən soyqırımı nəticəsində 613 dinc sakin qətlə yetirilib, o cümlədən 63 uşaq, 106 qadın, 70 qoca xüsusi amansızlıqla, işgəncələrlə öldürülüb, gözləri çıxarılıb, başları kəsilib, hamilə qadınların qarınları süngü ilə deşilib, 8 ailə tamam məhv edilib, 25 uşaq hər iki valideynini, 130 uşaq isə valideynlərindən birini itirib, 487 nəfər yaralanıb (onlardan 76-sı uşaqdır), 1275 nəfər əsir götürülüb, 150 nəfər itkin düşüb, dövlətin və əhalinin əmlakına 01.04.1992-ci il tarixinə olan qiymətlərlə 5 mld.rub dəyərində ziyan dəyib.
Qeyd edək ki, Azərbaycan Milli Məclisi hər il fevralın 26-nı "Xocalı soyqırımı günü" elan edib.

Məzarının üzərində Əbülfəz Elçibəyin abidəsi qoyulub

2007-02-26T16:40:00.000+04:00

Əbülfəz Elçibəyin qəbirüstü abidəsi üzərində aparılan işlər yekunlaşmaq üzrədir.
Əhaliyə Vətəndaş Xidməti Trestinin baş mühəndisi Feyruz Əsgərov APA-ya bildirib ki, Ə. Elçibəyin abidəsi layihəyə uyğun şəkildə artıq məzarın üzərində qoyulub. O, abidənin ətrafında aparılan daş-hörmə işlərinin davam etdirildiyini deyib: “Əsas vaxt aparan qranitlə görülən işlərdir. Bunlar da mərhələ-mərhələ görülür, işdə heç bir yubanma olmayıb. Elçibəyin ailə üzvlərindən də daha heç kim işin dayandırılmasını tələb etmir”.

DAHA NƏ İSTƏYİRSİNİNZ!!!???

2007-02-22T15:32:00.000+04:00

Elçin
elchin_aze@yahoo.com

Böyüyün sözünə baxmayan, böyründəkinin gününə baxsın.
Əlaqəsiz epiqraf

Bəlkə də bu mövzuda yazmağa bir az gecikmişəm, amma məsələnin gün keçdikcə daha da çox aktuallaşması məcbur etdi ki, “mən də varam” demək üçün bir iki cümlə qaralayım.
Söhbət - keçən günlərdə ölkəmizin ictimai-siyasi palitrasına “bomba kimi düşən” prezidentin “kağız-kuğuz” şöbəsinin rəhbəri Süleyman İsmayılovun məqaləsindən gedir. Yəqin ki, yazının özünü oxumasanız da (buna mənim də nəfəsim çatmadı) hər birinizin məqalənin ana xəttindən xəbəriniz oldu.
Indi üzümü sizə tutub deyirəm. GÖRDÜNÜZ???!!!
Sizə deyirdim, sizsə əvəzində mənə “milləti bu günə sənin kimilər qoyub” deyə üstümə qışqırıb cavabımı verirdiniz. Hə, indi nə oldu bəs? Rəhmətlik Sabir demişkən, “mən deyən oldu, olmadı”? Süleyman müəllim də mənim dediklərimi təsdiqlədi.
Sən demə bütün il boyu cənab prezidentin ünvanına gələn məktublar heç də - ağır maddi durumdan, işsizlikdən, yoxsulluqdan, hər zaman rast gəlinən icra və hüquq-mühafizə organlarının özbaşınalığından, səhiyyə organlarının laqeydliyindən, məktəblərimizi və ölkəmizi bürümüş korrupsiyadan, addım başı insan haqqlarının tapdalanmasından, milyona yaxın qaçqınlıq həyatı yaşayanlardan, hazırda da “soyuq duşu” altında olduğumuz bahalaşmadan, və ya “quş qripindən”, hətta azərbaycanlıların ən çox sevdiyi “şəxsi” problemlərdən də deyil.
Hə, bəs nə bilmişdiniz. Süleyman müəllim bu sahədə mütəxəssisdir. Vətəndaşlarımızdan prezidentin icra aparatına gələn məktubların hamısına bircə-bircə baxıb və nə görsə yaxşıdır? Yuxarıda qeyd etdiyim xalqımızın müxtəlif təbəqələrinin məktublarında şikayət məktubları heç yox dərəcəsindədir, hər kəs hər şeydən məmnundur. Əvəzində məktub müəlliflərinin əksəriyyəti prezidentimizin daxili və xarici siyasətini bəyənir, onu ömürlük prezident görmək istəyir, və yaxud da “heç olmasa” prezidentlik müddətinin 5 ildən ən azı 7 ilədək uzadılmasını təklif edirlər. Bu, xalqın tələbidir!
Bilirəm, bu “şok” açıqlamadan sonra sizin kimi bir çox “ağzıgöyçəklər” qələmi qılınca döndərib kişini o ki var tənqid edəcək, ona “yalançı, saxtakar, məddah” damğası vuracaqsınız. Amma mən sizə məsləhət görərdim ki, gecə-gündüz qəzet səhifələrində bar-bar bağırmaqdansa, hay-küy qaldırıb problemləri xalqın gözünə soxmaqdansa, göz qabağında olan fakta diqqət yetirin, Süleyman müəllimə inanmırlarsa, gedib o məktubları bir-bir oxuya bilərsiniz.
Yoxsa, bəsdir yalandan realist, inqilabçı, liberal, demokrat, nə bilim dekonstruktiv yazılarınızla, böyük-kiçik yeri bilməyərək adət və mentalitetimizə təpik atmaqla, bizim qəlbi saf, düşüncəsi ülvi, zəkası parlaq, sakit, səssiz, tərbiyəli gəncliyimizin beynini hərzayi fikirlərinizlə zəhərlədiniz. Kifayətdir, ayılın, haqq yoluna gəlin, başınızı qaldırıb ölkəmizdəki bütün sahələrdə gedən parlaq inkişafı görün. Və nəhayət başa düşün ki, böyüklər heç vaxt səhv eləmir. Barı böyüklərimizin burada lap yerinə düşən bu kəlamına qulaq verin, “Elin gözü tərəzidir”.

Mən qatil olsaydım…

2007-02-22T15:31:00.000+04:00

Bu ölkədə ya ağsaqqal olmalısan, ya da ağsaqqalın qurbanı

Əsəd Nəsirli

Bizim atalarımıza aid olmayan bir atalar sözümüz var. Deyirlər “Allahsız yerdə otur, ağsaqqalsız yerdə oturma”. Nə deyirəm, oturma deyirlər oturma da, amma söhbət ayaq üstə durmaqdan getmir e, məsələ bundadır ki, axı ağsaqqal deyilən nəmənə şeydir ki, bizdə onu Allahdan üstün tuturlar?
Ağsaqqal deyiləndə bir elin, bir obanın, bir ölkənin başbiləni, sözükeçəni və nəhayət ən müsbət keyfiyyətlərin cəmləşdiyi, saçı-saqqalı ağarmış bir insandır.
Gəlin görək bizim ağsaqqallarımız bu keyfiyyətlərə cavab verirmi? Əlbəttə yox! (Təbii ki, istisnalar var).
Əgər bir xalqın ağsaqqalı həssə gedib, gələndə tiryekdən-miryekdən gətirib satıb, pul qazanıb cavanlarımızı zəhərləyirsə, bir xalqın kişisi, ağsaqqalı oğlan uşağı doğmadığına görə arvadın boşayırsa, xalqımızın bu acınacaqlı vəziyyətində, Tarif Şurasının qiymətləri qaldırdığı və yenə də qaldırmaq istədiyi bir zamanda səsini çıxartmırsa, bir ölkədə deyil, bir eldə, bir kənddə, bir məhəllədə, hətta bir evdə belə sözü keçmirsə, biz cavanlar hansı halda ağsaqqalsız yerdə oturmayaq? Özünə hörmət qaya bilməyən ağsaqqala necə hörmət bəsləyək? Öz hərəkətləri ilə hətta öz nəvələrinin gülüş hədəfinə çevrilən ağsaqqala nə üzlə ağsaqqal deyəsən?
Azərbaycan kişisinin, ağsaqqalının tipik surəti İsmayıl Şıxlının “Dəli Kür” romanının qəhrəmanı Cahandar ağanın simasında cəmləşməyibmi? Bir yandan namusdan, qeyrətdən danışan, mollanın evinə getdiyinə görə bacasını, quyruğu qırxıldığına görə sevimli atını güllə qabağına verən Cahandar ağa, bir yandan da başqasının arvadını aparmağa gələndə ərini də öldürür. Bu deyilmi Azərbaycan kişisi, Azərbaycan ağsaqqalı? Bəlkə belə deyil? Qoy buna ağsaqqalarımız özləri vicdanla cavab versinlər. Və bəyənmədikləri Avropa kişisinə baxıb ibrət götürsünlər.
Bin Ladenin belə bir sözü var ki, “Bu dövrdə ya terrorçu olmalısan, ya da terrorun qurbanı”. Mən isə deyirəm - Bu ölkədə ya ağsaqqal olmalısan, ya da ağsaqqalın qurbanı. Qisası bütün ağsaqqalları qırmaq keçir içimdən.
Mən qatil olsaydım bu ölkədə 40 yaşından yuxarı bir nəfər ağsaqqal qoymazdım…
Niyə 40 il dedim, ona görə ki, bizdə statusca ağsaqqaldan sonra gələn Allahın səbri 40 ildir. Qoymazdım onlar bir də gənclərimizi zəhərləsinlər, qadınlarımızın hüquqların tapdasınlar, qoymazdım analarımızı oğlan uşaqları doğmadığına görə boşasınlar. Həm də qoymazdım öz nəvə-nəticələrinin gülüş hədəfinə çevrilsinlər. Day bundan yaxşı nə var?
Mən şəxsən bu ölkədə ağsaqqalsız yerdə oturur, Allahsız yerdə oturmuram.

NARKOMANİYANIN QURBANINA ÇEVRİLƏN MƏMURLAR...

2007-02-19T10:51:00.000+04:00

Nazir və deputatların neçə faizi narkotik maddələrdən istifadə edir?

19.02.2007. Dünyanı cənginə almış narkotika bəlası durmadan dəhşətli bir xəstəlik kimi geniş vüsət alır. Narkotikaya həm passiv, həm də aktiv şəkildə qurşananlar Allahın onlara bəxş etdiyi biricik ömürlərini bu şəkildə məhv edir. Ən acınacaqlı hal isə narkotikanın biz istəməsək də artıq bizim ətrafımızı yabanı sarmaşıq kimi sarımasıdır. Təsadüfü deyil ki, bu gün narkotik vasitələr "qaranlıq məkan"lardan açıq bazara çıxaraq artıq adi apteklərdə də satılır.

Narkotikanın yayılmasında xarici və daxili firmaların rolu

Bir müddət öncə Səhiyyə Nazirliyində imzalanmış 53 saylı sərəncamla Niderlandın "Nolden Medikal B.V" şirkətinin istehsal etdiyi bəzi preparatların satışı və yayılması qadağan edilməsi də bunu təsdiq etdi. Bu "Gefoxime", "Metoclorramide", "Ferrous sulrhate", "Diclofenar", "Ketoconazole", "Amoxigilin", "Ceftrlaxone" preparatlarıdır. Mətbuatda verilən məlumatda bildirilirdi ki, bu şirkətin MDB məkanında psixotrop maddələrin satışını təşkil edən 109 müxtəlif şəbəkəsi var. Ekspertlərin fikrincə, Azərbaycanda isə satışı qadağan olmuş bu dərmanlardan təqribən gün ərzində 44 kişi, 52 qadın və 13 uşaq istifadə edir. Dünyada psixotrop maddələrdən istifadə həcmi hər il 1,5-2 dəfə artır. Qara bazarlarda bu dərmanlardan götürülən gəlirin illik həcmi isə 110 milyard dollar olduğu bildirilir və yaxud narkotik maddələrdən götürülən ümümi illik gəlir 400 milyard dollar təşkil edir. Bu da dünya ticarətinin 8 faizini təşkil edir. Ekspertlərin apardıqları araşdırmalara görə MDB məkanında hər il narkomaniyadan 22 min adam məhv olur. Ekspertlərin digər açıqlamalarında isə MDB məkanında psixotrop maddələrdən ən çox istifadə edən Orta Asiya və Cənubi Qafqaz regionları olduğu bildirilir. Məsələn, Daşkənddə hər 10 nəfərdən 6-sı, Düşənbədə 7-si, Bişkekdə 8-i, Aşqabadda 7-si, Tiflisdə 6-sı, Yerevanda 7-si, Azərbaycanda isə 5-i psixotrop maddələrdən istifadə edir.

Azərbaycanda 170 min narkoman olması heç kimi narahat etmir

2004-cü ildə narkotikaya qarşı profilaktik tədbirlərə Azərbaycanda 1,7 milyon dollar xərclənib. Rəsmi məlumatlara görə həmin il narkobəladan 158 nəfər ölüb, 1261 nəfər (bunun 23 faizi qızlardır) ömürlük şikəst olub. Regionlarda hamilə qadınların arasında narkotikaya aludə olanları həcmi əgər əvvəlki illərdə 2,5 faiz idisə, bu gün bu göstərici 3 faizi keçir. Statistik məlumatlara əsasən Azərbaycanda 170 mindən artıq narkoman var. Təkcə son beş ildə Respublika Narkoloji Dispanserinə 7 min nəfər narkotika qurşanmış insan müraciət edib. Bu məsələdə ən acınacaqlı hal isə narkomaniyaya qurşananların əsasən yeniyetmə və gənclərin olmasıdır. Təbii ki, aparılan araşdırmalar nəticəsində məlum olan bu statistik məlumatlar həqiqəti tam ifadə etmir. Çünki, statistika yalnız qeydiyyata düşmüş narkomanları əhatə edir ki, bu məlumatlarda göstərilən say həqiqətdə qat-qat çoxdur. Narkomaniyanın Azərbaycanda ən çox yayılan regionları ardıcıllığı ilə belədir: Bakı, Lənkəran, Gəncə, Mingəçevir, Sumqayıt, Cəlilabad, Şəki və i.a. Onu da diqqətinizə çatdıraq ki, bu şəhərlərin hər birində Narkoloji Dispanserlər fəaliyyət göstərsə də bura müalicə üçün çox az adam müraciət edir.

Azərbaycanda narkobiznesin illik dövriyyəsi 50-60 milyard dollardır

Fransız araşdırıcısı Y.Doqan iddia edir ki, Cənubi Qafqazda və Orta Asiyada "Heroin qanunları" mövcuddur. Ermənistana gəlincə isə, o göstərir: "Ermənistanda dövlət və hökumət strukturlarında çalışan məmurların 6,9 faizi aktiv, 3,2 faizi isə passiv narkotika qəbul edicisidir. Siyasi partiyalar arasında narkodaşıyıcılar 8,1 faizdir". Digər bir ekspert, professor V.Orexovun araşdırmalarına əsasən, Gürcüstanın Prezident Aparatında çalışanların 1,9 faizi narkotika ilə məşğul olur. Bu göstərici sərhəd qoşunlarında 2 faiz, parlamentdə 2,8 faiz, müdafiə nazirliyində 1,5 faiz, gömrük departamentində 2,5, ayrı-ayrı komitə və nazirliklərdə 6 faiz təşkil edir. Professor daha sonra yazır: "Ermənistanda vəziyyət daha da fəlakətlidir. Orada Prezident Aparatında çalışanların 2,3 faizi narkotika ilə məşğuldur. Bu göstərici sərhəd qoşunlarında 2 faiz, parlamentdə 3 faiz, MN-də 4 faiz, gömrük departamentində 2 faiz, DİN-də 2,5 faiz, siyasi partiyalar və ictimai təşkilatlar arasında 8 faiz təşkil edir. Məhkəmə-prokurorluq orqanlarında isə təhlillərimiz 4,5 faizi göstərir". Bəs Azərbaycanda bu göstəricilər nəyi göstərir? Bu məsələyə də aydınlıq gətirək. Azərbaycanda dövlət strukturlarında çalışan dövlət məmurlarının təqribən 18 faizi, MM-dəkilərin 5 faizi, Vergilər Nazirliyi stukturlarında çalışanların 12 faizi, DİN-də çalışanların 11 faizi, Gömrük Komitəsində işləyənlərin 14 faizi, sərhəd qoşunlarında 4 faizi narkotik vasitələrin qəbulu ilə məşğuldur. Təbii ki, bu məmurlar təkcə narkotik vasitələrin qəbulu deyil, eyni zamanda satışı ilə də məşğul olur. Bu sadaladığımız dövlət orqanlarının narkotranzit vasitəsilə xaricdən hansı həcmdə narkotik vasitələr qəbul etdikləri və onu hansı vasitələrlə müəyyən marşrut üzrə ölkədən kənara çıxardıqları və narkobiznesin illik dövriyyəsinin Azərbaycanda nə qədər olduğu aidiyyatı orqanlar tərəfindən araşdırılıb. İlkin nəticələrə görə, narkobiznesin Azərbaycanda illik dövriyyəsi 5-6 milyard dollar həcmində olduğu müəyyənləşdirilib. Bu sahə ilə kimlərin məşğul olduğu başqa bir mövzunun söhbəti olduğundan hələlik buna toxunmuruq.

Xəzər dənizi narkobiznesin əsas marşurutudur

Qərbin kəşfiyyat sənədlərində bu istiqamətdə 5 ölkənin strateji məqsədlərini əhatə edən Xəzər dənizinin adı da narkotranzit məkan kimi qeyd olunub. Məhz bu beş ölkənin narkobiznezlə məşğul olan ölkələr kimi tanınması, narkotikanın bu ölkələrdə satışının demək olar ki, sərbəs şəkildə aparılması və bu ölkələrdən narkotranzit kimi istifadə edilməsi geniş vüsət aldığından Xəzər dənizi vasitəsilə dünya narkobaronlarına məxsus "mallar"ı asanlıqla lazımı ünvana çatdırmaq mümkündür. Təsadüfi deyil ki, Xəzərin narkotika və terror hücumlarından qorunması üçün ABŞ-ın Harvard Universitetində xüsusi "Təhlükəsizlik layihəsi" də hazırlanıb. Layihənin icrası üçün 100 milyon dollar ayrılıb. Lakin Xəzəryanı dövlətlərin narkomafiyada birbaşa maraqlı olması hələ ki, bu layihənin həyata keçirilməsinə imkan vermir. Düzdür bu ölkələr tərəfindən Xəzər dənizində bir sıra təhlükəsizlik tədbirlərinin həyata keçirilməsi göstərisi edilsə də, qeyd etdiyimiz kimi, bu göstəridən başqa bir şey deyil. Eyni zamanda əsdində bu göstəri daha bir neçə şeyə də xidmət edir. Birincisi narkotik vasitələrin təhlükəsizliyini təmin etmək üçün hər bir Xəzəryanı dövlətin digər dövlətin sərhəd sularına kimi bu yüklərin təhlükəsizliyinə qarant durur. İkincisi, narkomanapoliyaya girmək istəyən bir sıra kiçik narkomafiyaların Xəzərdə narkotranzitlə məşğul olmasının qarşısını almaq və buna imkan verməmək kimi vəzifələri var...

Qanunlar narkobiznesin yayılmasına şərait yaradır

Azərbaycanda narkotik maddələrin qeyri-qanuni dövriyyəsi, yəni əkilməsi, daşınması, satılması istiqamətində, eləcə də istifadə olunması yönümündə ciddi qanun boşluqları var. Məsələn, ölkə parlamentində hazırlanmış "Narkotik vasitələrin psixotrop maddələrin və prekursorların dövriyyəsi haqqında" qanun layihəsini oxuduqdan sonra hiss edirsən ki, bu məsələ hazırlanarkən ölkə narkomafiyasının tələbləri nəzərə alınıb. Ölkə parlamenti Azərbaycanda neçə narkoqrupun, narkomafiyanın, narkobaronun, narkokorrupsiya mərkəzinin, narkobankın, narkolaboratoriyanın, narko-əkin sahəsinin həcmini, sayını, vəsaitini öyrənmədən, aydınlıq gətirmədən qanun qəbul edib. Elə bu qanundan bilinir ki, dövlət narkobiznesin ölkədə yayılmasında maraqlıdır. Avropanın əksər ölkələrində Asiyanın, Afrikanın, Amerikanın iri ərazilərində narkotika ilə bağlı aparılan profilaktik tədbirlər nəticə vermədiyindən, ona qarşı tədbiq edilən "ölüm hökmü" qüvvədə qalır. Azərbaycanda isə narkotika ilə bağlı lisenziya, yəni narkotikanın satışına açıq şəkildə icazə verilir və daha da qeyri-leqal iş görülmək üçün şərait yaradılır. Çünki qanun buna imkan verir. Qanun layihəsinin 16-cı maddəsində yazılıb: "Tibbi məqsədlərlə fiziki şəxslərə narkotik vasitələrin və psixotrop maddələrin buraxılması, belə fəaliyyət növünün lisenziyası "xüsusi razılıq" olan apteklər və müalicə-profilaktik müəssisələr tərəfindən həyata keçirilir". Qanundan görundüyü kimi narkotik vasitələrin istənilən şəxs həmin bu "xüsüsi razılığ"ı olan apteklərdən qanuni şəkildə almaq və istifadə etmək olar. Qanun imkan verir ki, uzun illərdən bəri qeyri-leqal narkotika alveri ilə məşğul olan apteklərə "amnistiya" verilsin. Azərbaycanda narkotika satan aptekləri çox axtarmaq lazım gəlməyəcək. Çünki bu cür apteklər ölkəmizi hər yerində fəaliyyət göstərir. Məlumata görə, artıq respublikada narkotik maddələri qanuni yolla satmağa hazırlaşan 175 aptek lisenziya almağa çalışır. Azərbaycanda bir-birinin ardınca tikilən "999", "777", "555" (bu rəqəmlər ən keyfiyyətli heroin növləridir) saylı və yaxud işarəli 105 şadlıq sarayı, super-market, kafe-restoran, istirahət mərkəzi, dənizdə üzən qayıq, qrup və təşkilat var. Və bütün bu saydıqlarımızın sahiblərini də axtarmağa ehtiyac yoxdur. Çünkü bu obyektlərin məhz kimə məxsus olduğunu dəqiqləşdirmək kifayət qədər çətin və məsuliyyətli bir məsələdir. Ancaq bir şey dəqiqdir ki, bu obyektlərin sahibləri mərkəzləşmiş narkomafiya-NARKOAİLƏDİR!

Müsavatın fevralın 18-nə planlaşdırdığı yürüş-mitinqə icazə verildi

2007-02-15T21:46:00.000+04:00

15.01.2007. Bakı Şəhər İcra Hakimiyyəti Müsavat Partiyasına 18 fevral yürüş-mitinqini metronun «Həzi Aslanov» stansiyasından Ukrayna dairəsinədək keçirməyə icazə verib.
Müsavat başqanının müavini Mehman Cavadoğlu «Media forum» saytına bildirdiyinə görə, partiya aksiyanı bu marşrut üzrə keçirmək barədə qərar qəbul edib. Aksiyada Tarif Şurasının enerjidaşıyıcıların və kommunal xidmətlərin qiymətlərini qaldırması haqda qərarının icrasını dayandırmaq tələb olunacaq.
Yanvarın 28-də Müsavat eyni tələblə eyni marşrut üzrə yürüş-mitinq keçirib.

Müsavat əhaliyə xüsusi vərəqələr paylayır

2007-02-13T10:47:00.000+04:00

Fevralın 18-də keçiriləcək aksiyasına Xalq, KXCP, CXP və Əhrar partiyaları dəstək verəcək

13.01.2007. Müsavat qiymətlərin artırılmasına etiraz olaraq fevralın 18-də keçirəcəyi növbəti yürüş-mitinqə hazırlıq işlərini dünəndən bir qədər də gücləndirib. Partiyanın mitinqə hazırlıq komitəsinin rəhbəri Arif Hacılının sözlərinə görə, dünən Bakı və əraziləri işğal edilən rayon təşkilatlarının rəhbərlərinin iştirakı ilə ümumrespublika müşavirəsi keçirilib: «Bu gün dörd rayon təşkilatının fəalları ilə partiya rəhbərliyində təmsil olunan əksər şəxslər bir araya gələcək. Həftənin sonuna qədər bu cür görüşlər davam edəcək və aksiyanın keçiriləcəyi gün partiyamız hazırlıq işlərini başa vuracaq. Ümid edirik ki, bu aksiyamız ötən dəfəki yürüş-mitinqdən möhtəşəm olacaq».
A.Hacılının bildirdiyinə görə, aksiya öncəsi Müsavat əhalinin müxtəlif sosial təbəqələrini mitinqdə aktiv iştirak etməyə çağıracaq: «Biz aksiyada insanların daha çox iştirakı üçün əlimizdən gələni edirik. Bu məqsədlə bir sıra vasitələrdən istifadə etmək niyyətindəyik. Mətbuat vasitəsilə mitinqimizin vaxtı və yeri barədə məlumatlar veririk, xüsusi vərəqələr paylayırıq».
Aksiyada digər partiyaların iştirakı ilə bağlı məsələyə gəldikdə, A.Hacılı xatırladıb ki, bir müddət öncə Müsavat başqanı İsa Qəmbər bütün müxalifət partiyalarını bu prosesdə iştirak etməyə çağırıb. Onun sözlərinə görə, müxalifət partiyalarının üzvlərinin çoxu mitinqdə iştirak edəcəklər: «Hələlik müttəfiq olduğumuz təşkilatlardan başqa digərlərinin aksiyaya dəstək verməsi ilə bağlı qərar yoxdur. Müttəfiq dedikdə isə əsasən Xalq, KXCP, CXP və Əhrar partiyalarını nəzərdə tuturam. Digər aparıcı müxalifət partiyalarının aksiyaya dəstək verəcəkləri barədə rəsmi qərarları yoxdur. Ancaq mitinqin keçirilməsinə bir neçə gün qalır. Məncə, bu təşkilatlar da düşünməlidirlər. Biz hakimiyyətə müxalifətdə duran bütün təşkilatların yürüş-mitinqdə iştirak etməsinin tərəfdarıyıq».
Müsavatın Divanının dünən keçirilən iclasında da mitinqə hazırlıq məsələsi müzakirə olunub.

Nemət HÜSEYNLİ

Məhkəmə Tarif Şurasına qarşı iddianı qəbul etmir

2007-02-13T10:31:00.000+04:00

Əlövsət Əliyev: «Avropa Məhkəməsinə qədər getmək və bu qərarın qanunsuzluğunu sübut etmək fikrindəyik»

13.01.2007. İki gün öncə bir qrup hüquqşünas və QHT rəhbərləri Tarif Şurasına qarşı yeni iddia qaldırıblar. İddialardan ikisi Səbayel Rayon Məhkəməsində, biri isə Konstitusiya Məhkəməsində qaldırılıb. Sonuncu iddia yanvarın 24-də Tarif Şurasına ünvanlanan sorğuya həmin qurumun cavab verməkdən imtinası ilə bağlıdır. Sorğuda Tarif Şurasının 6 yanvar tarixli qərarlarıyla bağlı bir sıra sualların cavablandırılması və müvafiq sənədlərin təqdim olunması xahiş edilib.

İddia müəllifləri ona əsaslanırlar ki, qanunvericiliyə görə, yeni qiymətlər tətbiq edilməzdən 30 gün əvvəl Tarif Şurası bu qərarı ictimaiyyətə bildirməli və qurumun rəsmi internet səhifəsində açıqlamalı olduğu halda bu, baş verməyib.
Məhkəməyə müraciət edənlər arasında ölkənin tanınmış hüquqşünaslarından Ənnağı Hacıbəyli, Ələsgər Məmmədli, İsaxan Aşurov, Əlövsət Əliyev, Rəşid Hacılı, Əyyub Kərimov, Akif Əlizadə, Namizəd Səfərov, QHT liderlərindən Osman Gündüz, Novella Cəfəroğlu, Səadət Bənənyarlı, Aytəkin İmranlı və başqaları var.
Miqrantlara hüquqi yardım təşkilatının rəhbəri Əlövsət Əliyev Tarif Şurasının bahalaşma ilə bağlı son qərarını 2006-2007-ci illərin ən çox müzakirə olunan və ictimaiyyətin narazılığna səbəb olan hadisəsi kimi xarakterizə edir. O, Azərbaycan məhkəmələrindən ədalətli qərar gözləmədiyini önə çəkir, iddianın son məqsədə hesablandığını deyir: «Biz Avropa Məhkəməsinə qədər getmək və bu qərarın yanlış, qanunsuz olduğunu sübut etmək fikrindəyik. Bu baş verəcək. İddia həm də tarix üçün maraqlı faktdır. Biz «Hüquqşünaslar forumu» olaraq Azərbaycan ictimaiyyətinin əleyhinə qəbul olunmuş bir sıra qərarlardan məhkəməyə şikayət etmək fikrindəyik».
Ə.Əliyev TŞ-nı məhkəməyə vermək
kimi addımların hakimiyyətə xəbərdaredici əhəmiyyətinin böyük olacağı qənaətindədir: «Müxtəlif hüquqşünaslar tərəfindən atılan bu cür addımların hamısının vacib əhəmiyyəti var. Belə ki, çox vaxt hakimiyyət Avropa Məhkəməsinə şikayət olunmasın deyə, problemləri həll etməyə çalışırlar. Bu onun nəticəsidir ki, hakimiyyət bu beynəlxalq məhkəməyə gedən şikayətlərin artmasından narahatdır. Və artıq qanunsuz qərarlar qəbul etməkdən çəkinir».
Səbayel Rayon Məhkəməsinin iddianı geri qaytarmasını qanunsuz addım sayan Ə.Əliyev əslində TŞ-nin icraedici orqan olduğunu və şikayətin məhkəmə predmeti olmasının mümkünlüyünü vurğulayır: «Biz Səbayel məhkəməsinin bu qərarından da apelyasiya şikayəti verəcəyik».

AZƏRBAYCAN PULUNUN ÜZƏRİNDƏ ŞEYTAN SİMVOLU VAR?

2007-02-12T10:11:00.000+04:00

20 manatın arxasındakı rəmz ilana bənzədilir

12.02.2007. Azərbaycanın yeni əsginaslarından birinin - 20 manatlığın üzərində şeytanın simvolu əks olunub. Bu haqda iddianı “Azadlıq” qəzeti qələmə alıb. İddiaya görə, pulun arxa tərəfində ilan şəkli əks olunub ki, bu da insanların qəlbi uğrunda Allahla mübarizə aparan şeytanın simvoludur. Yazıda ilana bənzədilən işarənin üzərindəki naxışların xüsusən şübhələrə səbəb olduğu qeyd olunur.Bu naxışların sayı isə bir tərəfdən 9, digərində isə 6 olmaqla 15-dir.Məqalədə mason emblemlərinin bir sıra dövlətlərin atributlarında öz əksini tapdığı xatırladılır. Qeyd olunur ki, “Böyük İlgək” masonlarının simvolu da məhz Yer kürəsinin ətrafına sarınmış ilandır. Başqa bir xaça sarınmış ilan isə isə XIX əsrdə mövcud olmuş Teosofiya cəmiyyətinin simvolu olub. Həmçinin bolşeviklərin simvolu olan beşgüşəli ulduzun yəhudi mənşəli Trotski tərəfindən qəbul edilməsinin də təsadüfi olmadığı qeyd olunur. Oraq və çəkic də mason simvolikası hesab olunur.Yazıda habelə xristian ortodokslarının avronun üzərində beşgüşəli ulduzun təsvir edilməsinin də mason əməllərinin nəticəsi hesab etdikləri qeyd olunur və vurğulanır ki, Azərbaycan manatının eskizlərini hazırlayan Avstriya rəssamı Robert Kallina həm də avronun dizayneridir.Qeyd edək ki, Milli Bankdan manatın üzərində şübhə doğuran həmin işarənin güc-qüvvət rəmzi olan qalxan olduğu bildirilib.

TAXIL QITLIĞI TƏHLÜKƏSİ REALDIR

2007-02-12T10:08:00.000+04:00

Qubad İbadoğlu: “Hökumət ehtiyat fond yaratmalıdır”

12.02.2007. Ümumdünya Ərzaq və Kənd Təsərrüfatı Təşkilatının yaydığı məlumata görə, bu il Azərbaycanda taxıl qıtlığının yaranacağı gözlənilir. Təşkilatın proqnozuna görə, pis hava şəraiti və münaqişələr üzündən bu il 34 ölkə ərzaq, o cümlədən də taxıl qıtlığı problemi ilə üzləşəcək. Bu ölkələr arasında Azərbaycandan başqa Çad, Kot’d İvuar, Qvineya, Liberiya, Zimbabve, Konqo, Anqola və s. kimi Afrika ölkələrinin, habelə Əfqanıstan, İraq, Nepal, Şimali Koreya, Flippin və Şri-Lankanın da adları var. Azərbaycanda taxıl qıtlığı təhlükəsi nə qədər realdır? Qeyd edək ki, Statistika Komitəsinin ötən ilin 9 ayı üçün açıqladığı hesabata görə, şumlanmış əkin sahələrinin kəskin azalması müşahidə olunub, taxıl istehsalı isə 2,2 faiz azalıb.Mütəxəssislər isə bu rəqəmin 5 faiz olduğunu iddia edirlər. İqtisadi Tədqiqatlar Mərkəzi İdarə Heyətinin sədri Qubad İbadoğlunun sözlərinə görə, ölkədə qıtlıq hallarının yaranacağı istisna olunmur. İqtisadçı hesab edir ki, belə bir vəziyyətin yaranmasının əsasən iki səbəbi var: “Ötən illə müqayisədə bu il taxıl istehsalının səviyyəsi aşağı olub. Digər tərəfdən isə hər il ölkəyə Qazaxıstan, Ukrayna və Rusiyadan 1 milyon ton taxıl idxal olunur. Taxılın idxal qiymətləri də əvvəlkinə nisbətdə xeyli bahalaşıb”. Qubad bəy dedi ki, ölkədə taxıl əkinçilərinin fəaliyyəti rentabelli deyil. Əkinlə məşğul olanlar taxılın qiymətinin bir neçə il ərzində süni şəkildə dondurulmasının nəticəsi olaraq, öz xərclərini ödəyə bilmədiyindən digər bitkilərin əkininə meyl edirlər: “Bizdə olan məlumata görə, ötən ilin payız əkini zamanı fermerlərə müəyyən inzibati təzyiqlər olub. Hətta yerli icra hakimiyyətlərinin, bələdiyyələrin müdaxiləsi ilə fermer təsərrüfatlarının əksəriyyətini məcbur ediblər ki, onlar taxıl əksinlər. Amma buna baxmayaraq, taxıl əkin sahələri əvvəlkilərlə müqayisədə xeyli azalıb”.İqtisadçının sözlərinə görə, digər səbəb isə çörək və çörək məhsullarının rentabelliyinin aşağı düşməsi ilə bağlıdır: “Çörək istehsalının maya dəyərinin, xüsusilə enerjinin, daşıma xərclərinin qiymətlərinin xeyli artmasına baxmayaraq, çörəyin əvvəlki qiyməti süni şəkildə saxlanılır. Əslində bazara hökumətin müdaxiləsi olmalı deyil, qiyməti alıcı və satıcı müəyyənləşdirməlidir. Amma qiymətin dondurulmuş şəkildə saxlanılması da gizli inflyasiya yaradır. İnsanlar həmin qiymətə çörək alsalar da, çəkinin getdikcə azalması davam edir”.Qubad bəy qeyd etdi ki, ümumi bahalaşma fonunda vətəndaşların daha çox çörək alması da səbəblərdən biri sayıla bilər: “Ət, ət məhsullarının, süd, süd məhsullarının qiyməti bahalaşmaqda davam edir. Belə olduqda çörəyin qiyməti bahalaşmadığından, insanlar öz istehlak ehtiyaclarını çörəkdən daha çox istifadə etməklə ödəyirlər. Bu da çörəyə tələbatı artırır. Çörəyin daha çox istehsal olunması isə taxıla ehtiyacı artırır”. Q.İbadoğlu dedi ki, belə olduğu üçün bu il taxıl idxalı 1 miyon tondan artıq olmalıdır. Onun sözlərinə görə, bu sahədə də xeyli problemlər var. Taxıl idxalında olan monopoliyaların, iqtisadi sabotajların da taxıl qıtlığına təsiri istisna deyil: “İndiki halda hökumət problemi aradan qaldırmaq haqqında düşünməlidir. Ən azı çalışmalıdır ki, taxıl ehtiyatı fondu yaradılsın”.

METRODA GEDİŞHAQQI ARTIRILIR

2007-02-12T10:05:00.000+04:00

Qiymətləri 20 qəpiyədək qaldırmaq təklifləri müzakirəyə çıxarılıb

12.02.2007. Yaxın vaxtlarda Bakı Metropolitenində gedişhaqları artırılacaq. Bu barədə məlumatı hökumətdəki etibarlı mənbədən almışıq. Məsələ ilə bağlı metropoliten rəhbərliyi tərəfindən Tarif Şurasına və hökumətə növbəti dəfə müraciət edilib. Mənbə bildirir ki, təklif ciddi şəkildə müzakirə edilir və onun müsbət həll ediləcəyi bəri başdan məlumdur. Məsələ yalnız bunun nə zaman elan olunmasında və bir də qiymətlərin hansı həddə qədər qaldırılmasındadır. Metroda gedişhaqlarının sərnişinlər üçün ən azı iki dəfə qaldırılacağı və 10 qəpik olacağı artıq həll olunmuş məsələ sayılır. Lakin müzakirəyə daha radikal təklif çıxarılıb: metroda gedişhaqqını 20 qəpiyə qədər qaldırmaq!
Həmin təklif metropoliten rəhbərliyi tərəfindən irəli sürülüb və Tarif Şurasında da, hökumətdə də onu müdafiə edənlər var. Qeyd edək ki, hazırda bu nəqliyyat növündə gedişhaqqı 5 qəpik olduğundan, əhalinin kasıb təbəqəsi əsasən onun xidmətindən istifadə edir.Xatırladaq ki, hələ ötən il metropoliten rəhbərliyi qiymətlərin artırılması ilə bağlı hökumətə bir neçə dəfə müraciət etmiş, ancaq hər dəfə hökumət vaxtı məqbul saymayaraq təklifləri rədd etmişdi.Lakin bu il yanvarın 8-də Tarif Şurasının enerjidaşıyıcılarının qiymətini qaldırmaq barədə çıxardığı qərarla ölkədə total bahalaşma start götürüb. Həmin qərarla enerjidaşıyıcılarının qiyməti 50 faiz artırılıb və müstəqil ekspertlərin rəyinə görə bu, hələ son hədd deyil.Paralel surətdə Şura sərnişindaşımada qiymətləri tənzimləmək adı ilə şəhərdaxili marşrutlarda gedişhaqqını qaldırıb. İndi isə görünür, növbə metroya çatıb. Çox güman ki, bu dəfə qurum öz toplantısında qazın və metroda gedişhaqqının qiymətinin azı iki dəfə artırmaq barədə qərar verəcək. Bu da öz növbəsində əhalinin maddi durumuna növbəti ciddi zərbə olacaq. Çünki metro yeganə və nisbətən ucuz nəqliyyat növüdü ki, bahaşlaşma ilə bağlı əhali ən çox ona üstünlük verir.Onu da yada salaq ki, lap yaxınlaradək hökumət metroda qiymət artımına getməyəcəyini və metro xərclərinin başqa vasitələrlə kompensasiya ediləcəyini bildirirdi. İndi aydın olur ki, həmişəki kimi, indi də hakimiyyəti sadə xalqın dolanışığı maraqlandırmır və o, kasıb əhalinin son qəpiyinə də göz dikib.Mənbə bir önəmli məqamı da vurğuladı: hakimiyyətdəki bahalaşma tərəfdarları, başda iqtisadi inkişaf naziri Heydər Babayev olmaqla, mövqelərini onunla əsaslandırırlar ki, indiki məqam xalqın və müxalifətin vəziyyəti baxımından ən əlverişli məqamdır və ona görə də qiymətləri hansı səviyyədə istəsələr, qaldıra bilərlər. Onlar israrla qeyd edirlər ki, xalq müqavimət göstərməyəcək, seçkilərə qədər müxalifətin hər hansı etiraz aksiyaları kütləvi olmayacaq və bu səbəbdən də qiymətləri beynəlxalq standartlara uyğunlaşdırmaq üçün başladılan işi sona çatdırmaq lazımdır. Hökumətdəki bahalaşdırma tərəfdarlarının arqumentlərinə görə, bir qədər sonra cəmiyyət yeni qiymətlərə adaptasiya olunacaq və iqtidara olan qəzəbi soyuyacaq. Lakin seçki ərəfəsində belə bir addımı atmaq mümkün olmayacaq. Ona görə də “qiymət islahatı”ndan kənarda qalan iki əsas obyektin - metrohaqqının və qazın - qiymətlərini məhz indi, şok bahalaşma prosesinin davamı kimi, artırmaq lazımdır.Mənbəmizin fikrincə, Müsavatın 28 yanvar aksiyası daha kütləvi, daha dinamik olsaydı, bahalaşma prosesi nəinki dayandırılacaqdı; hətta həkimiyyət tərəfindən müəyyən qədər geri çəkilmələr də olacaqdı.“18 fevral aksiyası da əvvəlki kimi olsa, kütləvilik ən azı iki dəfə artmasa, bahalaşma prosesi bu ilin sonlarına qədər davam edəcək. Əksinə olsa, metronun və qazın qiymətlərinə dəyməyəcəklər...”Bu da bizim hökumətdəki mənbəmizin düşüncəsidir...

Sən də yetim, mən də yetim

2007-02-12T09:35:00.000+04:00

İtkin düşən sədarətim...

Azərbaycan Demokrat Partiyasının sədri Rəsul Quliyev fevralın 10-da imzaladığı sərəncamla Sərdar Cəlaloğlunu özünün müavini vəzifəsindən azad edib. Rəsul Quliyev onu son zamanlar partiyada yaranmış vəziyyəti gərginləşdirməkdə, sədrin tapşırıqlarını pozmaqda ittiham edib.
Sərdar Cəlaloğlu isə Rəsul Quliyevin imzaladığı sərəncamı partiya nizamnaməsinə zidd sayır:
«Sərəncamın özü nizamnaməyə ziddir, çünki, yanvarın 27-də Ali Məclisin iclasında Demokrat Partiyasının bütün strukturları buraxılıb. Nə Rəsul Quliyev sədrdir, nə mən müavinəm, partiyada nə idarə heyəti var, nə də məclis».
Müxalifətdə olan ADP-nin Təşkilat Komitəsi yanvarın 27-də hökumətlə danışıqlara başlamaq barədə qərar qəbul etmişdi.
Partiyanın sədri Rəsul Quliyev isə rəhbərlik etdiyi təşkilatın hökumətlə danışıqlara başlamasını nəzərdə tutan qərarının əleyhinədir.

Daha bir etiraz blogu yarandı

2007-02-09T22:08:00.000+04:00

09.02.2007. Özlərini tin uşaqları kimi təqdim edən və bir neçə yahoo-qrupa moderatorluq etdiklərini söyləyən gənc internet məkanında yeni etiraz blogu yaradıblar.
"Aksiya"nın elektron ünvanına daxil olan məktubda blogun "Tam Məxfi" adlandırıldığı və Fransadan idarə olunduğu bildirilir.
Məktubda o da bildirilir ki, tezliklə blogda maraqlı ifçaedici materiallar təqdim olunacaq.
Bundan əlavə blogun türk və ingilisdilli variantları üzərində də iş getdiyi söylənilir.
Hazırda blogda müxtəlif qəzetlərdən götürülən materiallar və qrupun öz xəbərləri yerləşdirilib.

Tarif Şurası lap ağ elədi!

2007-02-04T12:32:00.000+04:00

İndi də sərnişindaşımanın qiymətləri qaldırıldı!!!

04.02.2007. Fevralın 2-də Tarif Şurası növbəti bahalaşmaya start verib. Amma bu barədə informasiya cəmiyyətdən gizli saxlanılıb.

Qurumun iclasında ölkə ərazisində avtomobil nəqliyyatı ilə şəhərlərarası, şəhərətrafı və qəsəbələrarası marşrutlar üzrə daşınma xidmətinin, habelə dövlət torpaq və xəritəçəkmə komitəsi tərəfindən göstərilən xidmətlərin tariflərinə baxılıb. Şuranın qərarı ilə şəhərlərarası gedişhaqqı bir kilometr məsafə üçün bərk oturacaqlı avtobuslarda 1,5, yumşaq oturacaqlı marşrutlarda isə 1,6 qəpik müəyyən edilib. Xatırladaq ki, köhnə tarifə əsasən, şəhərdə 1 kilometr məsafə üçün gedişhaqqı təqribən 1 qəpik idi. Göründüyü kimi, köhnə tariflərlə müqayisədə artım 50 faiz təşkil edir.Bundan başqa, şəhərətrafı və qəsəbələr arası marşrutlar üzrə xidməthaqqı məsafə 15 km-ədək olduqda 20, 25 km-ədək olduqda 25, 30 km-ədək olduqda 30, 40 km-ədək olduqda 40, 45 km-ədək olduqda 50, 50 km-ədək olduqda isə 70 qəpik təşkil edəcək. Məsafə 50 km-dən çox olduqda isə sərnişinlər 80 qəpik ödəyəcəklər. Şuranın torpaq, kadastr planın hazırlanması, kadastr bazasının yerləşdirilməsi, məsafədən və ölçü nöqtələrindən asılı olaraq fərdi həyətyanı, fərdi bağ və kollektiv kooperativ bağçılıq sahələrinin sahibləri 7-25 manat məbləğində vəsait ödəyəcəklər. Yeni tariflər fevral ayının 12-dən qüvvəyə minəcək.Yada salaq ki, Tarif Şurası heç bir ay olmaz ki, özünün çıxardığı qərarla benzini və dizel yanacağının qiymətini 50 faiz, elektrik enerjisini 3 dəfə, marşrutlarda gedişhaqqını isə 30-40 faiz bahalaşdırmışdı. Bu isə yeni artımdı. Bir çox ekspetrlər və siyasilər bunu proqnozlaşdırmışdılar. Onu da qeyd etmişdilər ki, Azərbaycan xalqı hakimiyyətin soyğunçu addımlarına dözümlü yanaşdıqca, onlara vaxtında və adekvat reaksiya vermədikcə, hakimiyyətin də ayağı yer tutmayacaq. Budur, milli maraqları çoxdan unutmuş hakim qüvvə üstündən bir ay ötməmiş yeni qiymət artımına qərar verdi.Bunun xalqa həqarətdən başqa adı yoxdur. Rejim gerçək mənada millətin heysiyyatı ilə oynayır, onu ələ salır. Görək, xalq budəfəki rəzalətə hansı reaksiyanı verəcək. Heç olmasa, meksikalılar kimi bir milyon insanımız küçələrə çıxacaqmı? Özündənrazı hakimiyyətə hamılıqla “DUR!”, bahalaşmaya “YOX!” deyəcəyikmi? Nəhayət, monqollar kimi həddini aşmış hakimiyyəti yerində oturdacağıqmı?

ELEKTRİK ENERJİSİNİN MAYA DƏYƏRİ ŞİŞİRDİLİR

2007-02-04T12:31:00.000+04:00

Hər kilovatt üçün Avropada 180, Azərbaycanda isə 370 qram mazut “işlədilir”

04.02.2007. Milli Məclisin yaz sessiyasının ilk günündə millət vəkili İqbal Ağazadə son qiymət artımı ilə bağlı maraqlı fikirlərlə çıxış edib. Əsasən elektrik enerjisinin qiymətindəki artımın başadüşülən olmadığını deyən İ.Ağazadə bildirib ki, Azərbaycanda bu məhsulun alınmasında həddən artıq çox mazut istifadə olunur.“Dünya standartlarından, dünya bazarına yaxınlaşmadan daha çox danışan millət vəkilləri niyə unudurlar ki, dünyada bir kilovatt elektrik enerjisinin istehsalı üçün 180 qram, Azərbaycanda isə “Azərenerji” 400 qram mazut yandırır? Niyə bu rəqəmləri dünya standartlarına uyğunlaşdırmaq barədə düşünmürük? Niyə enerjinin alınması üçün bu qədər itkiyə yol verilməlidir və hökümət “maya dəyəri yüksəkdir” deyib bunu əhalidən çıxmalıdır?”“Azərenerji” ilə əlaqə saxlayıb rəqəmlərin nə qədər doğru olduğu və nə üçün bu qədər israfçılığa yol verildiyi ilə maraqlandıq. Qurumun mətbuat xidmətinin rəhbəri Aqşin Kazımzadə suallarımızı belə cavablandırdı: “Bunu İ.Ağazadənin özündən soruşmaq lazımdır. O deyibsə, yəqin ki, düzdür. İqbal Ağazadə millət vəkilidir, amma mən nə millət vəkiliyəm, nə də hüquqşünas”. A.Kazımzadədən istehsalda qazdan mazuta keçidlə əlaqədar elektrik enerjisinin maya dəyərində nə qədər dəyişiklik olduğunu da soruşduq. Lakin sualımıza konkret cavab ala bilmədik: “Qazı bizə 235 dollara satmaq istəyirdilər, amma mazut özümüzünküdür, sizcə, nə qədər qənaət eləmiş olarıq?! Qazın mazutla əvəzlənməsi nəticəsində, bu prosesdə kifayət qədər qənaət edilir”.“Turan” İnformasiya Agentliyinin eksperti İlham Şaban isə bizimlə söhbətində daha maraqlı məqamlara toxundu. Ekspertin sözlərinə görə, ötən ilin yekunlarına görə, Azərbaycanda bir kilovatt elektrik enerjisinin alınması üçün 369,5 qram mazutun işləndiyi göstərilib. Bununla yanaşı, Əli Bayramlı stansiyasında bu rəqəm 450 qrama bərabər olub: “İnkişaf etmiş Avropa ölkələrində elektrik enerjisinin hər kilovattı üçün həqiqətən də 180 qram mazut işlədilir”. Bəs belə bir vəziyyətin yaranmasına səbəb nədir? İ.Şaban bildirdi ki, bu barədə açıqlamanı hökumət verməlidir. Elektrik enerjisinin istehsalında qazdan mazuta keçidlə bağlı hər hansı mənfəətin əldə edilməsinə gəlincə, ekspertin qənaətincə, bu, o qədər də ağlabatan deyil: “Enerjinin alınmasında qazın verdiyi istilik mazutunkundan çoxdur. Bu baxımdan qazdan istifadə etmək iqtisadi cəhətdən daha səmərəlidir. Hökumət rəsmiləri bunun əksini desələr də, bu, inandırıcı səslənmir”.

BAHALAŞMA İNTİHARLARIN SAYINI ARTIRACAQ

2007-02-04T12:30:00.000+04:00

Səidə Qocamanlı: “Millətin yaşamaq hüququ əlindən alınıb”Məryəm Oruclu: “Əhalidə böyük narazılıq dalğası var”

04.02.2007. Xəbər verdiyimiz kimi, Naxçıvan MR-in Culfa rayonu Bənəniyar kəndində işıqpulunu ödəməyən vətəndaşlar polisin ciddi təzyiqilə üzləşib. Belə ki, kənd sakinlərindən saycağda qeyd olunan enerjinin haqqı yox, 20 manat tələb edilib. Bu məbləği ödəməyənlər isə rayon Əlincə polis bölməsinə gətirilərək, ağaca bağlanıblar və 6 saat soyuq havada saxlanıblar.Bu barədə mətbuata Bənəniyar sakini Eldəniz Məmmədov məlumat verib. E.Məmmədov onu da bildirib ki, onlarla bahəm, bölmədə digər vətəndaşlar da incidiliblər. Məlumat üçün bildirək ki, ölkə qanunvericiliyində kommunal xərcləri ödəməyən və sayğaclara müdaxilə edən vətəndaşlar barəsində müəyyən cəzaların tətbiqi nəzərdə tutulur. Bu yaxınlarda bir sıra qanunlara edilən dəyişikliklərə əsasən, aidiyyəti qurumlar belələri barədə hüquq-mühafizə orqanlarına müraciət edə bilərlər. Lakin heç bir qanunda və beynəlxalq normada vətəndaşın evinə polislə basqın etməyə və insanlara fiziki təzyiq göstərməyə icazə verilmir. Bu arada isə Bakı Şəhər Baş Qaz İstismarı İdarəsindən mətbuata bildirilib ki, hökumətə qazpulunu verməyən və sayğaca özbaşına müdaxilə edən vətəndaşın 6 ilədək azadlıqdan məhrum edilməsi ilə bağlı təkliflər verilib. Ölkənin qaz, enerji sistemində zəruri islahatların başa çatmadığı, qiymətlərin insanların imkanlarından qat-qat yüksək səviyyədə bahalaşdığı bir məqamda bu cür inzibati tədbirlərin görülməsi təbii ki, insan hüquq və azadlıqlarına ziddir. Hüquq müdafiəçisi Səidə Qocamanlının fikrincə, əslində bu hadisələr gözlənilən idi: “Son illərdə hələ həm qazın, həm də digər enerjidaşıyıcılarının qiymətlərinin artırılması ilə bağlı fikirlər səslənəndə biz demişdik ki, bu, Azərbaycan cəmiyyəti, ölkə vətəndaşları üçün faciədir. Artıq biz bunu görürük. Sizin qeyd etdiyiniz məsələlər Tarif Şurasının qiymətartımı ilə bağlı verdiyi qərarın təbii davamıdır”. Hüquq müdafiəçisinin fikrincə, artıq vətəndaşlar vəziyyətin çətinliyinə dözə bilmirlər. Hətta iş o yerə çatıb ki, insanlar intiharlara əl atmaq məcburiyyətində qalıblar: “Azərbaycanda yaşamaq hüququ xalqın əlindən alınıb. Naxçıvanda baş verənlər bu siyasətin davamıdır. Onu da deyim ki, təxminən may ayınadək ölkə vətəndaşları bu ağır yükü daha çox hiss edəcəklər. Bu artımın qarşısında əməkhaqlarının, pensiyaların cüzi qaldırılması problemin həlli demək deyil. Kommunal xərclərin artırılması avtomatik olaraq bütün sahələrdə bahalaşmaya səbəb olub”. Qeyd edək ki, bu günə qədər hüquq müdafiəçiləri siyasi hüquqlardan, sərbəst toplaşmaq azadlığından, söz azadlığından danışırdısa, indi sosial hüquqların pozulması halları önə çıxıb: “2006-cı il total surətdə söz azadlığının pozulması kimi ölkə tarixinə yazıldı, amma artıq bizim ən böyük narahatçılığımız sosial hüquqların pozulmasındandır. Bu da ona görə baş verir ki, Azərbaycan cəmiyyəti susur. Nə qədər ki, bu susqunluq olacaq, insanlar vəziyyətə baş əyəcəklər, bu, baş verəcək və Bənəniyar kəndindəki olay bütün regionlarda təkrarlanacaq”. O ki qaldı 6 illik cəza təklifinə, Səidə xanım bildirdi ki, Azərbaycan qanunları qarşısında hamı eyni dərəcədə cavabdehdir: “Heç kimə sirr deyil ki, elə artıq xətlər çəkən, enerjini, qazı oğurlayanlar mənsəb sahibləridir. Sadə vətəndaşlar bunu etmirlər, çünki balaca bir mənzildə yaşayır, onun nə imkanı, nə də ehtiyacı yoxdur nəyisə oğurlamağa. Amma çox təəssüf ki, əsl oğrular, bu oğurluğun səbəbinə oliqarxlaşanlar qanun qarşısında cavab verməyəcəklər. Zaman göstərib ki, onlar pul müqabilində cəzadan qaçır, sadə vətəndaşlar qalır ortada. Bu qanun imarətləri, villaları səpələnmiş şəxslərə tətbiq edilməlidir, çünki onların oğurladıqları bu xalqın cibindən gedir. Azərbaycan xalqı faciə ilə üz-üzədir, bir millət kimi mövcudluğuna təhlükə var”.Müsavat başqanının müavini Məryəm Oruclu da adamlara qarşı bu cür inzibati tədbirlərdən istifadə edilməsini insanlıqdan uzaq hərəkət sayır: “Hamı bilir ki, istər qiymət bahalaşmasından əvvəl, istərsə də sonra insanlar məcbur olurlar sayğaclara müdaxilə etməyə, başqa yollara əl atmağa. Çünki maddi vəziyyət onları buna vadar edir. Vətəndaşlar heç olmasa minimum yaşayış səviyyəsilə təmin olunmayıblar. Son qiymət artımının müqabilində insanların alacaqlarına edilən cüzi artımlar heç nəyi önləmir. O ki qaldı 6 illik cəzanı nəzərdə tutan təkliflərə, xatırlayırsınızsa, bundan əvvəl Milli Məclisdə buna oxşar qanun qəbul olunmuşdu. Həmin qanunda qanunsuz xəttə qoşulan insanlar üçün 3 ilə qədər cəza və cərimə nəzərdə tutulurdu. Mənə elə gəlir ki, bu, ölkə insanlarının hüquqlarının kütləvi şəkildə pozulmasının təzahürüdür”.Məryəm xanım qeyd etdi ki, bunlarla bahəm, yoxsulluğun səviyyəsinin azalması, insanların güzəranının, yaşayış səviyyəsinin yaxşılaşması ilə bağlı çox yüksək rəqəmlər səsləndirilir: “Adi vətəndaşlar ölkə başçısının dediyi analoqu olmayan iqtisadi inkişafı öz həyatlarında nədənsə hiss eləmirlər. Bir qrup insanlar çox yaxşı, böyük çoxluq isə çox pis yaşayır. İnsanların içərisində böyük bir narazılıq dalğası var. Bu cürə hallar təkcə Naxçıvanda deyil, daha çoxdur və getdikcə də artacaq”.

QİYMƏT ARTIMI MƏNƏVİ QİDAYA DA TƏSİR GÖSTƏRDİ

2007-02-04T12:29:00.000+04:00

Bəzi teatrlarda biletlərin qiyməti tezliklə bahalaşacaq

04.02.2007. Tarif Şurasının enerjidaşıyıcılarının və bəzi kommunal xidmətlərin qiymətlərinin qaldırılması ilə bağlı qərarı başqa sahələrə olduğu kimi, mədəniyyət ocaqlarının fəaliyyətinə də təsirsiz ötüşməyəcək. Artıq bu proses teatrların işində özünü göstərməyə başlayıb. Mədəniyyət ocaqlarında biletlərin qiymətinin dəyişib-dəyişməyəcəyi ilə maraqlananda bunun şahidi olduq.Müslüm Maqomayev adına Filarmoniyadan verilən məlumata görə, orada biletlərin qiymətində artım yanvardan sonra baş verəcək. Ancaq onu da bildirək ki, Filarmoniyada biletlərin qiymətlərinin qaldırılmasını mədəniyyət ocağının rəhbərliyi yox, burada konserti təşkil edən qurum həyata keçirəcək. Qiymət artımı Musiqili Komediya Teatrından da yan keçməyəcək. Teatrda əvvəllər biletlər 1-2 manata satılırdısa, artıq buradakı tamaşaları izləmək istəyənlər 3-5 manat ödəməli olacaqlar. Akademik Milli Dram Teatrında hələlik biletlərin qiymətinin bahalaşması gözlənilmir. Teatrın bilet təsərrüfatı üzrə direktor müavini Natiq Gülməmmədovun sözlərinə görə, burada biletlərin qiyməti əvvəlki kimi 3-6 manat arasında dəyişəcək."İbRus" Teatrında hazırda biletlər həmişəki kimi 4 manata olsa da, qiymət dəyişikliyi ilə bağlı məsləhətləşmələrə start verilib. İrəvan Teatrının rəhbəri İftixar Piriyev isə biletlərdəki qiymətlərin artırılması ilə bağlı hələ heç bir tapşırıq almadıqlarını söylədi."Yuğ" Teatrının rəhbəri Vaqif İbrahimoğlu məsələ ilə bağlı Mədəniyyət və Turizm Nazirliyinin qərarını gözləyir: "Müvafiq qərar qəbul olunduqdan sonra, ola bilsin, bizdə də biletlərin qiyməti qaldırılacaq".Opera və Balet Teatrının mətbuat xidmətinin əməkdaşı Şükufə Ağamirzəyevadan aldığımız məlumata görə, bu mədəniyyət ocağının biletlərinin qiymətində artım gözlənilir: "Bu ayın sonunda teatrda biletlər 8 manata qaldırılacaq. Hazırda isə biletlər hələ ki 6 manata satılır. Qeyd edim ki, bəzi insanlar qiymət artımının teatrlara heç bir dəxli olmadığını iddia edirlər. Ancaq nəzərə alınmalıdır ki, teatrda da otaqları qızdırmaq, tamaşalar zamanı səhnəni işıqlandırmaq üçün elektrik enerjisindən istifadə olunur. Eyni zamanda, biz afişalar hazırlanması və reklamlar üçün də pul ödəyirik. Artıq bu qiymətlərdə də artım müşahidə edilib. Bu da bizim işimizə təsirsiz ötüşməyəcək".Qeyd edək ki, kinoteatrlarda hələlik qiymət artımı müşahidə olunmur. "Azərbaycan" və "Nizami" kinoteatrlarında biletlərin qiyməti nümayiş olunan filmin səviyyəsindən asılıdır. Bu baxımdan qiymətlər "Azərbaycan" kinoteatrında 6-8 manat, "Nizami" kinoteatrında isə 60 qəpikdir. Amma işləri enerji sərfiyyatı təməlində qurulan kinoteatrlar da yəqin ki, bir müddətdən sonra qiymət siyasətinə yenidən baxmalı olacaqlar.Beləliklə, maddi qidaya indən belə daha çox pul xərcləməyə məhkum edilən Azərbaycan vətəndaşları üçün mənəvi qidanın da qiyməti bahalaşır. Artıq "çörək" (yəni qida) də bahalaşır, tamaşa da. Bu halda əhalinin bir qismi təbii ki, "çörəyə" üstünlük verməyə başlayacaq. Onsuz da anşlaqa tək-tük hallarda rast gəlinən Azərbaycan teatrları indən belə lap "boşala" bilərlər. Bundan isə nə əhali, nə də Azərbaycan mədəniyyəti uda bilər...

Milli Məclisdə qalmaqal baş verib

2007-02-01T20:20:00.000+04:00

01.02.2007. Bu gün Milli Məclisin yaz sessiyası öz işinə başlayıb. APA-nın məlumatına görə, sessiyanın ilk iclasında Tarif Şurasının enerji daşıyıcılarının qiymətinin artırılması ilə bağlı 6 yanvar tarixli qərarı əsas müzakirə mövzusu olub. Hakim Yeni Azərbaycan Partiyasını təmsil edən deputatlar çıxış edərək, bu qərarı ölkədəki iqtisadi inkişafın və əhalinin rifah halının yüksəlməsinin göstəricisi kimi qiymətləndiriblər. Deputat Cəmil Həsənli isə qiymətlərin artırılmasını tənqid edib. Müsavat deputat qrupunun üzvü Pənah Hüseyn söz istəsə də, çıxış edə bilməyib. Spiker Oqtay Əsədov cari məsələlər üçün ayrılmış vaxtın bitdiyini elan edib. Bundan sonra P. Hüseyn iki dəfə tribunaya yaxınlaşaraq söz istəyib və spikeri deputatlara əvvəldən hazırlanmış siyahı üzrə söz verməkdə günahlandırıb.

"Yeni Müsavat" Ramiz Mehdiyevi Mələk elan etdi

2007-02-01T11:19:00.000+04:00

01.02.2007.Yeni Müsavatın bu günkü sayında rüsvayçı bir yazı çıxıb. Yazının başlığı belədir: "RAMİZ MEHDİYEV VƏZİFƏDƏN GETSƏ, NƏ BAŞ VERƏR?"

Başlığın ardınca isə Rauf Arifoğlu öz fikrini "anonim rəyçi" adıyla sırımağa başlayıb: “İynə vuranlardan, kokain iyləyənlərdən, psixopatlardan biri gəlib oturacaq onun postunda...”

Amma həyasızlıq bununla da bitmir. Yazının təkcə son abzasına diqqət yetirmək kifayyətdir ki, Rauf Arifoğlunun və "Yeni Müsavat"ın iç üzünü anlayasan: "“Ramiz Mehdiyev totalitar təfəkkür daşıyıcısı olsa da, sistem və dövlət tərbiyəsi görmüş azsaylı kadrlardandır. O getsə iynə vuranlardan, kokain iyləyənlərdən, psixopatlardan biri gəlib oturacaq həmin yerdə və durum daha da acınacaqlı olacaq. İnanın ki, rejim daxilində belələri az deyil və onlara baxanda “Kardinal” Mehdiyev mələk kimi bir şeydir...”

Bununla da uzun müddətdən bəri ortalıqda dolaşan qeyri-rəsmi söz-söhbətlər öz təsdiqini tapdı: Rauf Arifoğlu artıq Müsavata və İsa Qəmbərə deyil, Ramiz Mehdiyev-Ramil Usubov cütlüyünə xidmət edir. Qeyd edək ki, daxili işlər nazirinin də Rauf Arifoğluna CEEP markalı avtomobil (70 min dollar dəyərində) bağışladığı bildirilir.

Əlavə olaraq sizə Ramiz Mehdiyevin satın aldığı digər qəzetlərin də siyahısını təqdim edirik:

1. "Bakı-Xəbər"

2. "Azadlıq"

3. "Hürriyət"

QƏRBİ AZƏRBAYCANLILAR DA QİYMƏT ARTIMINA “YOX” DEYİR

2007-02-01T11:18:00.000+04:00

“Qayıdış” birliyi ermənistanlı qaçqınların imtiyazlarının bərpasını istəyir

01.02.2007. Tarif Şurasının enerjidaşıyıcılarının qiymətlərini və gediş haqlarını artırması Qərbi Azərbaycana (Ermənistana) “Qayıdış” birliyinin də kəskin etirazına səbəb olub. Qurumun Ali Məclisinin sonuncu toplantısında bəyan olunub ki, bu qərar Ermənistan qaçqınlarının həyat səviyyəsinə kəskin təsir göstərib.Toplantıda hökumətin Ermənistan qaçqınlarının güzəşt və imtiyazlarının bərpa etməməsi sərt şəkildə pislənilib. Qurum üzvləri bunu Ermənistan qaçqınlarına qarşı ayrı-seçkilik və ədalətsizliyin əlaməti kimi qiymətləndiriblər. Eyni zamanda qaçqınların statusu və güzəştlərinin bərpası üçün gələcəkdə atılacaq addımlar müzakirə olunub. Bu zaman hökumətə sual ünvanlanıb: “Əgər Azərbaycanda Ermənistandan qaçqın yoxdursa, Azərbaycan tərəfi Ermənistana hansı iddialar irəli sürə bilər?”Qeyd edək ki, dünənki toplantıda birliyin fəaliyyətinin daha da gücləndirilməsi ilə bağlı addımlar atılıb. Təşkilatın Ali Məclisi formalaşıb və Faiq Həsənli quruma sədr seçilib.

Şimal bölgəsi işıqsız qalıb

2007-02-01T11:17:00.000+04:00

01.02.2007. Yanvarın 30-dan 31-nə keçən gecə şimal bölgəsində hava şəraiti kəskin pisləşib. Bölgəyə sulu qar və qar yağıb. Quba və Qusar rayonlarının dağlıq ərazilərində qar daha intensiv yağıb. Nəticədə bir sıra yaşayış məntəqələrinə elektrik enerjisinin verilməsində böyük fasilələr yaranıb. Qusarın Şirvanovka, Zeyxur, Qubanın Rustov, Püstə-Qasım, Barlı, Amsar, Xaçmazın Seyidlər, Aşağı Zeyid, Çinartala, Qıraqlı və digər kəndlərinə elektrik enerjisinin ötürülməsindəki fasilələr artıb. Eyni zamanda əhaliyə verilən təbii qazın həcmi də əvvəlki günlərə nisbətən azalıb. Bölgə rəsmiləri isə APA-ya bildiriblər ki, kəskin hava şəraiti ilə bağlı bəzi yaşayış məntəqələrində müvəqqəti problemlər yaransa da, bunlar operativ şəkildə aradan qaldırılır

CƏLİLABADDA ETİRAZ AKSİYASI

2007-01-30T17:58:00.000+04:00

30.01.2007. Tarif Şurasının qərarına etiraz olaraq bölgələrdə aksiyalar davam etməkdədir. Nöbəti belə aksiya Cəliliabad rayonunda keçirilib. Azərbaycan Yolu Siyasi Hərəkatının Cəlilabad rayon təşkilatının yanvarın 30-da saat 12:00-da keçirdiyi aksiyaya 40-a yaxın insan qatılıb.
Rayonun «Mərkəzi Park» deyilən ərazsində baş tutan etiraz piketində iştirakçılar «Qiymətlər əvvəlki həddinə qaytarılsın», «Bahalaşmaya son qoyulsun» şüarları səsləndiriblər və iqtidarın səriştəsiz siyasəti nəticəsində ölkənin ağır sosial-iqtisadi fəlakətə yuvarlandığını bildiriblər. Polisin etiraz piketini dağıtmasına baxmayaraq, AYSH Cəlilabad rayon təşkilatının üzvləri aksiyaya qoşulan yerli sakinlərə müraciətlər paylayıblar. Müraciətdə prezidentin mövcüd fərmanı ilə fevralın 1-dən etibarən maaşların 25 faiz qaldırılmasının bahlaşma qarşısında çox az olduğu və əhalinin yoxsul təbəqəsinin vəziyyətinin daha da ağırlaşdığı qeyd olunub. Sənəd də regionlarada işsizliyin baş alıb getdiyi və əhalinin hətta günəmuzd iş tapa bilmədiklərinə görə ölkəni tərk etmək məcburiyyətində qaldığı bildirilib. Müraciət müəllifləri yoxsul əhalini öz taleylərinə biganə qalamamağa və etiraz səsini ucultmatı çağırıblar.

Hardasan, ay Məşədi Kazım...

2007-01-30T17:57:00.000+04:00

Elçin AKSİYAner

elchin_aze@yahoo.com

30.01.2007. Vallah Alı Mustafayevin sözü olmasın, hər dəfə hökumətimizin və ya Milli Məclisimizin bu cür qərarlarından sonra “Dəli bir ağlamaq keçir könlümdən”, özü də millətin halına. Nə deyəsən vallah, adamın təpəsindən tüstü çıxır. Nə eksperiment gəldi edirlər də bu cammatın üstündə. A balam, “dözümlü xalq” olanda nə olar, daha milləti bu qədər minməzlər ki. Başa düşmək olmur ki, ayının dostusuz ya meşənin. İşiniz-gücünüz deyəsən elə Azərbaycanla Avropa ölkələri və ABŞ arasında özünüzə sərf eləyən şəkildə qiymət müqayisəsi aparmaqdır. Elə bil ki, bütöv bir ölkənin yox, sadəcə özünüzün dar bir dairənizin taleyinə təsir edən qərar verirsiniz.
Bəs niyə “addımınızı” adam kimi izah edə bilmirsiniz. “Maaşların artımı”, “Qiymətlərin standartlara uyğunlaşdırılması”, “Beynəlxalq qurumların tələbləri” və s kimi boş və məntiqsiz fikirlərlə guya sualın altından çıxırsınız. Mən ölüm bəsdirin də, heç olmasa belə cəfəngiyatı danışıb biabır olmaqdansa, “müəmmalı və ağıllı” görsənmək xətrinə susun. Danışdıqları sözə bax. “Maaşlar da artırıldığından düşünürəm ki, bu əhalinin vəziyyətinə mənfi təsir göstərməyəcək”. Ayə, sənin nə xəbərin var axı əhalinin vəziyyətindən, guya heç bir dəfə də ağız dolusu bütün sitatlarda işlətdiyin “xalq”ın vəziyyəti ilə maraqlanmısan? Amma elə danışırsan ki, elə bil hər şeyi “əlinlə qoymusan”.
Deyirəm bəlkə birdəfəlik məqsədinizin nə olduğunu deyəsiniz? Əgər millətin orta və aşağı təbəqəsini qırıb yox etmək istəyirsinizsə, açıq bildirin. Bəlkə sizə alternativ və daha tez başa gələn bir yol dedik. Məsələn, müharibəni başlayın. Onsuz da nə siz, nə də sizin kimilər gedib döyüşməyəcək ki? Döyüşən yenə də bu zavallı xalq və kasıb kütlə olacaq. Təsəllimiz də o olar ki, vətənimizdə yoxsulluqdan və acından ölmədik, əvəzinə torpaqlarımız uğrunda vuruşaraq şəhid olduq. Deməyin ki, bunun “bizə” nə xeyri, siz də bizim hesabımıza rütbə, fəxri ad, orden-medal zad alarsınız. Bir bu variantı da nəzərdən keçirin.
Qalırsan bir tərəfə ki, milləti qınayasan ya onun ziyalı, oxumuş, dünyadan xəbəri olan nümayəndələrini. Başımıza açılan oyunlara nə vaxta qədər “sakit, təmkinli, mağmın, məzlum, zavallı, öz işimizdə” reaksiya verəcəyik. Niyə axı səsimizi çıxararaq, bir-birimizi dəstəkləyərək, “var” olduğumuzu bildirərək haqqımızı tələb etmirik. Əslində cavab sadədir, bacarmırıq, qorxuruq, “ac qarnım dinc qulağım” kimi “dərin mənalı” atalar sözləri ilə böyümüşük axı. Niyə həmişə olduğu kimi yaşlı nəsil bir ziyalı, bir böyük olaraq “qabağa düşmür”, camaatı hərəkətə gətirmir. Çünki deyir ki, mənim ömrümə bir şey qalmayıb onsuz da, birtəhər, sakit başa vurmaq istəyirəm, artıq o yaşım deyil (guya “o yaşlarında” dağı dağ üstə qoyub). Niyə orta yaşlı nəsil dillənmir. “Ailəm var, uşağım var, işdən çıxararlar”, haqlıdır, əməlli başlı arqumenti var. Bəs bizim “enerjili gənclər”, onlar hanı? Bu saat deyim, yarısına evdən çıxan kimi “aman bala heç kimə qoşulma, heç nəyə qarışma, səsivi kəs, başıvı sal aşağı, səhər get, axşam qayıt” tövsiyəsi verilir. Bir hissəsi düşünür ki, mən etiraz eləsəm inanmıram ki, kütlə də mənə qoşula, sonda çanaq başımda çatlayacaq, universitetdən qovularaq əziyyətlərim hədər gedəcək, üstəlik də ata-anamın qarğışına tuş gələcəm. Düzdür elə savadlı və şəxsiyyətli gənclər var ki, bəzən hansısa sivil şəkildə aksiya keçirmək istəyirlər. Amma nə fayda, qardaş, bunlar sivil yol nə bilir, sivilizasiyadan nə anlayırlar ki, hələ bir təsiri də olsun. Onlarla yalnız öz dillərində danışmaq lazımdır.
Elə bilməyin ki, ümumi danışıb “söz kimə aiddir götürəcək” deyirəm. Xeyr, sözlərim bütün hökumət nümayəndələri və məmurlara aiddir. Deyin görüm, sizdə heçmi zavallı millətinizə qarşı bir sevgi demirəm, o şübhəsiz ki yoxdur, heç olmasa yazığınız da gəlmir. Nə olar ki, arada bir belə “parlaq” fikirlərlə çıxış edib, “sosial yönümlü” qərarlar verəndə xalqın halını da fikirləşəsiniz. Ümummilli liderimiz sizə deyib axı “xalq dövlət üçün yox, dövlət xalq üçün olmalıdır”. Yoxsa sizin zamanınızda artıq bu kəlam öz qüvvəsini itirib?
Amma sevinirəm ki, xalq nə cür məhrumiyyətlərlə üz-üzə gəlsə də yumor hissini itirmir. Dünən dayanacağa tərəf gələndə gördüm bir qoca qarı dayanıb rəhmətlik Heydər Əlyevin şəkli olan lövhənin qrşısında, ona baxır və nəsə deyir. Maraqla qulağımı ona tərəf tutanda eynən bu sözləri eşitdim. “Hardasan ay Heydər baba, gör sənin millətivi nə günə qoyurlar”.

Asılan Səddamdır, yoxsa oxşarı?

2007-01-29T17:50:00.000+04:00

Gerçək İraq diktatorunun 1993-1997-ci illər arasında öldüyünə dair məlumatlar yayılıb

29.01.2008. Yola saldığımız həftə internetdə İraq diktatoru Səddam Hüseynin edamı ilə bağlı maraqlı məlumatlar yayılıb. Anonim mənbədən dünyanın bir çox ölkələrinə göndərilən həmin məlumatlarda ötən ilin 30 dekabrında asılan Səddamın gerçək İraq diktatoru deyil, onun dublyorunun olduğu iddia edilir.

Səddam tutulmayıbmış?

Məlumatları yayan mənbə ümumiyyətlə, İraq diktatorunun həbsini inkar edir, onun tutulması barədə videogörüntülərin həqiqiliyini şübhə altına alır və bunu Buş administrasiyasının hazırladığı ssenari əsasında çəkilmiş klip adlandırır: «Səddamın ələ keçirilməsini əks etdirən videogörüntülərdə saralmış xurmalar, qurudulmuş ət və meyvələr gözə dəyir. Nəzərə alsaq ki, sabiq İraq lideri həbs ediləndə dekabr ayı idi, bu ölkədə isə qurutma işləri may-iyul aylarında aparılır, dekabrda isə saralmış xurma heç vaxt ola bilməz, onda həmin lentin qondarma olduğu üzə çıxar».
Mənbə iddia edir ki, əslində həbs edilən əsl Səddam yox, onun dublyoru olub. Tarixdə oxşarları olan siyasi liderlərin siyahısı kifayət qədər genişdir: Çində Mao, SSRİ-də Stalin, Kubada Kastro, İngiltərədə Çörçill… Maraqlıdır ki, Səddamla yanaşı, mərhum oğlu Udayın da bənzəri var. Bu dublyorun ad və soyadı da məlumdur: Latif Yəhya. Araşdırmaçılar Səddamın öjzünün üç oxşarının olduğunu iddia edir.

Asılan Səddamdır, yoxsa…

Anonim mənbənin İnternet vasitəsilə yaydığı məlumatda bildirilir: «Alman əsilli tibb elmləri doktoru Dieter Buhman apardığı araşdırmalar nəticəsində keçmiş İraq diktatorunun ən azı 3 oxşarının olduğunu müəyyənləşdirib. Bunun üçün o, minlərcə fotoqrafdan və 30-a yaxın videogörüntünü incələyib. Bundan başqa, alman televiziyalarından biri Avropada yaşayan keçmiş İraq xüsusi xidmət orqanları əməkdaşına istinədən, 1998-ci ildən sonra Səddam Hüseyn adına yayımlanan video və foto görüntülərdəki şəxsin əslində keçmiş İraq liderinin dublyoru olduğunu elan edib».
Təxminən 25 il ərzində Səddamı araşdıran qulaq, burun və boğaz üzrə tanınmış iranlı uzman Muhammed Esasidi isə bildirib ki, 1999-cu ilədək diktatorun görüntülərində qulaq quruluşu və sifət cizgiləri sabit olub, amma həmin tarixdən sonra Səddamın qulaq quruluşunda ani dəyişikliklər müşaiyət edilməyə başlayıb. Esasidi 2003-cü il martın 3-də Hollandiya telekanallarına verdiyi müsahibədə 1999-cu ildən sonra mediada göstərilən «Səddam Hüseyn»-in əslində Mixail Ramazan adlı dublyor olduğunu deyib. Mixail Ramazan 19 il İraq diktatorunun dublyorluğunu yapıb. M. Ramazan sonradan yazdığı ikicildlik kitabda İran-İraq savaşı zamanı rəsmi Tehranın Səddamın dublyorlarından birini öldürtdüyünü açıqlayıb.

İraqı 6 il başqa Səddam idarə edib?

Ən maraqlı məqamlardan biri isə budur ki, İraqın özündə 1997-ci ildən başlayaraq, ölkəni Səddamın oxşarlarından birinin idarə etdiyinə dair şübhələr dolaşır. Sadə xalq arasındakı şaiyələrə görə, 6 il ərzində İraqı Səddamın Qasım əl-Əli adlı dublyoru yönədib. Bununla mütəxəssislər də razıdır. Onlar sübut kimi, gerçək diktatorun şivəsini və danışıq tonunun fərqliliyini göstərirlər. Əsl Səddamın danışdığı ərəbcə İraq xalqının Bağdad və Tiqrit bölgəsində yaşayan kəsiminin şivəsidir. Amma 1997-ci ildən sonrakı «Səddam» qəfildən ölkənin güney kəsiminin (Bəsrə) şivəsində danışmağa başlayıb. Yəni istənilən halda 1997-ci ildən sonra İraq liderinin qiyafəsində ekranlara çıxarılan şəxs əsl Səddam Hüseyn deyildi.
1990-cı ildəki Küveyt savaşının ardınca Avropaya mühacirət edən bir yerli həkimin sözlərinə görə, İran-İraq müharibəsindən sonra Səddam Hüseyn xərçəngə düçar olub: «Mən mühacirət edəndə o, yataqda yaşam mücadiləsi verirdi. 1991-ci ildən sonra gerçək Səddamı heç kim media qarşısında görməyib. Böyük ehtimalla o, artıq ölmüşdü».

Əsl Səddamın dublyorundan 6 fərqi

Aparılan müqayisələr sonucu gəlinən qənaət ondan ibarətdir ki, gerçək Səddamın oxşarlarından 6 görünüş fərqi var ki, bunu ayırd etmək üçün azacıq diqqətli olmaq kifayət edir. Bunlar aşağıdakılardır:

1. Əsl Səddamın saçı oxşarınkından daha seyrək, daha sərt və qıvırcıqdır.
2. Əsl Səddamın qulağı daha kiçikdir.
3. Əsl Səddamın sifətinin sol hissəsində xal yoxdur.
4. Əsl Səddamın burnu oxşarınkından xeyli balacadır.
5. Əsl Səddamın çənəsində çüxur var. Alt dodağı isə daha böyük və önə doğru çıxmış şəkildədir.
6. Əsl Səddamın alın cizgiləri qabarıqdır və dublyoru ilə müqayisəyə gəlmir.

Bütün bunlardan sonra, anonim mənbə əminliklə bildirir ki, İraq hökumətinin barəsində edam qərarı çıxardığı və asdığı şəxs əslində gerçək Səddam Hüseyn olmayıb, əslində onun dublyorlarından biridir. Hələlik internetdə geniş yayılmış bu iddialara İraq hökuməti və bu ölkədəki ABŞ qoşunları komandanlığı aydınlıq gətirməyib.

Xalq Müsavatın mitinqinə niyə dəstək vermədi?

2007-01-28T22:10:00.000+04:00

AKSİYAner

28.01.2007

Sadəcə, səbəblərdən bir neçəsi:

1. Mitinq gec keçirildi. Buna qədər artıq ehtiraslar soyumuş, elə İsa Qəmbərin mətbuata verdiyi müsahibə dediyi kimi, «hakimiyyət də müəyyən önləyici addımlar atmışdı».
2. Mtinqin səbəbləri qədərindən artıq aydın izah edilməmiş, əksinə, bilərəkdənmi, bilməyərəkdənmi, bu səbəblər xeyli dolaşıq və qaranlıq izah olunurdu. İsa Qəmbərdən sitat: «Mitinqə qoşulmaqla xalq qarşıdan gözlənilən növbəti bahalaşma dalğasının qarşısını ala bilər…» Bu, o demək idi ki, başqan artıq bahalaşmanın ilk dalğası ilə psixoloji baxımdan barışmışdı və mitinqin hökümətin qərarına təsir edə biləcəyinə inanmırdı. Bu inamsızlıq narazı kütləyə də sızdı.
3. Müsavat başqanı mitinq «siyasi yox, sosial etiraz aksiyasıdır» deməklə, praktiki olaraq hakimiyyətdən narazı olan siyasi çoxluğu tərəddüd qarşısında qoydu.
4. Ən əsası, Müsavat yenə də ənənvəi etiraz yolunu- mitinq taktikasını seçmişdi. 88-dən üzü bəri yeri gəldi-gəlmədi kullanılan bu taktika artıq bıkdırıcı xarakter almağa başlayıb…

BU GÜN MİTİNQDİR

2007-01-28T15:58:00.000+04:00

Bahalaşma əleyhinə hərəkat başlandı

Aksiya saat 16-dan 18-dək metronun Həzi Aslanov stansiyası Ukrayna meydanı marşrutu üzrə keçiriləcək

28.01.2007.Bu gün Müsavat Partiyası “Enerjidaşıyıcılarının və kommunal xidmətlərin qiymətlərinin artırılması qərarının icrası dayandırılsın!” şüarıyla yürüş-mitinq keçirəcək. Aksiya saat 16-dan 18-dək davam edəcək. Metronun Həzi Aslanov stansiyasından Ukrayna meydanınadək yürüş keçiriləcək və elə həmin meydanda mitinq baş tutacaq. Aksiyanın keçirilməsi hakimiyyətlə razılaşdırılıb. Dünən Mitinq Komitəsinin üzvləri aksiyanın keçiriləcəyi meydana baxış keçiriblər. Müsavatın Mərkəzi İcra Aparatının rəhbəri Arif Hacılı bildirib ki, bu marşrutla bağlı bəzi texniki problemlər mövcud olsa da, partiya bunları yoluna qoymağa çalışıb.“Bu ərazidə ilk dəfədir ki, yürüş-mitinq keçirilir. Ora elektrikin çəkilməsi, tribunanın qurulması ilə bağlı müəyyən çətinliklər var. Amma biz bütün bunları yoluna qoymağa çalışıb, təşkilati-texniki tədbirlər həyata keçiririk. Eyni zamanda partiyanın strukturlarında da aksiya ilə bağlı hazırlıq işləri davam edir. Artıq yürüş-mitinqin şüarlarının, plakatlarının hazırlanması prosesi başa çatıb. Əhali arasında təbliğat işləri davam etdirilir. Müsavatçılar, xüsusən də partiyanın Gənclər Təşkilatının üzvləri paytaxtda, ən çox da Ukrayna dairəsinə yaxın olan yaşayış massivlərində təbliğat-informasiya işləri aparıblar. Çünki əhalinin xeyli hissəsinin aksiyanın keçirlməsi, onun yeri, vaxtı barədə məlumatı yoxdur. Televiziya kanallarının bu məsələlərdə bizi informasiya blokadasına alması təbii ki, müəyyən çətinliklər yaradır. Ona görə də şifahi qaydada bu problemi həll etməyə çalışırıq”.Aksiya ilə bağlı müxtəlif təbliğat vasitələrindən istifadə olunub. Vətəndaşların mobil telefonlarına yürüş-mitinqə çağırış mesajları göndərilib, evlərə vərəqələr paylanıb. Hətta Müsavatçılar Bakı Şəhər İcra Hakimiyyətinin partiyanın aksiyasına verdiyi razılıq məktubunu da çoxaldaraq, vərəqələr şəklində Bakı sakinlərinə paylayıblar: “Biz hesab elədik ki, insanların vəziyyət barədə daha dəqiq məlumatının olması üçün bu vacibdir. Çünki əvvəlki aksiyalarda hakimiyyətin rəvac verdiyi zorakılıqlar əhali arasında müəyyən narahatlıqlar yaradıb. Ona görə də biz həm də bu yolla vətəndaşlarımıza çatdırmaq istəyirik ki, biz razılaşdırılmış aksiya keçiririk və bugünkü yürüş-mitinqdə hər hansı zorakılıq hərəkətləri olmayacaq”.Xatırladaq ki, Müsavat bu gün keçirəcəyi aksiya ilə bağlı ölkədə fəaliyyət göstərən digər qüvvələrə də birgə kütləvi tədbirin keçirilməsini təklif edib. Srağagün Müsavat başqanı İsa Qəmbər keçirdiyi mətbuat konfransında bir daha bütün siyasi qüvvələrə, ictimai təşkilatlara müraciət edərək, onları aksiyada fəal iştirak etməyə çağırıb. Müsavatın müraciətini xeyli siyasi partiya müsbət cavablandırıb və aksiyaya dəstək verəcəklərini bəyan ediblər. Ümid Partiyası üzvlərinin və rəhbər strukturlarının aksiyada iştirakı barədə rəsmi qərar verib. Müsavatın müttəfiqi olan siyasi qüvvələrdən Azərbaycan Xalq Partiyası, Cümhuriyyət Xalq Partiyası, Demokratik Sağ Partiyası, Milli Etimad Partiyası, Demokratik Birlik Partiyası, Əhrar Partiyası, Yeni Turan Partiyası, Demokratik Sosialist Xalq Partiyası, Əmək Partiyası da 28 yanvar aksiyasında fəal şəkildə iştirak edəcəklərini bəyan ediblər.ADP üzvlərinin və partiyanın rəhbərliyində təmsil olunan şəxslərin də Müsavatın yürüş-mitinqində iştirakı ilə bağlı razılıq əldə olunub. AMİP isə öz üzvlərinə aksiyada iştirakla bağlı sərbəstlik verib.KAXCP sədri Mirmahmud Mirəlioğlu isə dünən “Yeni Müsavat”a açıqlamasında bildirib ki, partiya üzvləri Müsavatın yürüş-mitinqində iştirak edəcəklər: “Biz yürüş-mitinqin təşkilati işlərində iştirak etmədiyimiz üçün partiya olaraq aksiyaya qatılmaq barədə qərar verməmişik. Amma partiyamızın üzvləri aksiyaya qatılacaqlar”.Müsavatın Mitinq Komitəsi isə qəzet vasitəsilə aksiyaya qatılmaq istəyənlərin nəzərinə aşağıdakı detalları da çatdırır. Məlumatda qeyd olunur ki, Ukrayna meydanı iki metro stansiyasının (Əhmədli və Həzi Aslanov) yaxınlığında yerləşdiyi üçün yürüş-mitinqə metro ilə gəlmək daha sərfəlidir. Yürüşdə iştirak etmək istəyənlər Həzi Aslanov metrosundan çıxmalı, ancaq mitinqdə iştirak etmək istəyənlər isə Əhmədli metrosundan çıxaraq meydana gəlməlidirlər. Həmçinin bildirilir ki, şəhərin əksər nöqtələrindən bu ünvana marşrut avtobusları (169, 242, 215, 104, 275, 247, 247-T, 62, 245, 83, 147, 150, 2 və s. nömrəli) ilə də gəlmək olar.Müsavatın bugünkü aksiya ilə bağlı xalqa müraciətində bildirilir ki, iqtidarın səriştəsiz siyasəti nəticəsində ölkə çox ağır sosial-iqtisadi fəlakət girdabına yuvarlanıb. Belə bir zamanda hər kəs siyasi fəallıq nümunəsi göstərməlidir: “Hakimiyyətin xalqa zidd addımlarına etiraz, müqavimət təşkil olunmasa, vəziyyət getdikcə pisləşəcək. Müsavat bütün vətəndaşları yürüş-mitinqdə iştirak etməyə, hakimiyyətin xalqa zidd olan qərarlarına qarşı etiraz bildirməyə çağırır”.Dünən günün sonunda bu gün keçiriləcək yürüş-mitinqlə bağlı Bakı Şəhər Baş Polis İdarəsinin və Müsavatın Mitinq Komitəsinin rəhbərliyi arasında görüş keçirilib. BŞBPİ-nin rəis müavini Yaşar Əliyev və digər rəhbər şəxslərlə görüşdə Müsavatın Mərkəzi İcra Aparatının sədri Arif Hacılı, Xətai təşkilatının sədri Vidadi Hüseynli və aksiya ilə bağlı müraciət müəlliflərindən biri Şahin Hüseyn iştirak edib. Polis idarəsinin təşəbbüsü ilə baş tutan görüşdə kütləvi tədbirin təhlükəsizliyi və digər məsələlərlə bağlı fikir mübadiləsi aparılıb. A.Hacılı “Yeni Müsavat”a açıqlamasında bildirib ki, BŞBPİ rəhbərliyi ilə bəzi təşkilati-texniki məsələlərlə bağlı razılıq əldə olunub. Belə ki, bu gün saat 15-dən etibarən Xətai Rayon Yol Polisi İdarəsi tərəfindən yürüş keçirilən Məhəmməd Hadi küçəsində və mitinqin keçiriləcəyi Ukrayna meydanına gələn başqa yollarda nəqliyyatın hərəkəti dayandırılacaq. Aksiyanın sərbəst şəkildə baş tutması, hər hansı problem olmaması üçün müvafiq tədbirlər görüləcək. BŞBPİ əməkdaşları ilə aksiya təşəkilatçıları arasında yürüş-mitinqin gedişində hər hansı problem üzə çıxacağı halda, birgə tədbirlər həyata keçirilməsi barədə də razılıq əldə olunub.

NETÇALADA ETİRAZ AKSİYASI

2007-01-28T15:55:00.000+04:00

Yanvarın 26-da Neftçala rayonunda Tarif Şurasının 6 yanvar 2007-ci il tarixli qərarına etiraz piketi keçirilib. Saat 12:00-da Rayon İcra Nümayəndəliyinin qarşısında 40 nəfərin iştirakı ilə keçirilən etiraz piketi Azərbaycan Yolu Siyasi Hərəkatının Neftçala rayon təşkilatının təşkilatçılığı ilə baş tutub.
Aksiya iştirakçıları əhalinin sosial-iqtisadi durumun ağır olduğu bir vaxtda, enerji daşıyıcılarının və kommunal xidmətlərin qiymətlərinin artırılmasına etazlarını bildirərək, qiymət artımında sonra hökumətin gördüyü tədbirlərin yaranmış duruma təsir etməyəcəyini qeyd ediblər. Piket iştirakçıları hökumətdən təxirəsalınmaz tədbirlər görməyi tələb ediblər.
İnsidentsiz ötüşən aksiyanın sonunda qətnamə oxunub. AYSH-nin Neftçala rayon təşkilatının sədri Alik Hümbətov piketin qətnaməsini rayon icra nümayəndəliyinə təqdim edib.
Yanvarın 31-də AYSH-nin Ağstafa rayon təşkilatı da saat 11:00-dan 13:00-a kimi mitin keçirmək məqsədi ilə rayon icra hakimiyyətinə məktubla müraciət edib. Məktubda rayon icra hakimiyyətindən enerji daşıyıcılarının qiymətlərinin bahlaşamasına etiraz olaraq mitinq keçirmək üçün rayonun təklif olunun 3 ərazisindən birində yer ayrılması istənilib. AYSH-nin Ağstafa rayon təşkilatının rəhbərliyi mitinqin kütləviliyinin təmin edilməsi üçün rayonda fəaliyyət göstərən digər siyasi qurumların yerili təşəkilatları ilə məsləhətləşmələr aparılır.

“Azadlıq” blokunun liderlərini polis saxladı

2007-01-26T19:26:00.001+04:00

26.01.2007. BAKI. “Azadlıq” blokuna daxil olan partiyaların üzvləri bu gün Dövlət Əmlakının İdarə Edilməsi üzrə Dövlət Komitəsinin (DƏİEDK) binası qarşısında icazəsiz piket keçirməyə cəhd göstəriblər. APA-nın məlumatına görə, aksiya təyin olunan vaxtdan əvvəl Çevik Polis Alayının və Xətai rayon Polis İdarəsinin əməkdaşları ərazini nəzarətə götürüblər. Aksiyanın təyin olunduğu vaxta blok üzvləri “Bahalaşmaya yox!” şüarı ilə dövlət komitəsinin binasına yaxınlaşmaq istəyiblər. Lakin polislər onların bir hissəsini saxlayıb, digər hissəsini isə ərazidən uzaqlaşdırıb. Azərbaycan Liberal Partiyasının sədr əvəzi Əvəz Temirxan, AXCP funksionerləri Fuad Qəhrəmanlı və Həsən Kərimov polis tərəfindən saxlanıb. Təxminən yarım saat blok üzvləri ayrı-ayrılıqda şüarlar səsləndiriblər.
Bakı şəhər Baş Polis İdarəsinin İctimai Təhlükəsizlik İdarəsinin rəisi Şamil Seyidli jurnalistlərlə söhbətində bildirib ki, aksiya saksiyalaşdırılmadığı üçün qarşısı polis tərəfindən qətiyyətlə alınıb. O, aksiya zamanı 10-15 nəfərin saxlanıldığını və onlarla bağlı məhkəmənin qərar verəcəyini bildirib.

Şəkillərə bax!

«AZADLIQ» BLOKUNUN PİKETİNDƏ TUTULAN və XƏSARƏT ALANLARIN SİYAHISI

2007-01-26T19:20:00.000+04:00

26.01.2007. AXCP mətbuat xidməti «Azadlıq» siyasi blokunun bu gün Dövlət Əmlakının İdarə Edilməsi üzrə Dövlət Komitəsinin binası qarşısında keçirdiyi piket zamanı polisin tutub saxladığı və xəsarət yetirdiyi piketçilərin siyahısını yayıb. Siyahını diqqətinizə çatdırırıq.

Xətai rayon 37-ci polis bölməsində saxlananlar

Fuad Qəhrəmanlı – AXCP Rəyasət Heyətinin üzvü

Xalid Qarayev – AXCP

Hacı Ələsgərov – AXCP

Adil Əliyev – AXCP

Aydın Əliyev – AXCP

Cəmil Hacıyev - AXCP

Fikrət Həsənov – AXCP

Seymur Həziyev – AXCP

Alı İsmayılov – AXCP

Billur Hümbətov – VİP

Orxan Qafarlı – VİP

Əvəz Temirxan - ALP

Mahir Yaqubov – ALP

Xəsarət alanlar

Həsən Kərimov – AXCP sədrinin müavini

Fuad Qəhrəmanlı – AXCP RH üzvü

Şahin Həsənli – AXCP RH üzvü

Qabil Məmmədrzayev – AXCP sədrinin müşaviri

Kərim Mehdiyev - AXCP Sədr Aparatının üzvü

Ramiz Əhədov – AXCP Sədr Aparatının üzvü

Xəlil Xudiyev – AXCP Təşkilat Şöbəsinin əməkdaşı

Vaqif Xalıqov – AXCP Suraxanı RŞ sədri

Aydın Əliyev – AXCP Cəbrayıl RŞ sədri

Elçin Əzizov – AXCP üzvü

Əbülfəz Qurbanlı – AXCP üzvü

Ruslan Tanrıverdiyev – AXCP üzvü

Elçin Həsənov – AXCP üzvü

İslam Hüseynov – AXCP üzvü

Elnur Məmmədov – AXCP üzvü

Xalid Qarayev – AXCP üzvü

Hacı Ələsgərov – AXCP üzvü

Tofiq Kərimov – ALP sədr müavini

Elxan Abbasov – ALP sədr müavini

Fərrux Cəbiyev – ALP İcraiyyə Komitəsinin üzvü

Pərviz Hacıyev - ALP İcraiyyə Komitəsinin üzvü

Tale Əşrəfov - ALP

Tahir Yaqubov – ALP

Məhərrəm Qambayev – ALP

Fəxrəddin Hüseynov – ALP

Tahir Həsənov – ALP

Sadəddin Abdullayev – ALP

Yusif Abdullayev – ALP

Anar Piriyev – ALP

Gənclərə qarşı daha bir ayrı-seçkilik!!!

2007-01-24T16:36:00.000+04:00

Bizi Kamaza yükləyib Xəzərə boşaltmaq lazımdır

AKSİYAner

24.01.2007. İpoteka kreditləşməsinin şərtləri dəyişdi. Prezidentin fərmanına görə, daha çox güzəşti nəzərdə tutan “sosial yönümlü” ipoteka kreditlərindən gənclərdən yalnız idmanşılar bəhrələnə bilər. Yenə idmançılar!
Mənim idmançılara qarşı heç bir qərəzim olmasa da, amma anlaya da bilmirəm- nədən hakimiyyət idmançılara bu qədər stavka edir?
Nədən bu şərtlərdən bir idmançı qədər hansısa uğurlara imza atan bəstəkar, yazıçı, jurnalist və gəncliyin hər hansı digər təbəqəsi bəhrələnə bilməsin? Nədir bunun səbəbi?
Nədən Azərbaycanın gəncliyinin intellektual kəsiminə qarşı, yumşaq desək, bu qədər laqeyd davranılır?
Bəs yaxşı oxuyan ailəli tələbələr?
Bəs ictimain fəaliyyətlə məşğul olub, Azərbaycanın inkişafı üçün tər tökən gənclər?
Bəlkə elə biryolluq hmısını Kamaza yükləyib Xəzərə tökək?
Hakimiyyətin də canı dincəlsin…

«MÜXALİFƏT VAXTINI İSVEÇRƏ KURORTLARINDA KEÇİRMİR»

2007-01-24T11:27:00.000+04:00

İsa Qəmbər bahalaşma qərarının arxasında İlham Əliyevin özünün durduğunu bildirdi

24.01.2007. «Tarif Şurasının qiymət artımı ilə bağlı qərarını dəstəkləməklə İlham Əliyev bu qərarın arxasında özünün durduğunu cəmiyyətə birmənalı olaraq təsdiqləyib».
Müsavat Partiyasının başqanı İsa Qəmbər bunu «Turan»ın müxbirinə söyləyib. O bu qərarla ölkə iqtidarının sosial inkişafla bağlı konsepsiya və proqrama malik olmadığını, ölkədə korrupsiyanı gücləndirməklə məşğul olduğunu göstərib. Əliyevin müxalifətin ünvanına dediyi fikirlərə münasibət ifadə edən İ.Qəmbər dövlət başçısı olan şəxsin çıxışında bu qədər yalan danışmasına təəssüf etdiyini deyib. O, deyib ki, «müxalifət Azərbaycanın uğurlarına sevinir, ağrılarını isə xalqla birgə yaşayır, vaxtını İsveçrə kurortlarında yox, xalqın içində keçirir».
İ.Əliyevin çıxışında müxalifətin fəaliyyətinə yer ayrılması məsələsinə toxunan İ.Qəmbər dövlət başçısının bir tərəfdən müxalifəti zəif saymasını, digər tərəfdənsə ona belə diqqət yetirməsini ziddiyyət adlandırıb. Onun fikrincə, İ.Əliyev xalqın müxalifətin çağırışlarına qoşulacağından ehtiyat edərək yersiz çıxışlar edir və bununla da cəmiyyətə tutduğu mövqeyi aydınlaşdırır, cəmiyyətin qərar qəbul etməsini asanlaşdırır.

İLHAM ƏLİYEV YENƏ AZƏRBAYCANI TƏRK ETDİ

2007-01-24T11:26:00.000+04:00

Gəldi, bahalaşmanı dəstəklədi və qayıtdı

24.01.2007. Azərbaycan prezidenti İlham Əliyev bu gün Davos İqtisadi Forumunda iştirak etmək üçün İsveçrəyə yola düşəcək. Bu barədə «Turan»a Prezidentin İcra Aparatının beynəlxalq əlaqələr şöbəsinin müdiri Novruz Məmmədov bildirib. Onun sözlərinə görə, dövlət başçısının səfəri yanvarın 27-də başa çatacaq. Forum çərçivəsində Azərbaycan prezidentinin bir sıra dövlət və hökumət başçıları ilə görüşləri də nəzərdə tutulur.
Xatırladaq ki, yaxın gələcək üçün İlham Əliyevin yeni xarici səfərləri planlaşdırılır.

MÜXALİFƏT NİYƏ BİRGƏ AKSİYA KEÇİRMİR?

2007-01-24T11:22:00.000+04:00

Əli Kərimli Müsavatla birgə aksiya keçirilməsinin əleyhinə çıxıb

24.01.2007. Enerjidaşıyıcıların qiymətinin artırılmasından sonra «Azadlıq» bloku və Müsavat Partiyası etiraz mitinqləri keçirilməsi barədə qərar verdi. Bu, nə qədər alqışlanası qərar olsa da, ölkənin aparıcı müxalif qüvvələrinin ayrı-ayrılıqda aksiya keçirmək niyyəti təəssüf doğururdu. «Azadlıq» blokunun təmsilçiləri bunun başlıca səbəbini Müsavatın icazəsiz aksiyaların tərəfdarı olmaması ilə izah edirdilər. Müsavat Partiyası isə hakimiyyətin zor tətbiq etməyəcəyinə qarantiya olmadığından tərəfdarlarını icazəsiz aksiyalara çıxarılmayacağını bildirirdi.
Təbii ki, bütün bunlar məsələnin görünən tərəfləridir. Etibarlı mənbədən aldığımız məlumata görə, birgə etiraz aksiyalarının təşkil edilə bilməməsinin əsl səbəbi müxalifət liderlərinin özəl maraqları və ambisiyaları olub. Məsələn, Müsavat rəhbərliyinin icazəsiz aksiyalar keçirməklə partiya üzvlərini və tərəfdarlarını 2008-ci il prezident seçkilərinə qədər zərbə altında qoymaq istəmədiyi bildirilir. «Azadlıq» blokuna gəldikdə isə, mənbənin iddiasına görə, bu qurumun üzvləri birgə aksiya keçirməməklə parlamentə getmək qərarı verdikdən sonra Müsavatın azalan nüfuzunu qaldırmaq yox, onu bir qədər də gözdən salmaq iddiasında olublar. Bu məsələdə Müsavat başqanı İsa Qəmbərin müxalifətin prezidentliyə vahid namizədi olmaq iddiasından geri çəkilməməsi əsas rol oynayıb. Çünki İ.Qəmbər yalnız namizədliyinin dəstəklənməsi iddiasında bulunur və bu iddiasından geri çəkilmək istəmir.
«Azadlıq» bloku daxilində əvvəlcədən aksiya ilə bağlı vahid mövqe olmayıb. Qeyd edək ki, mitinqlə bağlı qərar verilsə də, ADP funksionerləri arasında bununla razılaşmayan və icazəsiz aksiyalara partiya üzvlərinin qatılmayacağını bəyan edənlər də var. Onların ADP sədri Rəsul Quliyevin birbaşa diqtəsi ilə hərəkət etdikləri söylənilir. Mənbənin bildirdiyinə görə, ADP sədri indiki məqamda normal mitinq keçirilərsə AXCP sədri Əli Kərimlinin nüfuzunun artacağını düşünür.
Digər bir məlumata görə, «Azadlıq» blokunun ayrıca mitinq keçirməsi ideyası AXCP sədrinə məxsusdur. Xatırladaq ki, bahalaşmadan dərhal sonra Müsavat mitinq keçirmək istəyində olduğunu bəyan edib və partiya başqanının müavini Arif Hacılı aksiyaların birgə keçirilməsi üçün «Azadlıq» bloku ilə müzakirələrə başlayıb. O, öncə ADP sədrinin I müavini Sərdar Cəlaloğlu ilə görüşüb. S.Cəlaloğlu A.Hacılıya konkret bir söz deyə bilməyəcəyini, birgə mitinqlə bağlı məsələnin blokun Sədrlər Şurasında müzakirəyə çıxarılacağını və qəti mövqenin orada açıqlanacağını bildirib.
Sədrlər Şurasında məsələ müzakirə edilərkən AXCP sədri Ə.Kərimli bunun əleyhinə çıxıb və Müsavatla birgə mitinq təşkil etməyin mümkünsüzlüyünü bəyan edib.

ƏHALİ NARAZIDIR

2007-01-24T11:16:00.000+04:00

Hakimiyyətin qiymət artımına haqq qazandırması etirazları daha da artırıb

24.01.2007. İlham Əliyevin keçirdiyi müşavirə ölkədə bahalaşmanın durdurulacağı ilə bağlı son ümidləri də öldürdü. Ölkə başçısının enerjidaşıyıcılarının qiymətlərində nəzərə çarpacaq dəyişikliklər edəcəyi gözlənilsə də, o, əmək haqları və təqaüdləri cüzi şəkildə artırmaqla, eyni zamanda müxalifəti qiymət artımından istifadə edərək, xalqı etirazlara çağırmaqda ittiham etdi. Bəs, əhali necə düşür? Atılan addımlar onların probleminin həlli üçün yetərlidirmi?Paytaxtda keçirdiyimiz kiçik sorğu zamanı bu sualın cavabını sakinlərin öz dilindən eşitməyə çalışdıq. İ.Əliyevin qiymət artımının zəruriliyilə bağlı səsləndirdiyi fikirlərə respondentlərin əksəriyyəti son dərəcə kəskin reaksiya verdi. Sorğu zamanı əhalinin narazılığının daha da artdığının şahidi olduq.Çörək sexində fəhlə işləyən Əli Həsənov: “Benzin, işıq, supulunun artması kasıbın belini qırdı. Belə çıxır ki, camaat hər yerə piyada getməlidir, işıq, su üzünə həsrət qalmalıdır. Yediyi də ancaq quru çörək olmalıdır. Hökumətin iclası camaatın gözündən pərdə asmaq üçün idi. Bütün xalq ayağa qalxıb, bu vəziyyətə öz etirazını bildirməlidir”. Tovuz rayon sakini, təqaüdçü Kamil Musayev: “30 il baytar işləmişəm. Zəhmətimin müqabilində çox az təqaüd alıram. Rayondan bura müalicəyə gəlmişəm. İynə-dərman od qiymətinədir, yaşamaq olmur.Poçt işçisi Telman Cəfərov: “Ümid edirəm ki, hökumət əvvəl-axır bu camaatı razı salan bir iş görəcək. 1-2 manat artımla əhalinin başını ovutmaq olmaz”.Binəqədi rayon Yaşıllaşdırma İdarəsinin işçisi Əli Rəhimov: “Bahalaşmadan sonra işıq yandırmağa da qorxuruq ki, xərcimiz çox çıxar. Dünən (srağagün - N.) keçirdiyi iclasa baxdım, çox hirsləndim. Bahalaşmayla bağlı iqtidar müxalifəti qınayır. Nə səbəbə? Mən müxalifətçi deyiləm. Amma bu məmləkətin biçarə, ailəsinin yanında başıaşağı qalan bir sakini kimi bahalaşmadan çox narazıyam. Qiymətlər qalxıb ceyran belinə. 27 ”şirvan" maaş alıram. Bu məvaciblə ailəmi necə dolandırım?!”Qarabağ və Əfqanıstan müharibəsi iştirakçısı Çingiz Sərdarov: “Müharibə iştirakçısı kimi cəmi 10 ”şirvan" təqaüd alıram. Ailəmi müəllim atam dolandırır. Ayağım qəlpəylə doludur. (Sol ayağını açıb göstərir. Qançır olmuş ayağında qabarmış qəlpələrin yeri görünür). Məni döyüşməyimə də peşman etdilər. Bu hökumətin hansısa bir ədalətli iş görəcəyinə inanmıram”.Zəngilan köçkünü Bayram Heydərov: “Camaatın güzəranıyla maraqlanan yoxdur. Özbaşınalıq baş alıb gedir. Kasıb çalışıb öz başını qorumalıdır”.Ermənistan qaçqını Şahmurad Hacıyev: “Qızım Xatirə Abdullayeva şəhid ailəsidir. Bir övladı ilə evsiz qalıb. Hara yazmışıq, faydası olmayıb. Əgər bu ölkədə şəhid ailəsi baxımsız qalırsa, onda bu hökumətdən nə gözləyək?!”

MÜXALİFƏT ÜÇÜN TARİF

2007-01-24T11:10:00.000+04:00

Benzinin qiymətini Müsavatın Məclisi qaldırıbmış

Zamin Hacı

24.01.2007. Srağagün axşam mən İlham Əliyevin Nazirlər Kabinetinin müşavirəsindəki çıxışına diqqətlə qulaq asdım və nəhayət öyrəndim ki, ölkədə qiymətləri qaldıran, bahalaşmaya, inflyasiyaya səbəb olan düşmən qüvvə kimlərdən ibarətmiş. Doğrudur, İlham bəyin haqlı olaraq qeyd etdiyi kimi “müxalifətin siyasəti Azərbaycanda bütövlükdə iflasa uğrayıb və bu, artıq ictimai-siyasi həyatın amili deyildir”, ancaq görükür müxalifət son nəfəsində bu xalqa zidd bahaçılığı yarada bilibdir.Dünən Eldar Mahmudov yoldaşla zəngləşdik (“vızov” atdım, özü zəng vurdu, əslində - konturumun qurtardığını hamıdan yaxşı bilir). Onun cəsur çekistlərinin köməyi ilə müxalifətin qiymət artımı toplantısının sənədləri hazırda masamın üstündədir. Dəhşətdir! Oxuduqca, yalan olmasın, başımın tükləri biz-biz durur, ətim ürpəşir.Demək, yanvarın 7-dən 8-nə keçən gecə İsa Qəmbər, Əli Kərimli, Sərdar Cəlaloğlu, Mirmahmud Mirəlioğlu, Pənah Hüseyn Bakı-Gəncə yolunun üstündə, Kürdəmir rayonu ərazisindəki “Bığ” restoranında məxfi toplantı keçirdiblər. Sonradan Rəsul Quliyev də “vızov” verib, toplantıya ABŞ-dan telefonla qoşulubdur. Əməliyyat məlumatına görə, əhvalat lap dəqiqi gecə saat 2-3 radələrində olubdur.Əvvəlcə İsa bəy çıxış edib, deyib ki, təcili benzinin, işığın, suyun, qazın qiymətini qaldırmalıyıq. Guya ki, xalqa pis olanda bunlara daha yaxşı olur (İlham bəy demişkən). Bu vaxt Pənah Hüseyn etiraz edib: “Sabirabadda bir çox seçicimin işıq pulunu mən özüm verirəm, indən sonra necə olacaq?” Əli Kərimli deyib ki, bunun bizə dəxli yoxdur, ona qalsa bizim partiyanın da qərargahını tutublar. Mirmahmud ağa “cəddim köməyiniz olsun” deyib, qiymət artımına səs verib. Sərdar Cəlaloğlu Rəsul Quliyevlə məsləhətləşib, ikinci söyləyib ki, gərək Azərbaycanda benzin ABŞ-dan baha olsun: “Bədbax amerikalılar bizim Azərbaycanın daha sürətli inkişaf elədiyini görməlidir”. Hələ onu da deyib ki, əgər benzin ABŞ-dakından baha olsa, bizim tam haqqımız var, gedib yankiləri İraqdan qovaq, oranı özümüz işğal eləyək.Bax, bu cür bir az da beynəlxalq söhbətlər edib, qiymətləri qaldırıblar.Əgər möhtərəm dövlət başçısı İsveçrədən tezcənə qayıdıb müəllim, həkim və pensiyaverənlərin əməkhaqqısının baza hissəsini 25 faiz artırmasaydı, batıb-qırılacaqdıq. İlahi, sən özün ona həmişə xizək sürməyə qəşəng qar bəxş elə! Amin, ya rəbbülaləmin!Yenə İlham bəydən sitat gətirək: “Müxalifət bir dəfə hansısa vətəndaşın problemilə məşğul olub, kömək edib? Yox!” Həqiqətən, Müsavat Partiyası niyə körpü tikmir? Nə üçün ordu saxlamır, polisə maaş, əlilə pensiya vermir? Xəstəxana, məktəb tikmir? Bu, AXCP-yə, ADP və sairəyə də aiddir. Bəyəm, məsələn, “Azadlıq” bloku heç olmazsa Çevik Polis Alayını himayəyə götürə bilməz? Əlbəttə bilər, ancaq bunlar eyzən xalqa ziyan vurmaq, gizlicə qiymət qaldırmaq haqda düşünürlər.Nəhayət, onu da qeyd edim ki, dövlət başçısı qəzəbinin şirin yerində müxalifət partiyalarını açıq-aşkar mitinqlər keçirtməyə dəvət etdi. Sitat: “Düşün meydanlara, haradasız siz?” Gözəl çağırışdır. İndi görüm Hacıbala Abutalıbov müxalifətin 26 və 28 yanvar mitinqlərinə necə icazə verməyəcək...

AZƏRBAYCANDAKI BAHALAŞMA RUSİYADA NARAHATLIQ DOĞURUB

2007-01-24T11:09:00.000+04:00

Baş nazirin müavini ölkəmizlə sərhədləri möhkəmləndirməyi təklif edib

24.01.2007. Azərbaycandakı qiymət artımından regiondakı digər ölkələr də narahatdır. Rusiyanın kənd təsərrüfatı nazirinin müavini Andrey Kerezyenkov bildirib ki, Azərbaycanla sərhədlərin möhkəmləndirilməsinə ehtiyac var. Təklifin səbəbini isə nazir müavini belə açıqlayıb.“Azərbaycanda ərzaq malları mart ayına qədər 100 faiz bahalaşacaq. Buna görə də biz sərhədləri möhkəmləndirməliyik ki, Rusiyadan bu ölkəyə ərzaq axını olmasın”. Məlumdur ki, indiyəcən Azərbaycandan Rusiyaya əsasən bir sıra meyvə-tərəvəz növləri daşınıb. Çünki məhz bu məhsullar orada daha ucuz olub. Amma belə məlum olur ki, yaxın aylarda Azərbaycanda ərzaq məhsullarının Rusiyadan daha baha olacağını qonşu ölkənin mütəxəssisləri də hesablaya biliblər.

Tragİroniya

2007-01-24T00:03:00.000+04:00

anti-mütəxəssis rəyi

Elçin

elchin_aze@yahoo.com

24.01.2007. Bu nədir mən başa düşmürəm, elə hər yetən qiymətlərin artmasından, bahalaşmadan inflayasiyadan şikayət edir, bunların əhalinin maddi vəziyyətinə ağır zərbə vurduğunu vurğulayır, hökumətimizi ittiham edirlər. Cəmaət, bu təxribatdır, belə söhbətlərə uymayın, sizə doğru məlumat vermirlər, bununla da iğtişaş yaratmaq istəyirlər. Bəzi “ağıllılar” bu cür söhbətlərilə məmurla – xalqın arasını vurmaq istəyirlər, qoymurlar mehriban və dostluq şəraitində yaşasınlar. Əzizlərim, belə bədxahların sözlərinə aldanıb hirslənməyin, narahat olmayın, etiraz etməyin, bədbinliyə qapılmağa dəyməz. İndi Sizə bütün həqiqətləri riyazi dəqiqiliklə deyəcəyəm, onda başa düşəcəksiniz ki, bu hökumət xalqı necə də çox sevir və istəmir ki, Azərbaycanlı hansısa Avropalıdan əksik olsun, geridə qalsın.
Gəlin hesablayaq, maaşlarınız nə qədər artıb. 15 %, 20 %, bəzilərinizdə 30 %, düzdür?! Bəs ay balam, bu cür nəhəng rəqəmlərin yanında yanacaq ve enerjinin, suyun (onlarala bərabər gələcək digər bütün məhsulların) artımındakı bu sısqa rəqəmlər nədir ki!? Elektrik enerjisi nə qədər qalxıb, 3-cə dəfə, benzin 1,5 dəfə, su 2-cə dəfə və s digərləri də buna oxşayır. Aydın oldu da sizə, bu kiçicik qiymət artımı sizə heç bir mənfi təsir göstərməyəcək, əksinə inkişafa aparacaq.
Və yaxud, ölkəmizdə minimal əmək haqqı nə qədərdir, 200.000 AZM, 250.000 AZM. siz bir rəqəmlərdəki sıfırların sayına baxın. Nə Avropa ölkələriində, nə də o təriflədiyiniz Amerikada da heç kim yanında bu qədər sıfır olan rəqəmlə maaş almır. Belə olkələrdə maksimum olsun 5000-10.000 dollar və ya avro maaş alarlar. Mən heç nə demirəm adi riyaziyyatdır, 5-ci sinif rəqəmləri, asanlıqla özünüz müqayisə edin. Görün heç hansısa bir amerikalı öz hökumətinə şikayət edir ki, niyə Azərbaycanda bu qədər (200.000 AZM) maaş alırlar, bizsə 3000-4000 dollarla birtəhər keçinməli oluruq.
Bir də ki, bu enerjinin özünün və daşıyıcılarının qiymətinin bahalaşması bizim xeyrimizə idi. Çünki xarici dövlətlər, xüsusilə də İnkişaf Etmiş Ölkələr bizə gülürdülər, bizi ələ salırdılar. Düz də deyirdilər! Baxın da əzizlərin. Nəyimiz onlardan əksikdir ki, əhalinin yaşayış səviyyəsi onlara bərabər, İqtisadiyyatımız onlardan da sürətli və dinamik inkişaf edir, təhsilimiz və səhiyyəmiz tamamilə dünya standartlarına uyğun, şəhər və kənd əhalisi bərabər səviyyədə dolanır, yollarımız və nəqliyyat sistemimiz standartları aşıb, xalqın rifahı avropada olduğu kimi günü–gündən yaxşılaşır... Bütün bunların yanında bizim yeganə əksiyimiz o idi ki, bizdə qiymətlər o ölkələrdə olduğundan ucuz idi, onların yanında lap rüsvay olurduq. Çox sağ olsun ki, hökumətimiz bundan da çıxış yolu tapdı, və qiymətləri standartlara çatdırdı. Daha bu Avropalılar bizi lağa qoya bilməyəcəklər.
Nahaq yerə etiraz edib nə özünüzü, nə də “bizi qoruyan polis əmiləri” əziyyətə salmayın. Baxın görün bu “İSLAHATIN” nə qədər xeyri var. Məsələn, benzin bahalaşıb, maşına minmə, piyada və ya velosipedlə get. Həm cana xeyri var, həm tıxaca düşməzsən, marşruta verəcəyin pul da cibində qalar. İşıq bahalaşıb, işıqdan az istifadə edin, bütün elektrik cihazlarını söndürün. Soyuducunu – onsuz da içi boşdur, televizoru – onsuz da əttökən və bayağı verilişlər verirlər, paltaryuyanı olan varsa satsın, əllə yusun, kondisionerdən heç istifadə etməyin – ziyandır, qızdırıcı işlədirsiniz – nəyə lazımdır axı, evdə futboldan zaddan oynayın qızışın, dərs və ya kitab oxumaq lazımdır – nəyə lazımdır axı, oxuyanlarımız nə qazanıb ki? Və s bu kimi çox faydalı cəhətlər var ki, ümid edirəm onları özünüz də fikirləşsəniz taparsınız, “ən orijinal ideyalar” həmişə bizlərdən çıxıb.
Bax gördünüz də, hər şey bizim xeyrimizədir, və birdəfəlik başa düşün ki, hökumətimiz və məmurlarımız nə edirsə, hamısı xalqın xeyrinədir, xalqa canları yandığı üçün hətta hərdən öz gəlirlərini də nəzərə almadan xalqın xeyrinə “radikal” qərar verirlər. Etiraz etməkdənsə, gedib alternativ yaşayış vasitələri axtaraq.

Bahalaşmaya qarşı 10 manat

2007-01-22T21:40:00.000+04:00

Prezident kasıblara “ümid verdi”

22.01.2007. BAKI. Bu gün Azərbaycan prezidenti İlham Əliyev yaşa görə əmək pensiyasının baza hissəsinin artırılması haqqında sərəncam imzalayıb. Prezidentin mətbuat xidmətindən APA-ya verilən məlumata görə, yaşa görə əmək pensiyasının baza hissəsinin məbləği 2007-ci il fevralın 1-dən 50 manat müəyyən edilib. Prezident həmçinin minimum aylıq əmək haqqının artırılması haqqında da sərəncam imzalayıb. Sərəncama görə, minimum aylıq əmək haqqı 2007-ci il fevralın 1-dən 50 manat olub. Prezidentin digər sərəncamı ilə Dövlət Sosial Müdafiə Fonduna 2007-ci il 1 yanvar tarixinə əmək pensiyalarının sığorta hissəsinin və sığortaolunanların fərdi hesablarının sığorta hissəsinə toplanan pensiya kapitalının istehlak qiymətləri indeksinin 2006-cı il üzrə səviyyəsinə uyğun indeksləşdirilməsinin həyata keçirilməsi tapşırılıb.
“Aksiya” xatırladır ki, buna qədər minimum əmək haqqının baza hissəsi 40 manat təşkil edirdi.
Beləliklə, büdcəsi cəmi 10 manat artan təqaüdçü və ya kasıb vətəndaş təkcə, bu məbləğlə enerji daşıyıcıları və kommunal xərclərinin deyil, bütün digər məhsulların da qiymət artımını önləməlidir.

ADP mitinq taktikası üzərində baş sındırır

2007-01-22T18:31:00.000+04:00

22.01.2007. BAKI. Azərbaycan Demokrat Partiyasının (ADP) Ali Məclisinin yanvarın 27-də keçiriləcək iclasında partiyanın mitinq taktikası ilə bağlı müzakirələr aparılacaq. Bu barədə APA-ya Ali Məclisin sədri Akif Şahbazov məlumat verib. İclasın gündəliyinin hazırlandığını bildirən A. Şahbazov burada həm mitinq, həm də ADP-nin YAP-la əməkdaşlığı məsələsinin xüsusi müzakirə ediləcəyini bildirib: “Əməkdaşlıq üçün YAP-a müraciət etmək və bunun ardınca mitinq keçirmək qərarı vermək bir-birinə tamamilə zidd addımlardır. Belə addımlarla heç bir hakimiyyət müxalifətlə dialoqa getməz. Ona görə də mən hesab edirəm ki, bu təzadlı qərarlardan imtina etməli və mitinq taktikamıza yenidən baxmalıyıq”. A. Şahbazov hesab edir ki, ADP digər partiyaların mitinq taktikalarından fərqli qərar qəbul etməlidir.

Müxalifətin kütləvi aksiyalarla bağlı müraciətləri araşdırılır

2007-01-22T18:29:00.000+04:00

Hakimiyyət tərəddüd içindədir

22.01.2007. BAKI. “Azadlıq” blokunun və Müsavat Partiyasının kütləvi aksiyalar keçirməklə bağlı müraciətləri Bakı Şəhər İcra Hakimiyyəti tərəfindən araşdırılır. Bu barədə BŞİH-in ictimai təşkilatlar və siyasi partiyalarla iş şöbəsinin müdiri Zaur Ramazanov məlumat verib. Onun sözlərinə görə, qanunvericiliyə uyğun olaraq müraciətlərə aksiyaların təyin olunduğu vaxta 24 saat müddət qalana kimi cavab veriləcək. Z. Ramazanov aksiyaların sanksiyalaşdırılıb-sanksiyalaşdırılmayacağı ilə bağlı əvvəlcədən hər hansı fikir bildirmək istəməyib.
Xatırladaq ki, “Azadlıq” bloku yanvarın 26-da müəyyənləşdirdiyi 9 ünvandan birində, Müsavat Partiyası isə yanvarın 28-də Həzi Aslanov metrostansiyası – Ukrayna meydanı istiqamətində yürüş-mitinqin keçirilməsi ilə bağlı şəhər rəhbərliyinə müraciət edib.

Ermənilər İTV-nin saytını dağıtdılar

2007-01-22T13:11:00.000+04:00

22.01.2007.Bu gün özünü erməni, həm də Ermənistanın xüsusi xidmət orqanlarının təmsilçisi kimi təqdim edən hakerlər Azərbaycanın İctimai Televiziyanın saytını (www.itv.az) dağıdıblar.
«Media forum» saytı «Analitikia.az» saytına istinadən xəbər verir ki, İTV-nin internet səhifəsi indiyədək işləmir və səhifədə hakerlər rus dilində, «Ermənistanın xüsusi xidmət orqanlarının Azərbaycanın xüsusi xidmət orqanlarının rəhbərliyinə qeyri-rəsmi xəbərdarlığı» başlığı altında xəbərdarlıq da yerləşdiriblər.
Xəbərdarlıqda bildirilir ki, son vaxtlar bir Azərbaycan hakeri Ermənistanın dövlət saytlarına və elektron poçtlarına müdaxilələr edir. Xəbərdarlığı yazanlar həmin şəxsin adını, soyadını bildiklərini və lazım gəlsə, fotoşəklini də yaymağa hazır olduqlarını deyirlər. Xəbərdarlığın müəllifləri müdaxilələrin dayanmayacağı təqdirdə həmin hakeri fiziki cəhətdən məhv edəcəkləri ilə hədələyirlər.
Məsələ ilə bağlı «Media forum» saytı Azərbaycanın Milli Təhlükəsizlik Nazirliyinə müraciət edib. Nazirliyin İctimaiyyətlə Əlaqələr Mərkəzininin rəhbəri Arif Babayev bu məsələyə ciddi yanaşmamağı tövsiyə edib. Bununla belə o, MTN-in müvafiq araşdırmalar aparacağını da vurğulayıb.

İTV-nin mətbuat xidmətinin rəhbəri Tahir Məmmədovun dediyinə görə, o, http://www.itv.az/ saytının dağıdıldığını bu gün səhər işə gələndə, təxminən saat 9.05-də sayta daxil olarkən bilib.
T.Məmmədovun sözlərinə görə, məsələdən xəbər tutan kimi mütəxəssislər saytın bərpası ilə məşğul olmağa başlayıblar. Hazırda onlar saytın bərpası ilə yanaşı hakerlərin «İtv.az»a hansı nöqtədən hücum etdiklərini də araşdırırlar.
«Bizim sayt ən müasir təhlükəsizlik proqramları ilə qorunur» deyən T.Məmmədov qeyd edir ki, indiyədək «İtv.az»da belə bir hal olmayıbmış: «Tək bir dəfə xırda texniki problem yaranmışdı».
T.Məmmədovun fikrincə, saytın ana səhifəsində Qarabağla bağlı bannerlərin, «Xəbərlər» bölməsində Qarabağ probleminə dair faktların yerləşdirilməsi, Azərbaycanın ərazi bütövlüyünü dəstəkləyən və tez-tez İTV-də efirə verilən, BMT qətnamələrinə istinadən hazırlanmış mətnin səsləndirildiyi şəkildə, xüsusi banner vasitəsilə ictimaiyyətə çatdırılması və s. erməni hakerlərinin «İtv.az»a hücumunu mümkün edir: «Ola bilər ki, həqiqətən də saytı erməni hakerləri dağıdıb. Hazırda məsələni dəqiqləşdirmək istiqamətində iş görülür. Amma bildiyiniz kimi, belə məsələləri dəqiq öyrənmək xeyli vaxt aparır».Mətbuat xidmətinin rəhbəri http://www.itv.az/ saytının fəaliyyətinin günün ikinci yarısında artıq bərpa olunacağına ümidvardır.

Bu gün hər şey bəlli olacaq!

2007-01-22T10:38:00.000+04:00

İlham Əliyev tarifləri endirəcəkmi?

22.01.2007. Yeni Müsavat. Azərbaycanın dövlət başçısı artıq iki gündür ölkədədir. Düzdür, bu günlərdən biri matəm, digəri isə istirahət gününə təsadüf edir və bu arada bahalaşma ilə bağlı İlham Əliyevin hər hansı münasibət bildirməsi bəlkə də mümkün deyildi. Amma bizdə olan məlumatlara görə, bu gün İ.Əliyevin sədrliyi ilə hökumətin yenidən toplanacağı gözlənilir. Xatırladaq ki, bir neçə gün öncə Nazirlər Kabinetində baş nazirin rəhbərliyi ilə keçən toplantıda da son qərar müzakirə mövzusu olmuşdu. Həmin müzakirələr zamanı bir sıra sosial ödəmələrin artırılması əsas məsələ kimi diqqətdə olub.İndi İ.Əliyevin iştirak edəcəyi müzakirədə konkret qərarların verilməsi və üstəlik, elektrik enerjisinin qiymətinin nisbətən aşağı salınması gözlənilir. Məlumatı redaksiyamıza verən mənbənin bildirdiyinə görə, elektrik enerjisinin bahalaşması bir çox mal və xidmətlərin qiymətində ciddi artıma səbəb olduğundan, qərarın məhz bu hissəsində dəyişikliyin edilməsi məsləhət görülüb.Müstəqil ekspertlər isə dövlət başçısının artırılmış qiymətləri yenidən aşağı salacağına inanmırlar. Onların fikrincə, bu iqtisadi cəhətdən izaholunmaz bir addımdır və çox ağır nəticələri ola bilər. Pensiya və əmək haqlarının, ümumiyyətlə, bir sıra sosial ödəmələrin artımına gəlincə, ekspertlərin qənaətincə, bu da mümkünsüz bir şeydir. İqtisadi Tədqiqatlar Mərkəzi İdarə Heyətinin rəhbəri Qubad İbadoğlunun sözlərinə görə, bunu gözləyənlərin ümidləri doğrulmayacaq və hətta bəzi sahələrdə qiymətlər daha da bahalaşacaq: “Çünki indiki halda bu yöndə gözləntilər olduğundan elektrik enerjisinin maya dəyərində xüsusi çəkisi yüksək olan təşkilatlar hələ öz qiymət siyasətlərinə yenidən baxmayıblar. Heç nəyin dəyişmədiyini görəndə, təbii ki, onlar qiymətlərini qaldırmağa məcbur olacaqlar”.

Pensiya və əmək haqlarının artırılmasına gəlincə, ekspertin sözlərinə görə, əvvəla, əmək haqlarının və pensiyaların artırılması məsələsi büdcə ilə həll edilir: “O zaman biz büdcəyə də yenidən baxmalıyıq. Heç büdcənin özündə də əmək haqlarının artırılması üçün o qədər böyük məbləğ nəzərdə tutulmayıb. Büdcə sferasında biz maksimum 25 faizlik əməkhaqqı artımı gözləyirik, bundan yuxarı artımdan danışmağa dəyməz. Digər tərəfdən, kəskin əməkhaqqı artımı iqtisadi cəhətdən müəyyən çətinliklər yaradacaq. Bu çətinliklərin yaranması bir növ inflyasiya amili ilə də bağlı olacaq. Çünki əməkhaqqı gəlirləri ilə qiymət artımının yarışması son nəticədə, təbii ki, qiymətlərin daha da bahalaşmasına təkan verəcək. Bu da inflyasiyanın artmasına səbəb olacaq”.Ekspertin sözlərinə görə, ünvanlı sosial yardım proqramını genişləndirmək də mümkün deyil. Çünki bunun üçün qanuna dəyişiklik etmək lazımdır: “Xüsusilə də gəlirlərin hesablanması ilə bağlı bəzi məqamlar var ki, ünvanlı sosial yardımı əldə etmək üçün problem yaradır. Dünya bazarında neftin qiymətinin ucuzlaşması da dövlət büdcəsinin imkanlarını zəiflədir. Bilirsiniz ki, neft gəlirlərinin büdcənin formalaşmasında kifayət qədər böyük rolu var. Ona görə də hökumət bir neçə istiqamətə yenidən baxmalıdır. Birincisi, büdcəyə yenidən baxılmalıdır, ikincisi əmək haqlarının indeksləşdirilməsinə getməlidir, üçüncüsü, hesab edirəm ki, ünvanlı sosial yardımın hesablanması üçün ehtiyac meyarına, yoxsulluğun ölçülməsi üçün yaşayış minimumunun dəyərinə, habelə pensiyanın baza hissəsinə yenidən baxılmalıdır. Sosial sahədə ölkənin siyasəti real olmalıdır. Bütövlükdə yanaşdıqda isə büdcədən ayrılan vəsaitlə heç nə etmək mümkün olmayacaq”.

DİLƏNÇİLƏR DƏ QİYMƏTİ QALDIRIBLAR

2007-01-22T10:37:00.001+04:00

“5 qəpiyə heç nə düşmür!”

22.01.2007.Qiymətlər qalxandan bəri bir neçə dəfə belə bir sualla rastlaşmışam - görəsən qiyməti enən nə isə varmı? Özüm də nə qədər fikirləşirdim, bu suala bir cavab tapa bilmirdim. Təbii ki, heç bu cavab mövcud da deyil... Amma Hüseyn Cavidin adını daşıyan bağın yanından keçərkən təxminən 5-6 yaşlarında olan dilənçi oğlanın məndən pul istəməsi bu suala cavab tapmağıma kömək elədi.Cibimdə olan iki qəpikdən birini - 5 qəpikliyi ona vermək istədim. Götürmədi... “Onu neynirəm, heç nə düşmür ona, “Nizami” ver” dedi. Cibimdəki digər pulu - 50 qəpiyi çıxarıb verdim, sevinə-sevinə verdiyim bir neçə suala cavab verdi və getdi. Hər ikimiz sevinc içindəydik, çünki hər ikimiz qazanmışdıq. O, pul qazanmışdı, mən isə çoxdan bəri hətta “Yeni Müsavat”ın kollektivi olaraq bizləri də düşündürən bir suala cavab tapmışdım. Deməli, son bahalaşmadan sonra qiymətdən düşən bir şey var: 5 qəpiklik! Təbii ki, bu, qətiyyən sevindirici hal deyil, amma fikrimcə, neçə müddətdən bəri bizləri narahat edən suala cavab tapmaq hamının könlüncə olar.Maraqlıdır, dilənçilər üçün tarifləri kim müəyyənləşdirir? Məsələn, bu 5-6 yaşlı oğlan nə anlayır ki, 5 qəpiyin dəyəri yoxdur? Təbii ki, onu da sədəqə istəyəcəyi pulun məbləğini başa salan birisi var. Özünün dediyinə görə, bu, onun anasıdır. Hər gün gətirib onu Cavid bağının yanına qoyarkən tapşırır ki, 5 qəpik verən olanda götürmə, ya birini də istə, ya da birdəfəlik “Nizami” istə. “Elə hamı 5 qəpik verir, heç fikirləşmirlər ki, buna heç nə düşmür” deyə şikayətlənir də bu balaca oğlan. Dilənçilərə 10 qəpik verin, cənablar, 5 qəpiyə heç nə düşmür!

QİYMƏTLƏR ENDİRİLSƏ, MİTİNQLƏR NƏ OLACAQ?

2007-01-22T10:37:00.000+04:00

22.01.2007. Xəbər verdiyimiz kimi, bu həftə enerji daşıyıcılarının və kommunal xidmətlərin qiymətinin artırılmasına etiraz olaraq yanvarın 26-da “Azadlıq” bloku, 28-də isə Müsavat Partiyasının təşəbbüsü ilə yürüş-mitinqlərin keçirilməsi qərara alınıb. Aksiyalarla bağlı Bakı Şəhər İcra Hakimiyyətinə artıq müraciət olunub.Digər məlumatlara görə isə, enerjidaşıyıcılarının qiymətləri endirilə bilər. Belə ki, ölkə başçısının rəhbərliyi ilə bu gün geniş müşavirə keçirəcəyi gözlənilir. Əgər qiymətlərin endirilməsi baş versə, mitinqlər qüvvəsində qalacaqmı?Müsavat başqanının müavini Mehman Cavadoğlu bizimlə söhbətində qeyd etdi ki, müşavirədə hansısa köklü dəyişikliklərin ediləcəyini gözləmirlər. Bu baxımdan da nəzərdə tutulan mitinq çox güman ki, qüvvəsində qalacaq. Meriyanın icazə verməyəcəyi təqdirdə isə, mitinqin keçirilib-keçirilməməsi ilə bağlı partiyada müzakirələr aparıldıqdan sonra qərar veriləcək. AXCP sədrinin müavini Həsən Kərimov da qiymətlərin endiriləcəyinə inanmır: “Bunu ağlabatan hesab etmirəm. Çünki qiymət artımı siyasəti birbaşa dövlət başçısının göstərişi ilə həyata keçirilib. Amma müşavirədən sonra belə bir şey baş verərsə, bunu alqışlamaq lazımdır. Təbii ki, belə olacağı təqdirdə, mitinqin keçirilib-keçirilməməsi məsələsi müzakirə olunandan sonra qərar qəbul ediləcək”.

BAHALAŞMA MƏMURLAR ÜÇÜN ƏLAVƏ GƏLİR MƏNBƏYİDİR

2007-01-22T10:36:00.001+04:00

Bir sıra layihələrin smetası şişirdilir

22.01.2007.Azərbaycanda neft pullarının iri investisiya layihələrinə qoyulmasına ekspertlər normal yanaşmırlar. Bildirilir ki, bu cür hallar son nəticədə mənimsəməyə, gəlirlərdən səmərəsiz istifadəyə səbəb olacaq. Məsələn, 21 km-lik Bakı Dairəvi yolu ilə bağlı layihənin iki dəfəyədək artıb 50 milyona çatması bu fikirlərin haqlı olduğunu deməyə əsas verir. Hətta nəqliyyat naziri Ziya Məmmədov bu günlərdə mətbuata açıqlamasında bildirib ki, son qiymət artımı ilə əlaqədar layihənin dəyəri bir az da bahalaşa bilər.İqtisadi Tədqiqatlar Mərkəzi İdarə Heyətinin sədri Qubad İbadoğlu məsələ ilə bağlı fikirlərini bizimlə bölüşərkən Nigeriyaya neft gəlirlərinin axdığı vaxtlarda baş verən hadisəni xatırlatdı: “Həmin vaxtlarda iki federal ştatda poladəritmə zavodu tikilmişdi. Onu da qeyd edim ki, burada federal ştatlar mərkəzi hakimiyyətdən daha çox neft pulları götürmə uğrunda mübarizə aparıblar. Əvvəl 1 milyard dollara hesablanan layihələr sonradan 6 milyard dollara başa gəldi. Burada təbii ki, həm korrupsiya, həm də inflyasiya rol oynamışdı. İndi o zavodların heç biri 20 faizdən artıq istehsal gücündən istifadə edə bilmirlər”. Ekspertin sözlərinə görə, indiki halda Azərbaycanda da qiymət artımından müəyyən qruplar daha çox bəhrələnirlər. Xüsusilə də böyük investisiya layihələrini həyata keçirənlər: “Bilirsiniz ki, dövlət büdcəsindən sənaye-tikinti xərclərinə xeyli vəsait ayrılıb. Hesab edirəm ki, tənzimlənən qiymətlərin bahalaşmasından sui-istifadə halları artıb. Ona görə də neft pullarının bu cür layihələrə yönəldilməsinin tərəfdarı deyiləm. Ümumiyyətlə, nəqliyyat sektorundakı tikinti-bərpa işlərində qiymət bahalaşması, süni istifadə halları çoxalacaq. Artıq bunun əsası da qoyulub. Smeta dəyərindən kənarlaşmalar, bahalaşmalar geniş xarakter alacaq. Bu da son nəticədə vəsaitlərin səmərəsiz istifadəsinə gətirib çıxaracaq”.İqtisadi İnkişaf Nazirliyi bazarlarda qiymətləri tənzimləmək istiqamətində müəyyən tədbirlərin həyata keçiriləcəyini elan edir. Q.İbadoğlu bildirdi ki, nazirliyin bu cəhdləri həm bazar modelinin prinsiplərinə uyğun deyil, həm də konseptual baxımdan burada yanlışlıq var: “Müəyyən tənzimləmə mexanizmləri görsənmir, sadəcə olaraq, bir sıra istiqamətlərdə təsir vasitələri işə salınır, bu da ki, problemlər yaradacaq”. Vergi qanunvericiliyinə edilən dəyişikliklərdən sonra bazarlarda hətta xırda alqı-satqı ilə məşğul olanlar da nəzarət-kassa aparatlarından istifadə etməlidir. Qanuna təzə edilmiş bu əlavədən yayınanları yüksək məbləğdə cərimə gözləyir. Espertin bildirdiyinə görə, nəzarət-kassa aparatlarından istifadə etməməyə görə cərimələrin çoxalması sahibkarlara ciddi problem yaradır: “Düzdür, sahibkarlar indiki halda bütün satışlarını kassadan keçirmirlər, amma burada da bir ədalətsizlik var. Məsələn, təsəvvür edin ki, 2 manatlıq konturu satan şəxs bu 2 manatın 4 faizini vergi olaraq verməlidir. Halbuki həmin konturdan ona cəmisi 10 qəpik qazanc qalır. Bu 10 qəpiyin 8 qəpiyi gedir vergiyə, yerdə qalan 2 qəpiklə sahibkar işçi də saxlamalıdır, digər xərcləri də ödəməlidir. Hazırda bu məsələ ilə bağlı ciddi narazılıqlar var və mənim fikrimcə, hökumət bununla bağlı düşünməlidir”.

MİNGƏÇEVİR ETİRAZ EDİR...

2007-01-22T10:36:00.000+04:00

Bahalaşmaya qarşı aksiyada bir cəbhəçi həbs edildi

22.01.2007.Dünən AXCP-nin Mingəçevir təşkilatı enerjidaşıyıcılarının qiymətinin artırılmasına etiraz olaraq aksiya keçirilib. Aksiyada müxalifətçilər də daxil, 200 nəfərə yaxın şəhər sakini iştirak edib. Bu barədə məlumatı AXCP-nin mətbuat xidmətinin rəhbəri İsaq Əvəzoğlu verib.
Onun sözlərinə görə, bir saat ərzində edilən səylərdən sonra etiraz tədbiri polis müdaxiləsi ilə dağıdılıb. İ.Əvəzoğlu həmçinin aksiyanın qarşısını almaq üçün Gəncədən və Yevlaxdan polis qüvvələri gətirildiyini deyib. Hadisə zamanı AXCP yerli təşkilatının sədri Süleyman Kərimov həbs edilərək polis şöbəsinə aparılıb.

TarifSEll-dən yeni kampaniya!

2007-01-21T12:06:00.000+04:00

Salam, TARIFCELL kompaniyası bu yaxınlarda qiymet artımına etiraz etdiyinə görə axtarılan və həbs edilən Bəxtiyar Hacıyevlə müqavilə imzalayaraq, yeni reklam posterlərində onun fotolarından istifadə edib. Posterlər şəhərdə yayıldıqdan sonra, insanlar salamlaşmaq üçün istifadə etdikləri əl işarəsini dəyişiblər. Sizi də TARIFCELLlilər sırasına qatılmağa dəvet edirik!

Hörmətlə, Cenab Truly Yours

TarifCELL şirkətinin baş direktoru

Rayonlar ayağa qalxdı!

2007-01-20T21:02:00.000+04:00

Ağsuda və Salyanda isə etiraz aksiyası

20.01.2007. Ağsu rayonunda elektrik enerjisinin və qazın qiymətlərinin artırılmasına etiraz olaraq mitinq keçirilib. «Trend»in məlumatına görə, 500 nəfər rayon sakini Qazax-Bakı avtomagistralını bağlayıb. Ağsu rayonunun polisləri aksiyanın keçirilməsinə maneçilik törətmək istəsələr də, mitinq saat 09.00-dan 15.00-dək davam edib. Polis əməkdaşları Qarabağ Azadlıq Təşkilatı (QAT) Ali Məclisinin üzvü Rafiq Günəşlini, Xalq Cəbhəsi Partiyasının (klassiklər) üzvü Vəkil Atakişiyevi və bir neçə Ağsu sakinini saxlayaraq polis bölməsinə aparıblar. Onların hər biri 30 manat cərimə olunduqdan sonra sərbəst buraxılıblar. Aksiya təşkilatçıları müddətsiz aksiyalara başlamaq haqqında qərar qəbul edib.
Yanvarın 19-da Salyan şəhərinin 20 Yanvar kuçəsinin sakinləri də eyni səbəblərlə etiraz aksiyası keçirib. Aksiya iştirakçılarından Siyasət Əliyevin verdiyi məlumata görə, yaşadıqları küçədə üç gündür evlər tamamilə işıqsız qalıb. O deyib ki, rayon elektrik şəbəkəsinə yeni təyin edilmiş müdir işıqların yandırılması üçün hər evdən 18 manat tələb edir. Şəhər sakinlərinin dediyinə görə, onların mənzillərində sayğac quraşdırılmadığından hər ay 6 manat pul ödəməli olurlar. İndi isə elektrik şəbəkəsindən bu məbləğin az olduğu bildirilir.
Şəbəkə müdiri Sultan Heydərov «20 Yanvar» küçəsindəki evlərin enerji pulunu ödəmədiyi üçün işığının kəsildiyini təsdiqləsə də, hamıdan eyni məbləğin tələb olunmadığını bildirib. Onun sözlərinə görə, sakinlər yalnız pulu ödədikdən sonra elektrik enerjisinin verilməsi bərpa olunacaq.

Hanı bu xalqın Etiraz Ruhu?

2007-01-20T11:47:00.000+04:00

AKSİYAner

20.01.2007. Milli Azadlıq Hərəkatı yeni-yeni başlayanda Topxanada 5-6 armud ağacının ermənilər tərəfindən qırıldığını eşidib, 1 milyon azərbaycanlı indiki Azadlıq meydanına yığışmışdı.
O insanlar indi də sağdır.
20 yanvar hadisələrində də 1 milyondan artıq insan nə SSRİ kimi nəhəngdən, nə də onun tank və toplarından qorxmayaraq, küçələrə töküldü. Yüzlərlə insan şəhid oldu.
Bu insanların çoxu hələ də Azrəbaycanda yaşayırlar. Görəsən indi onların heç nəyə etiraz etməmələrinin sirri nədədir?
Hara uçdu bu xalqın Etiraz Ruhu?
Axı bu xalq qorxaq deyildi!
Bəs nə baş verdi, nə?..

Prezident qayıtdı

2007-01-20T11:17:00.000+04:00

20.01.2007. Dünən axşam ölkə başçısı İlham Əliyev qısamüddətli məzuniyyətini başa vuraraq, ölkəyə qayıdıb. Bu gün Ümumxalq hüzn günü ilə bağlı Şəhidlər Xiyabanını ziyarət edəcək.
Prezidentin ayın 22-də İqtisadi müşavirə keçirəcəyi və qaldırılmış tarifləri müzakirə edəcəyi gözlənilir.
Ayın 24-də isə Davos Forumuna yola düşəcək.

YAP-ın Dəyirmi Masasında Heydər Babayev tənqid olundu

2007-01-18T17:06:00.000+04:00

18.01.2007. Bu gün Yeni Azərbaycan Partiyası «Park İnn» otelində bir sıra enerji daşıyıcılarının və kommunal xidmətlərin qiymətlərinin artırılması ilə bağlı dəyirmi masa keçirib. YAP sədrinin müavini, icra katibi Əli Əhmədov bildirib ki, Tarif Şurasının qiymətlərin qaldırılması ilə bağlı qərarı cəmiyyət tərəfindən anlaşılan qarşılanıb (oxu: xalq bayram edir). «Ancaq bəzi siyasi qüvvələr bundan sui-istifadə etmək istəyir» (oxu: Ayıb olsun müxalifətə! Niyə qiymətləri aşağı salmırlar? Hara baxır İsa qəmbər və başqaları?...) Ə.Əhmədov Tarfi Şurasının qərarının sürətli iqtisadi inkişafın (oxu: Azərbaycan iri addımlarla irəliləyir!.. Uçuruma doğru!)obyektiv zərurətindən irəli gəldiyini bildirib. «Qərarın mahiyyəti cəmiyyətə düzgün çatdırılmalı və bundan sui-istifadə edən siyasi qüvvələrin cəhdlərinin qarşısının alınması mühümdür» deyə o, qeyd edib.
Tarif Şurasının katibi Elşən Əsədov qiymətlərin qaldırılması üçün indiki vaxtın seçilməsini düzgün adlandırıb (oxu: Prezident məzuniyyətdə, havalar soyuq, müxalifət bir-birini qırır- bundan da yaxşı vaxt?).

Milli Məclisin sosial siyasət daimi komissiyasının sədri Hadı Rəcəbli isə sevindiyindən əl götürüb oynamışdır. Onu zorla sakitləşdirən iqtisad elmləri doktoru Səttar Səfərov qiymətlərin artırılmasını dəstəklədiyini bildirib. Daha sonra iki gün öncə mətbuata məsələ ilə bağlı açıqlama verən Heydər Babayevin dediklərini o ki var tənqid etmişdir: "Tarif Şurasının qərarı qiymət islahatı kimi izah edilməməlidir. Qiymətlərin artımı əhalinin əmək haqlarının artımı ilə düz mütənasib olmalı və tədricən həyata keçirilməlidir. Azərbaycan hökuməti büdcəni qiymət artımı hesabına doldurmamalıdır».

Bu çıxışdan sonra bütün YAP-çıların ona tərs-tərs baxdığını görən alim demişdir: "Zarafat edirdim".

Telefon danışıqları da bahalaşır

2007-01-18T14:39:00.000+04:00

18.01.2007. Bu gün saat 3-də Rabitə Nazirliyi toplantı keçirərək ölkədaxili telefon danışıqlarının qiymətini qaldırmaq məsələsinə baxılacaq.

Gəncədə etiraz mitinqi keçiriləcək

2007-01-18T14:23:00.000+04:00

18.01.2007. Bunun üçün bir qrup QHT artıq Gəncə şəhər İcra Hakimiyyətinə müraciət edib. Mitinq Tarif Şurasının enerji daşayıcılarının, kommunal və bir sıra xidmətlərin qiymətlərinin artırılmasına etiraz olaraq keçiriləcək.
Bu haqda Helsinki Vətəndaş Assambleyasının Gəncə şəhər nümayəndəliyinin rəhbəri Akifə Əliyeva məlumat verb. Onun sözlərinə görə, 500-dək insanın iştirakı gözlənilən mitinqin keçirilməsi yanvarın 24-nə plaşdırılıb. Belə ki, təşkilatın təşəbbüsü ilə yanvarın 13-də Gəncə şəhərində fəaliyyət göstərən bir qrup QHT nümayəndələrinin iştirakı ilə toplantı təşkil olunub. Burada Tarif Şurasının enerji, kommunal və bir sıra xidmətlərin qiymətlərinin artırılması haqda qərarının əhalinin sosial güzəranına çox ciddi təsir edəcəyi vurğulanıb. Buna etiraz əlaməti olaraq yığıncaq iştirakçıları ölkə başçısına müraciət imzalayıb, həmçinin bununla bağlı mitinq keçirilməsi üçün şəhər İcra Hakimiyyətinə məktub yolanılıb. İcra aparatının İctimai Təşkilatlarla və Siyasi Partiyalarla İş Bölməsinin baş məsləhətçisi Ruslan Qardaşov məktubun alındığını və hələlik mitinqin keçirilməsinə dair müzakirələr aparıldığını bildirdi: «Hələlik bu müraciətə baxılır və qanun çərçivəsində məsələ həll olunacaq».Qeyd edək ki, etirazçılar mitinqin keçiriləcəyi yerə dair İcra Hakimiyyətinə 3 ərazi təklif ediblər. Onlardan biri mərkəzi Heydər Əliyev meydanıdır.

tinsohbeti.com -u necə müdafiə etməli?

2007-01-18T09:46:00.000+04:00

18.01.2007. Əziz dostlar, Azərbaycan cəmiyyətindəki çirkinlik və eybəcərlikləri maraqlı şəkillər, karikatura, video-audio fayllar, felyeton yazı, satirik məqalələr və müxtəlif materiallarla özündə cəm edən "Tin söhbəti" (www.tinsohbeti.com) saytı yenidən hakimiyyət tərəfindən Azərbaycan sərhədləri daxilində yasaqlandı. Düz dörd ay bundan öncə iki dəfə yasaqlanmış sayt beynəlxalq təşkilatlar olan "Sərhədsiz Repartyorlar" (RSF) birliyi və "Beynəlxalq Söz Azadlığı Mübadiləsi" (İFEX) tərəfindən etiraz bəyanatına əsasən yenidən Azərbaycan sərhədləri daxilində fəaliyyətə başlamışdı. Həmçinin yanvar ayının 9-u susmayaq.biz saytı ilə bərabər yasaqlanan saytla əlaqədar beynəlxalq təşkilatlar yenidən etiraz bəyanatı ilə hakimiyyətə təzyiq göstərmişdi. (RSF) Elə bir neçə gün öncə yenidən İP ünvanı deyişdirilərək açılan sayt bu gün bir daha, 4-cü dəfə blok olundu. Son olaraq sayta İlham Əliyevin karikaturaları yerləşdirilmişdi və məşhur "Vermə" hərəkatından söhbət açılırdı. Görünür bu elektron jurnalın reytinqi günü-gündən irəliləyərək 600-dən çox insanın ziyarətinə tuş gəlməsi hakimiyyəti saytı bağlamağa məcbur etmişdir. Və son günlər qiymətlərin artırılmasından narahat olan hakimiyyət əhalinin kütləvi etirazından təşvişə düşərək, xalqı daha da coşduracaq bu cür saytların qarşısını almağı planlaşdırmışdır. Xatırladaq ki, bu sayt ölkədən kənarda çox asanlıqla fəaliyyət göstərir və heç bir xaker hücumuna məruz qalmayıb. Bunun üçün Azərbaycandakı istifadəçilər proxy ilə hazırladığımız www.heyderizm.com saytından istifadə edərək girə bilərlər.
Bunları yazmaqda bir məqsədimiz var. Səyləri birləşdirdikdə və prinsipial mövqe tutaraq dinc mübarizə metodlarından istifadə etdikdə məqsədimizə nail olduğumuzu Bəxtiyar Hacıyevin həbsi ilə əlaqədar aparılan uğurlu kompaniyanın timsalında da görə bilərik. Fikrimcə Azərbaycanda fəal vətəndaş mövqeyini nümayiş etdirmək üçün kifayət qədər mövzu və sahə var. Bu tip fəaliyyətlər uğurla nəticələnə bilmək üçün koordinasiya olunmalıdır. İndi biz koordinasiyadan yox, daha çox Tin Söhbətinin qapadılmasının etiraz bildirilməsinə layiq olan bir mövzu olduğunu vurğulamaq istəyirik. Fikrimcə aktual fəaliyyət planına bu saytın yenidən açılması uğrunda mübarizənin daxil edilməsi zəruridir. Bu həm də bir təklifdir. Mübarizə və onun üsulları ətrafında diskussiya etmək olar. Amma bu zərurətə münasibət barədə fikrinizi bilmək pis olmazdı. Bu məqsədlə hər zaman bizimlə əlaqə saxlaya bilərsiniz.

Hörmətlə,
Qurban Ələkbərov

Almaniya

Ölkədə hakimiyyət çevrilişinə hazırlıq

2007-01-17T18:52:00.000+04:00

MTN 17 nəfəri həbs etdi

17.01.2007. BAKI. Milli Təhlükəsizlik Nazirliyinin (MTN) bu günlərdə keçirdiyi əməliyyat-axtarış tədbirləri nəticəsində Cinayət Məcəlləsinin 218 (cinayətkar birlik yaratma), 274 (dövlətə xəyanət), 28, 278 (hakimiyyəti zorla ələ keçirmə və ya onu zorla saxlamağa hazırlıq), 228 (qanunsuz odlu silah saxlama), 204 (saxta pul və ya qiymətli kağızlar hazırlama və ya satma), 234 (qanunsuz olaraq narkotik vasitələri saxlama və daşıma) maddələri ilə cinayət işi başlanıb. Bu barədə APA-nın sorğusuna cavab olaraq MTN ictimaiyyətlə əlaqələr mərkəzinin rəhbəri Arif Babayev məlumat verib. A. Babayev bildirib ki, şübhəli şəxs qismində 13 nəfər saxlanılıb, 4 nəfər barəsində məhkəmənin qərarı ilə həbs-qətimkan tədbiri seçilib. Faktla bağlı istintaq hərəkətləri və əməliyyat-axtarış tədbirləri davam etdiyindən detallar açıqlanmır. İctimaiyyətə bununla bağlı əlavə məlumat veriləcək.

Norveçdən məktub

2007-01-17T18:51:00.001+04:00

Abbas Atilay

17.01.2007. Salam, dostlar. Son hadisələr məni də çox üzdü, sonrakılar isə sevindirdi.Bəxtiyarı tanımasam da (nə fərqi var?) azad fikrə daş atanlara qarşıyam...Qısacası, sevindim ki, sonunda bir şəxsin azadlığı üçün yüzlərlə gənc mobilləşə bildi. Təəssüflər ki, mən sizin sıralarınızda olmadım. Amma ən azı sizin qədər dostumuzun azadlığa çıxmasına sevindim...Skandinaviyada çox maraqlı hadisələr olur: Kopenhagendə tələbə haqları uğrunda nümayiş edən tələbələrin polislər tərəfindən həbs edilməsinə Norveç, İsveçli tələbələr Kopenhagenə yığılır. Bu hadisə 3 həftə əvvəl olsa da hələ də Kopenhagen polisi vahimədədir...Danimarkalı tələbələrə Skandinaviyanın hər tərəfindən tələbə dəstəyi gəlir. Amma bunlarin içində Azərbaycanlılar yoxdur...Hamıya hədsiz enerji!

VHP mitinqləri dəstəkləməyəcək

2007-01-17T18:51:00.000+04:00

17.01.2007. BAKI. Vətəndaş Həmrəyliyi Partiyası (VHP) müxalifət partiyalarının keçirəcəyi etiraz aksiyalarına qatılmaq niyyətində deyil. Bu məlumatı APA-ya partiyanın sədri Sabir Rüstəmxanlı verib. Onun sözlərinə görə, enerji daşıyıcılarının qiymətlərinin artırılmasına dərhal reaksiyanın verilməsinə ehtiyac var idi. Hazırda etiraz aksiyalarını gecikmiş hesab edən millət vəkili heç olmasa keçiriləcək mitinqlərin partiyaların birgə təşkil etməsini vacib sayır: “Burada hansısa siyasi tələb yox, insanların taleyi ilə bağlı məsələ olduğundan birgə aksiyalar lazımdır. Amma həmişəki kimi, yenə də bu aksiyalar nəticəsində xalqın mənafeyi baxımından nəyinsə əldə edilməsi yox, kimlərinsə özünü göstərməsi əsas məqsəddir”. S. Rüstəmxanlı aksiyalarda iştirak etmək üçün partiyaya digər təşkilatlardan təkliflərin də daxil olduğunu bildirib. Buna baxmayaraq, o, ayrı-ayrılıqda keçiriləcək aksiyalara qatılmayacaqlarını vurğulayıb.

Azərbaycanın internet xətti Rusiyanın nəzarətindədir

2007-01-17T18:50:00.000+04:00

17.01.2006. BAKI. “Gürcüstandan gələn internet xəttinin kəsilməsi nəticəsində Azərbaycanın bu şəbəkədən məhrum olacağı haqqında yayılan məlumatlar həqiqətə uyğun deyil”. APA-nın məlumatına görə, bu sözləri jurnalistlərə açıqlamasında rabitə və informasiya texnologiyaları naziri Əli Abbasov bildirib. Onun sözlərinə görə, əksinə, Gürcüstanın istifadə etdiyi internet xətlərinin çox hissəsi Azərbaycandan keçir. Ə. Abbasov yalnız kiçik bir optik xətlə Gürcüstandan Azərbaycana internet xəttinin gəldiyini söyləyib: “Azərbaycana internet xətti Rusiyadan daxil olur”.

AzTV-nin Dibdəhnədən reportajı

2007-01-17T17:21:00.000+04:00

Müstəqilliyimiz əbədidir, dönməzdir, sarsılmazdır!

Rəşadət Axundov xəbər verir:

17.01.2007. Bu gün Dibdəhnə kənd sakinləri kənd klubunda yığışaraq Bəxtiyar Hacıyevin həbsdən azad olunmasına öz münasibətlərini bildirmişlər.
Bu işdə öz həyatını risqə ataraq böyük fədakarlıqlar göstərdiyinə görə Azərbaycan Respublikası Gənclər və İdman Nazirliyinə və İRƏLİ Ümumrespublika Gənclər Hərakatına kənd camaatı öz dərin təşəkkürünü
bildirmişdir. İclasda çıxış edən natiqlər sözügedən qurumların fəaliyyətini yüksək qiymətləndirmiş həmçinin respublikamızda 1993-cü ildən sonra yaranmış sabitlik, iqtisadi inkişaf, dövlətçiliyin möhkəmləndirilməsi prosesinin bundan sonra daha böyük uğurla həyata
keçirilməsinə öz dərin inamlarını bildirmişlər. Çıxış edən kənd ağsaqqalı Cəlal kişi Bəxtiyarın 2 gün içində həbs edilməsi, ona hökm oxunması, qərarın icra edilməsi və onun həbsdən azad edilməsini hüquq-mühafizə orqanlarımızın operativ işləməsinin bariz nümunəsi
olduğunu bildirmiş və bununla bu orqanların dövlətçiliyimizə qarşı yönəlmiş istənilən hərəkətin qarşısını vaxtında alacağını göstərdiyini ifadə etmişdir. Kəndin birçəyi Tamam nənə Ramin Hacılı, Emin Milli, Təbriz Cabbarov kimi ünsürlərin bu işdən öz məqsədləri üçün istifadə etdiyinə görə bütün ictimaiyyət adından bu şəxslərin qınanmasının vacibliyini tədbir iştirakçılarının diqqətinə çatdırmış, onları daxili və xarici düşmənlərimizin dəyirmanına su tökməkdə ittiham etmiş, bu şəxslərin evlərinə yumurtayla silahlanmış zəhmətkeş yürüşlərinin təşkil edilməsinin də hər bir şəxsin bir vətəndaşlıq borcu olduğunu bəyan etmişdir. Bu məsələnin siyasiləşdirilməsi kənd camaatə tərəfindən kəskin nifrətlə qarşılanmış və bunun əslində məişət zəminində baş vermiş bir hadisə olduğu vurğulanmışdır.
Sonda tədbir iştirakşıları adından ümummilli liderimizin siyasi kursunun layiqli davamçısı Cənab İlham Əliyevə məktub ünvanlanmış, məktubda kənd sakinləri bir daha bu kursun dönməzliyinə öz inamlarını ifadə etmiş, prezidentin daxili və xarici siyasətini dəstəklədiyini bildirmiş və dövlətçiliyimizə qarşı çıxan hər bir şəxsin zərərsizləşdirilməsində hər zaman prezidentin, eləcə də hüquq-mühafizə orqanlarının yanında olduqlarını vurğulamışlar.

Bakı – Dibdəhnə - Bakı
AzTV, Xalq Qəzeti, Respublika, Səs, İki Sahil…

Müsavat tək qalıb?

2007-01-17T16:38:00.000+04:00

Mitinqlə bağlı digər partiyalara müraciət edilməyəcək

17.01.2007. BAKI. Müsavat Partiyası yanvarın 28-nə təyin etdiyi yürüş-mitinqlə bağlı müxalifət partiyalarına müraciət etməyəcək. “Azadlıq” bloku Müsavatın birgə mitin təklifini rədd etdikdən sonra, digər partiyalara da eyni təklifi etməkdən vaz keçilib.
Bu barədə partiyanın Mərkəzi İcra Aparatının rəhbəri Arif Hacılı bildirib. İndi onlar partiyaların özündən təşəbbüs gozləyirlər.
Mitinqə icazə verilməyəcəyi təqdirdə razılaşdırılmamış aksiyaya gedib-getməyəcəkləri ilə bağlı suala isə dəqiq cavab verməyib.
Xatırladaq ki, Müsavat Partiyası yanvarın 28-də “Həzi Aslanov” metrostansiyası - Ukrayna meydanı marşrutu üzrə yürüş-mitinqin keçirilməsi ilə bağlı Bakı şəhər İcra Hakimiyyətinə müraciət edib.

«Azadlıq» bloku şəhərin on yerində aksiya keçirməyi planlaşdırır

2007-01-17T16:37:00.000+04:00

17.01.2007. «Azadlıq» siyasi partiyalar bloku Tarif Şurasının qiymətləri qaldırması ilə bağlı yanvarın 26-da Bakının on yerində etiraz aksiyası keçirəcək. Bu barədə qərar blokun sədrlər şurasının yanvarın 16-da keçirdiyi toplantısında verilib.
Azərbaycan Xalq Cəbhəsi Partiyası mətbuat xidmətindən verilən məlumata görə, «Azadlıq» blokunun mitinq komitəsi aksiyanın keçirilməsi ilə bağlı Bakı Şəhər İcra Hakimiyyətinə xəbərdarlıq məktubu hazırlayır.
AXCP sədri Əli Kərimlinin sözlərinə görə, Sədrlər Şurası blokun əvvəlki qərarına uyğun olaraq qiymətlərin kütləvi şəkildə artırılmasına etiraz məqsədi ilə ümumxalq etirazını nümayiş etdirmək üçün paytaxtın mərkəzi rayonlarında mitinq keçirilməsində israrlıdır.
Yanvarın 8-də Tarif Şurası neft məhsullarının, elektrik enerjisinin, təbii qazın, suyun və bir sıra xidmətlərin qiymətini qaldırdıqdan bir neçə gün sonra «Azadlıq» siyasi blokunun rəhbərləri yığışaraq vəziyyəti müzakirə etmişdilər. Həmin müzakirə zaman qiymət artımına qarşı kütləvi etiraz aksiyaları keçirmək barədə təkliflər səslənmişdi.

Mən yenə həbsxanaya getməyə razıyam...

2007-01-17T00:32:00.000+04:00

... əgər bu, gəncləri yenidən birləşdirəcəksə...

16.01.2007. Salam dostlar, Allah hər şeyi bilən, görən və eşidəndir. Allah ədalət məhkəmələrində ən ədalətli Hakimdir. Mənim həbsim-saxlanılmağımla bağlı göstəriş verən və prosesdə iştirak edənləri Allaha həvalə edirəm.
Əsas məsələ: mən azadlığa çıxdıqdan sonra, dünən axşam ilk dəfə e-poçtuma baxdım və ürəyim sevinc hissləri ilə doldu. Çünki son zamanlar ilk dəfə idi ki, polyarlaşmış Azərbaycan gəncliyini bir yerdə, bir yumruq kimi görürdüm və buna səbəb olduğum üçün sevinirdim, həbs zamanı keçirdiyim bütün pessimist hisslər keçib getdi.
Amma bu gun baxıram, ittihamlar səslənir, yenə qütbləşmə başlayır və s... Əgər yenə birləşəcəksinizsə, mən yenə həbsxanaya getməyə razıyam. Axı bizim nə qədər birgə həll edə biləcəyimiz problemlər var! Niyə bu birliyi davam etdirməyək sonuna qədər?
Mənim həbsimlə bağlı mənfi və müsbət hallar oldu. Mənfi hallar hamıya məlumdur və bu barədə özumə gələndə, bir az sakitləşəndə ətraflı yazacam. Amma müsbət hal odur ki, gənclərimiz mənim aqibətimdən qorxmaq əvəzinə bir yumruq kimi birləşdilər. Gənclər Nazirliyi bir dovlət strukturu kimi oz sözünü dedi, müxtəlif qütblərdə dayanan gənclər təşkilatları, ayrı-ayrı şəxslər öz əllərində olan imkanlarla kömək etməyə çalışdılar. Mən hər bir şəxsə ayrı-ayrılıqda təşəkkür edirəm, bağrıma basıram .
Özünüz də son hadisələrdən görürsünüz ki, cəmiyyətimizdə görüləsi işlər çoxdur. Azərbaycan bir çox sahədə (sşz azadlığı, demokratiya, qanunun aliliyi və s..) özünü dünyanın inkişaf etmiş ölkələrinə çatdırmalıdır. Ona görə enerjimizi gənclərarası münaqişələrə, kimin PR, kimin SIAR etməsini müəyyənləşdirməyə sərf etməkdənsə, ümumi gücü bu problemlərin həllinə yönəltsək, yaxşı olar.
Bir daha təşəkkürlər!

tinsohbeti.com saytına yenə blok qoyuldu

2007-01-16T23:18:00.000+04:00

... amma onu yeni ünvandan izləmək mümkün olacaq

16.01.2007.Bir həftə öncə Azərbaycanda yayımına blok qoyulan www.tinsohbeti.com saytı yeni ünvandan yayımını bərpa etsə də, növbəti dəfə hakimiyyətin eyni münasibəti ilə üzləşib. Belə ki, bu gün günün ikinci yarısında yenidən saytın ölkə daxilində yayımına qanunsuz şəkildə blok qoyulub.

Bir neçə gün öncə nüfuzlu beynəlxalq təşkilatların çoxsaylı kəskin bəyanatlarına baxmayaraq, yenə saytın yayılmasına qadağa qoyulub. Anoloji hal bir neçə dəfə baş verib. Saytın qurucusu Həbib Müntəzir bu dəfə də, saytı yeni ünvana köçürmək məcburiyyətində qaldıqlarını bildirdi. Hələlik isə izləyicilərinin tin söhbətlərini www.heyderizm.com ünvanından oxuya biləcəklərini dedi.

Mənim qiymətimi niyə qaldırmırsınız?

2007-01-16T22:55:00.000+04:00

Zahir Əzəmət

16.01.2007.Azərbaycanda hər şeyin qiyməti var- insandan başqa. Hər şeyin qiyməti qaldırılır, insanın yox. Bəs bizə nə zaman dəyər veriləcək? Bəs mənim qiymətim nə zaman qaldırılacaq? İnsanın bir qəpik qiyməti olmadığı Azərbaycanda hətta qatığın da qiyməti qalxdı. Bizdə nefti, pambığı, hətta Qəbələ fındığını da milli sərvət elan ediblər. İnsanı yox! Bizdə insana, onun inkişafına, onun təhsilinə, intellektinə verilən qiymət sıfırdır! Amma qatığın bir bankası 50 qəpiyə qalxdı!

Bəxtiyar Hacıyevdən eksklüziv şəkillər

2007-01-16T21:20:00.000+04:00

BMM-də icazəsiz mətbuat konfransı

2007-01-16T18:34:00.000+04:00

16.01.2007. Əvvəlcədən BMM-də keçirilməsi planlaşdırılan və sonradan heç bir izahat vermədən BMM-in imtina etdiyi mətbuat konfransı bu gün baş tutdu. Belə ki, www.susmayaq.biz saytının təsisçisi olan Bəxtiyar Hacıyevin Huquqlarının Müdafiə Komitəsinin briffingi bu gün saat 2:00-da BMM-in qarşısında keçirildi. Elə ayaqüstü jurnalistlərə müsahibə verən komitə sədri Ramin Hacılı konkret olaraq Bəxtiyar Hacıyevin azadlığa çıxmasını yerli və xarici təşkilatların təyziqinin nəticəsində mümkün olduğunu bildirdi. Bununla belə Ramin Hacılı Bəxtiyar Hacıyevin həbsini söz azadlığına növbəti basqı kimi dəyərləndirib.
"Bəxtiyar Hacıyevin azadlığa çıxması ilə kifayyətlənib, dayanmaq olmaz.Bundan sonra daha da aktiv işləyib, Tarif Şurasınn qiymət artımına öz etirazımızı bildirməklə yanaşı yeni-yeni veb saytlar da açmağı planlaşdırırıq" deyə Hacılı media üçün açıqlamasında bildirib.
Qeyd edək ki yaxın günlərdə Bəxtiyar Hacıyevin Huquqlarının Müdafiə Komitəsi JAZZ CLUB da saytın təsisçisi başda olmaqla mətbuat konfransı keçirəcək. Konfransda bütün qaranliq məsələlərə aydınliq gətirləcək.Huquqmüdafiəçilərinin və digər ictimai şəxslərin iştirakı ilə keçiriləcək konfrans barədə xəbəri saytımızda gözləyin.

Paytaxtda polis əməkdaşlarının sayı artırılıb

2007-01-16T17:31:00.000+04:00

16.01.2007.BAKI. Son günlər paytaxtın metro stansiyalarında, əhalinin gur olduğu yerlərdə polis əməkdaşlarının sayının artırılması müşahidə olunur. Daxili İşlər Nazirliyinin mətbuat xidmətinin əməkdaşı Ehsan Zahidov APA-ya bildirib ki, polis əməkdaşlarının sayının artırılması bayram günləri və dövlət əhəmiyyətli tədbirlərlə bağlıdır. E.Zahidovun sözlərinə görə, Qurban bayramı, Yeni il və Dünya Azərbaycanlılarının Həmrəylik Gününün üst-üstə düşməsi ilə əlaqədar Bakıda silsilə bayram tədbirləri keçirilib: “Qarşıdan isə 20 Yanvar - ümummilli hüzn günü gəlir. Bu münasibətlə də bir sıra dövlət əhəmiyyətli tədbirin keçirilməsi nəzərdə tutulur. Polis ictimai asayişi, əhalinin təhlükəsizliyini təmin etmək məqsədi ilə ötən ilin sonundan gücləndirilmiş iş rejiminə keçib. Bu rejim hələ davam edir”.
Əhali arasında isə bunun səbəbləri kimi, son bahalaşmaya əhalinin ehtimal olunan kütləvi narazlıqılara hazırlıq olması ilə bağlı xəbərlər dolaşır.

İlqar Qasımov: “Heç bir müxalifət partiyası kütləvi aksiya keçirməyə qadir deyil”

2007-01-16T17:24:00.000+04:00

16.01.2007. MOSKVA. “Reabilitasiya dövrü bitdikdən sonra Azərbaycana qayıdacağam”. Bunu APA-ya açıqlamasında hazırda Moskva şəhərində yerləşən klinikaların birində müalicə olunan Azərbaycan Yolu Siyasi Hərəkatının (AYSH) sədri İlqar Qasımov deyib. Moldova polisinin baş verən qəza hadisəsi ilə bağlı istintaq apardığını söyləyən İ. Qasımov işin gedişindən hələ məlumatlı olmadığını bildirib. O, Tarif Şurasının qiymətlərin qaldırılması ilə bağlı verdiyi qərara da toxunaraq müxalifət partiyalarını ittiham edib: “Onlar cəmiyyəti yenə aldatmaqla məşğul oldular. Bir daha bəlli oldu ki, heç bir müxalifət partiyası kütləvi aksiya keçirməyə qadir deyil. Hətta prezident olmaq istəyən partiya sədri də geri çəkildi. Parlamentin deputatları isə bu haqda əvvəlcədən məlumatlı olublar və indi özlərini bilməməzliyə vururlar”. Qeyd edək ki, AYSH sədri İ. Qasımov 2006-cı il dekabrın 28-də yerli vaxtla saat 14.00 radələrində Kişinyovdan Kiyevə gedərkən Moldovanın Dubossarı şəhəri yaxınlığında avtomobil qəzasına düşüb. Ciddi bədən xəsarəti ilə xəstəxanaya yerləşdirilən İ. Qasımov hazırda Moskvada reabilitasiya kursu keçir.

Heydər Babayev bahalaşmanı islahat adlandırır

2007-01-16T12:39:00.000+04:00

16.01.2007.Tarif Şurasın sədri, iqtisadi inkişaf naziri Heydər Babayev AzərTAc-a müsahibə verib. H.Babayev müsahibəsində bahalaşmanı islahat adlandırıb. "Tarif Şurasının son qərarları ölkədə aparılan iqtisadi islahatların, o cümlədən kommunal sektorda həyata keçirilən islahatların davamıdır." H.Babayev bhalaşmanın sifarişinin hansı qurumdan gəldiyinə də aydınlıq gətirib: "Nazirlər Kabinetinin respublikanın daxili bazarının neft məhsullarına artan tələbatının və satışından dövlət büdcəsinə daxilolmaların tənzimlənməsi ilə bağlı neft məhsullarının aksiz dərəcələrinin dəyişdirilməsi barədə qərarına və Dövlət Neft Şirkətinin təkliflərinə müvafiq olaraq, təhlil və hesablamalar aparılmış, daxili qiymətlərin dünya bazarı qiymətlərinə uyğunlaşdırılmasının zəruriliyi nəzərə alınaraq qərar qəbul olunmuşdur."
Nazir daha da irəli gedərək, bahalaşma nəticəsində əhalidən qoparılcaq 200 milyon manat vəsaitin "ARDNŞ-in maliyyə fəaliyyətinin sağlamlaşdırılması"na xidmət edəcəyini vurğulayıb.

Bizə yazırlar

2007-01-16T12:38:00.000+04:00

Oxucudan:

Ölmüş telekanallar

16.01.2007. Başqa vaxt olsaydı, “Lider”in və bu tip kanalların (AzTV, İTV, SPACE,) efirindən hakimiyyətin siyasətinə “sabun”lanan vətəndaşların ağız dolu tərifləri eşidilərdi. Amma bu dəfə olmadı. Nədənsə indi mən sabunlanan vətəndaşları görmürəm televizilayarda. Qiymət artandan sonra deyəsən mikrob ölən kimi ölüblər. Y da sabun da bahalaşıb. Hərəsi sakitcə çəkilib öz yuvasına və ordan da baş verənləri qoyun aptekə baxan kimi izləyirlər. Bəs nə oldu? Bağ belə-bostan belə deyən vətəndaşlar, hardasınız? Çıxın da efirə! Çıxın! Çıxın da! Onsuz da telekanallar qiymət artımını tərifləyən adamları axtarır. Doğurdan, mənə də maraqlıdır, görəsən hardadır “TORBA və TÜLKÜ”Gənclər hərəkatının gənc üzvləri? Hardadır hərbi bilet alıb Qarabağdan dəm vuran kişilərimiz ? Hardadır 15 şirvana ailə dolandırıb, səsini çıxartmayan ailə başçıları? Hardadır məktəbdə YAP-ın üzvü olan, fond pulu yığan “elm” adamları? Hardadır Hippokrat andı (indi H.Əliyev) içmiş, yekə cibli ağ xalatlar geyinən həkimlər? Hardadır təqaüdçülər?
Televiziyalar isə başımızı qatırlar. “Yeni ULDUZ”, “Qəfəs”, “Akademiya”, “De Gəlsin (Ver gəlsin)” və başqa verilişlər açmaqla, milləti yuxuya verirlər. İnanın, əgər görsələr ki, aha, millət ayağa qalxıb küçələrə, meydanlr axışır, onda televiziyalar vasitəsi ilə porno kinolar da verərlər ki, qoy millət evdə oturub, baxaraq kef eləsin. Təki sakitçilik olsun!
Təki “sabitlik” olsun!

Deyin, qiymətləri endirəcəklər...

2007-01-16T10:22:00.000+04:00

Deyin, qiymətləri endirəcəklər,
Birtəhər başını yozun xalqımın.
Yanan bazarları söndürəcəklər –
Söyləyin, söndürün közün xalqımın.

Söyün BMF-i, DB-ni söyün,
Çevirib arada rəhbəri öyün.
Deyin, o, Qordi tək kəsəcək düyün,
Doldurun kül ilə gözün xalqımın.

«Xəbəri yox imiş» - boyat bayatı,
Verin cəsarətlə bu bəyanatı.
Deyin, dəyişəcək xalqın həyatı,
Hələlik nazına dözün xalqımın.

Əmr edin, TV-lər versin əyləncə,
Aktual söhbətlər qoyulsun dincə.
Rəqiblər millətə xitab edincə,
Kontr-planını pozun xalqımın.

İşdir destruktiv olsa camaat,
Basın polisləri önə o saat.
Zakir Həsənovun itləri rahat
Didib-dağıdacaq dizin xalqımın.

Bitsin ajiotaj, tezcə sovuşsun,
Hamı sakit olsun, sülhə qovuşsun.
Yeni məzənnəyə tamam yovuşsun,
Sonra məzarını qazın xalqımın

İLHAM ƏLİYEV BU GÜN ÖLKƏYƏ QAYIDIR

2007-01-16T10:06:00.000+04:00

Onun verəcəyi açıqlamalara diqqət böyükdür

16.01.2007.Bu gun dövlət başçısı İlham Əliyev ölkəyə qayıdır. Bu barədə qəzetimizə hakimiyyətə yaxın mənbələrdən məlumat verilib. Xatırladaq ki, İ.Əliyev yeni ilin ilk günlərindən ənənəvi «qısa müddətli məzuniyyət»ə gedib. Ancaq onun istirahət məqsədi ilə hansı ölkəyə getdiyi rəsmən açıqlanmayıb.

Onu da qeyd edək ki, prezidentin iş başında olmadığı iki həftədə ölkədə olduqca önəmli hadisələr baş verib, proseslər başlayıb. Ayrıca Tarif Şurasının qərarı ilə aparılan bahalaşma ölkədə ajiotaj yaradıb. Ona görə də İlham Əliyevin bu gün, yaxud sabah media qarşısına çıxıb hansı açıqlama verəcəyini bütün xalq səbirsizliklə gözləyir.

Hər kəsə salamlar!

2007-01-15T23:03:00.000+04:00

Ramin Hacılı

15.01.2007. Düşünürəm ki, bu gün biz gənclər (yaltaq olmayan siyasiləşməmiş, yeni düşüncəli) qalib gəldik! Birinci, Bəxtiyar Hacıyevi hüquqi dövlətdə əgər tutublarsa, hansısa hərəkatın xahişi və ya dövlət məmurunun tapşırığı ilə azad etməməli idilər. Deməli, biz düz deyirik: hüquqi dövlətdə yaşamırıq! İkinci, gəlin razılaşaq ki, əgər belə olubsa, onda kim məsuliyyət daşıyır? Qeyri-qanuni həbsə görə maddi və mənəvi ziyana görə kim cəzalandırıldı və bu kompensasiyanı kim ödəyəcək? Üçüncü, 16 yanvar saat 14.00-da bizim Beynəlxalq Mətbuat Mərkəzində keçirmək istədiyimiz mətbuat konfransının baş tutmasına kim imkan vermədi? Bəlkə biz Müsavatdan, AXCP-dən daha radikal, daha qorxulu qüvvəyik? Xahiş edirəm, mən həbs olunanda hər kəs özünü reklam, yəni məni müdafiə etsin. Əgər nazirlik məni azad edəcəksə, mən indidən bununla razılaşmayacağımı bildirirəm. Biz sifarişli azadlıqlar uğrunda mübarizə aparmırıq! Hansı məntiqə sığır ki, mənim Bəxtiyar Hacıyevi qandaldan xilas etməyə çalışmağım sevimli dostları qıcıqlandırsın? Əgər biz eyni dəyərlərin mübarizəsini aparırıqsa, konkret Bəxtiyarın azadlığı uğrunda çalışırıqsa, məntiqlə fikirlərimiz də üst-üstə düşməliydi. Yoxsa buna başqa don geyindirməyin mənası nədir? Sonda qeyd edim ki, heç bir yerdə «İrəli» Hərəkatını və onun üzvlərini özümə düşmən hesab edib, hansısa işlərini qaralamağa çalışmamışam. Bu günə qədər heç bir Dalğaçı, nə də indi mənim çalışdığım DİP Gənclər Təşkilatının üzvü belə bir cəhddə bulunmayıb. Amma əvəzində hər fürsətdə bizə qarşı kompleks hücumların şahidi olmuşuq. Axı niyə biz gənclər hansısa kaftar sürüsünün sifarişi ilə bir-birimizə çamur atmalıyıq? Sayğılarla, Ramin Hacılı Bəxtiyar Hacıyevin Hüquqlarının daimi müdafiəçisi (Fərhad Hacıyevin qulağından iraq!)

Bizim Məzəli İrəli

2007-01-15T23:00:00.000+04:00

AKSİYAner-admin

15.01.2007.Bəxtiyar Hacıyevin həbsi və müstəqil gənclərin dərhal bu məsələyə kəskin təpgisi, toparlanaraq bir araya gələ bilməsi hakimiyyət üçün kifayyət qədər gözlənilməz oldu. Elə Bəxtiyar bəyin həbsdə olduğu üç gün ərzində YAP-ın sevimli uşaqları- İrəli Gənclər Təşkilatının tutduğu mövqe də dediklərimizin doğruluğunu bir daha sübuta yetirdi. Onlar dərhal bu birliyi pozmaq üçün dəridən-qabıqdan çıxmağa başladılar. Guya kimlərisə hadisəni siyasiləşdirməkdə, guya kimlərisə bu hadisədən xal yığmaqda ittiham etməyə qalxdılar. Daha sonra Gənclər və İdman Nazirliyi əməkdaşlarının da eyni bəyanatla çıxış etməsi, daha sonra Müdafiə Komitəsinin keçirmək istədiyi mətbuat konfransına BMM-də yer verməkdən imtina edilməsi hadisələrin bir mətbəxdən idarə olunduğunu sübuta yetirdi. Necə deyərlər, İrəli həmişə olduğu kimi yenə öz sözünü demirdi. Sabah bütün qəzetlərin və beynəlxalq təşkilatların məsələyə reaksiya verəcəyini çox yaxçı başa düşən hakimiyyət nəhayət Bəxtiyar bəyi azadlığa buraxmaq qərarına gəldi. Bəxtiyar bəyin həbsxanadan birbaşa Gənclər və İdman Nazirliyinə yollanması (bəlkə də aparılması) da bizimçün qaranlıq məslədir. Ola bilsin ki sabah buna da aydınlıq gələcək. Ola bilsin ki, sabah Bəxtiyar bəy hətta səhf etdiyini də deyəcək (amma bu, o qədər inandırıcı görünmür, daha doğrusu, bütün romantiklər kimi biz də hər şeyin yaxşı olacağına inanırıq). Amma bu, nə mübarizəmizin mahiyyətini dəyişir, nə də yazımızın mövzusu deyil. İndilikdə İrəlinin bir saat öncə tələm-tələsik yazıb-yaydığı bəyanata münasibət bildirmək istəyirik. Öncə bəyanatın bəzi məqamları ilə sizi tanış edək: "Yaxshi olardi ki, gelecekde bash vere bilecek bu cur anlashilmaz hadiselere qarshi temkin ve sebir numayish etdirek. Hem de soyuqanli olmagimiz istenilen meselenin qisa muddet erzinde helline munbit sherait yatamish olur. Amma cox tessufle onu da qeyd etmek lazimdir ki, bezi insanlar Baxtiyarin hebsinden yararlanaraq hesablarina novbeti xallari yazmaq istediler... Baxtiyarin saxlanilmasi bezi insanlarin hem de esl sifetini uze cixartdi. Teki Azerbaycanin imicine ziyan olsun devizini elde rehber tutaraq ve vetendash dushuncesinden uzaq olaraq, normal insanin atmadigi addimi atdilar..." Göründüyü kimi, İrəli həmişəki ampulasındadır. Qırmızı-qırmızı adamın üzünə dururlar. Belə çıxır ki, Bəxtiyarı hakimiyyət yox, onu müdafiə edən gənclər həbs edibmiş. Belə çıxır ki, "əsl vətəndaş mövqeyi" bahalaşmaya etiraz etmək yox, buna etiraz edən Bəxtiyarın həbsini "anlaşılmazlıq" adlandırmaq imiş. Kim idi məsələni siyasiləşdirən? Sosial durumun ağırlaşdırılmasına dinc və sivil yolla- heş bir siyasi tələb irəli sürmədən etriaz edən bizlər və Bəxtiyar, yoxsa, onu həbs edən hakimiyyət? Əgər doğrudan da, bu addım "anlaşılmazlıq" idisə, onda öz işini bilməyən, anlamayan məmurlara niyə etiraz etmir İrəli Hərakatı? Ümumiyyətlə, bu hərakat nəyəsə YOX deməyi bacarıbmı? Ümumiyyətlə, indiyə qədər nəyəsə etiraz edibmlərmi? Adını İRƏLİ qoyub, amma "Bir addım İRƏLİ, iki addım GERİ" prinsipinə sadiq qalan YAP-ın sevimli balaları qoy gəncliyin adından danışmasın. Azərbaycan adına həm Azərbaycanda, həm də beynəlxalq arenada yaxşı işlər görən də elə bizim kimi gənclərdir, həftə səkkiz mən doqquz, işi-gücü Fəxri Xiyabanda məlum yerə əklil qoymaqdan ibarət olan İRƏLİ yox! Nə isə... Onsuz da hər kəsin adı alnına yazılıb- taleh möhürü kimi...

Bəxtiyar Hacıyev azadlıqda!!!

2007-01-15T22:53:00.000+04:00

15.01.2007. Bu gün təqribən saat 19 radələrində Bəxtiyar Hacıyev azadlığa buraxılıb. Deməli müqavimət öz bəhrəsini verdi. Hamını təbrik edirik!

«Mediaforum» niyə bağlanmışdı?

2007-01-15T22:33:00.000+04:00

15.01.2007. Bu gün günün ikinci yarısından başlayaraq, «Mediaforum» saytına giriş bağlanıb. Yalnız axşam saatlarında - gecə saat 22.30-da mütəxəssislərin müdaxiləsindən sonra saytın fəaliyyətini yenidən bərpa etmək mümkün olub. «Mediaforum»un təsisçisi Azər Qaraçənli «Aksiya»ya açıqlamasında saytın qeyri-aktiv olmasını texniki səbəblərlə izah edib. Onun sözlərinə görə, bir neçə gün öncə «Mediaforum»un e-mail ünvanı da bağlanıb. Azər bəyin saytın bağlanmasını texniki səbəblərlə əlaqələndirsə də, son günlər ölkədə müstəqil saytların fəaliyyətinin davamlı olaraq qapadılması və Azərbaycanın İnternet məkanının hakimiyyət tərəfindən nəzarətə götürülməsi cəhdlərinin fonunda bu, kifayət qədər müəmmalı görünür.

Qeyd edək ki, ötən il «Mediaforum» saytı naməlum xakerlər tərəfindən dağıdılıb və nəticədə saytın həmin vaxta qədərki arxivini bərpa etmək mümkün olmayıb.

ADP «Azadlıq» blokundan çıxarılacaq

2007-01-15T20:41:00.000+04:00

15.01.2007. Gələn həftənin əvvəllərində Azərbaycan Demokrat Partiyası (ADP) «Azadlıq» blokundan çıxarılacaq. Bu barədə qərar bazar ertəsi «Azadlıq» blokunun Sədrlər Şurasının toplantısında verilə bilər. Əldə etdiyimiz məlumata görə, sözügedən qərarın çıxarılmasını Azərbaycan Vətəndaş və İnkişaf, Azərbaycan Liberal və Azərbaycan Xalq Cəbhəsi partiyalarının sədrləri dəstəkləyəcəklər. Belə bir qərarın çıxarılması isə son vaxtlar ADP-nin hakimiyyətlə yaxınlaşması, eləcə də bu partiyanın bəzi funksionerlərinin-Yaqub Abbasov, Akif Şahbazov və s. «Azadlıq» bloku və AXCP sədri Əli Kərimli barədə səsləndirdiyi sərt tənqidlərlə əsaslandırılacaq.

AKSIYA

“Sərhədsiz reportyorlar” Rafiq Tağının işi üzrə ədalətli qərar verməyə çağırıb

2007-01-15T20:40:00.000+04:00

15.01.2007. PARİS. “Sərhədsiz reportyorlar” təşkilatı Azərbaycan məhkəmə orqanlarını “Sənət” qəzetinin baş redaktoru Samir Sədaqətoğlu və yazar Rafiq Tağının işi üzrə ədalətli qərar verməyə çağırıb. APA-nın məlumatına görə, təşkilat bu işlə bağlı məhkəmənin gecikməsindən narahat olduğunu bəyan edib: “Biz məsələnin ciddiliyini və oxucuların hisslərinə toxunulduğunu anlayırıq. Bununla belə, Nəsimi rayon Məhkəməsinin hakimi Gülnarə Tağızadəni düzgün qərar qəbul etməyə çağırırıq”. Qeyd edək ki, S. Sədaqətoğlu və R.Tağının həbs müddəti daha 2 ay uzadılıb.

MAU tələbələrinin iddiası üzrə məhkəmə prosesi yenə təxirə salınıb

2007-01-15T20:38:00.000+04:00

15.01.2006. BAKI. Müstəqil Azərbaycan Universitetinin (MAU) tələbələrinin iddiası üzrə Binəqədi Rayon Məhkəməsində bu günə təyin olunmuş iclas təxirə salınıb. Bu barədə APA-ya məlumatı MAU-nun keçmiş tələbəsi Elnur Məmmədov məlumat verib. Onun sözlərinə görə, məhkəmə tələbələrin iddiası üzrə qəbul etdiyi qətnaməni bu gün elan etməli idi: “Amma məlum olmayan səbəblərə görə iclas başlanmadan təxirə salındı”. Növbəti iclas yanvarın 18-nə təyin olunub. Xatırladaq ki, MAU-ya 2004-cü ildə qəbul olmuş 125 tələbə digər ali məktəblərə köçürülmələri ilə bağlı məhkəməyə müraciət ediblər. İddia üzrə bu vaxta qədər bir neçə məhkəmə iclası keçirilib.

Hakim Bəxtiyar Hacıyevin həbsinə aydınlıq gətirdi

2007-01-15T19:41:00.000+04:00

15.01.2007.www.susmayaq.biz saytının təsisçilərindən biri Bəxtiyar Hacıyev İnzibati Xətalar Məcəlləsinin 310-cu maddəsi: polisə tabe olmamağa görə, həbs olunub. Bu barədə həmin prosesə sədrlik edən Nərimanov Rayon Məhkəməsinin hakimi Mehparə Əhmədova məlumat verib. Hakim Bəxtiyar Hacıyevin polisə nə üçün tabe olmadığı barədə informasiya verməyib. Xanım Əhmədova yalnız məsələni siyasiləşdirməyə ehtiyac olmadığını deyib.

Ancaq, Bəxtiyar Hacıyevin müdafiə komitəsinin sədri Ramin Hacılı iddia edir ki, həbs məhz www.susmayaq.biz saytına görədir: «Sayt bağlanandan sonra Bəxtiyar ona zənglər olunduğunu və hətta həbslə hədələndiyini deyirdi».

Bəxtiyar Hacıyev yanvarın 13-ü axşam saatlarında həbs olunub. Ertəsi gün – yanvarın 14-də isə o, Nərimanov Rayon Məhkəməsinin qərarı ilə 12 sutka həbs cəzasına məhkum edilib.

www.susmayaq.biz saytı Tarif Şurasının Azərbaycanda enerjidaşıyıcıların qiymətlərinin qaldırılması barədə yanvarın 8-də verdiyi qərara etiraz olaraq imzatoplama kampaniyasına başlamışdı. Amma, bir gün sonra – yanvarın 9-da Hollandiyadan idarə olunan bu sayta Azərbaycandan giriş bağlandı.

Bəxtiyar Hacıyev bu kampaniyadan əvvəl də «Təhsildə Rüşvətə «YOX» deyək» hərəkatının təşkilatçısı kimi etiraz piketlərində həbs olunmuşdu. O, həm də AİESEC-in – İqtisadi və İdarəetmə Fakültələri Beynəlxalq Birliyinin Azərbaycan nümayəndəliyinin sədridir.

Bəxtiyar Haciyevin Müdafiə Komitəsinin Pres-relizi

2007-01-15T13:03:00.000+04:00

15.01.2007. Yanvarın 6-da Tarif Şurasının enerjidaşıyıcılarının və kommunal-təsərrüfat xərclərinin qiymətlərinin qaldırılması ilə bağlı qərarına etiraz əlaməti olaraq yanvarın 8-də yaradılan www.susmayaq.biz saytı bir gün sonra Azərbaycan hakimiyyəti tərəfindən qanunsuz olaraq bağlandı. Sayt məlum qərarı etiraz əlaməti olaraq prezidentə müraciət etmək üçün imzatoplama kampaniyası həyta keçiriridi. Bundan əlavə saytda SMS və Siqnal kampaniyalarını həyata keçirmək təklif olunurdu. Belə ki, təklifə görə, şəhər sürücüləri günün müəyyən saatlarında qərara etiraz olaraq kütləvi sürətdə siqnal verməliydilər. SMS kampaniyası isə Siqnal kampaniyasını SMS-lə insanların bir-birinə yaymaq çağırışından və saytın reklamından ibarət idi.
Sayt cəmi bir gün ərzində böyük rezonans doğurdu. Bundan narahat olan hakimiyyət dairələri qanunsuz olaraq Azərbaycanda fəaliyyət göstərən internet provayderləri və Rabitə və İnformasiya Texnologiyaları Nazirliyinin əli ilə saytı yanvarın 9-da bağladı.
Daha sonra bir neçə gün ərzində saytın qurucusu Bəxtiyar Hacıyevə və ailəsinə mənəvi təzyiqlər edilməyə başladı.
Nəhayət yanvarın 13-də Nərimanov Rayon Polisi B.Haciyevi kirayə qaldığı evdən həbs edərək, polis bölməsinə aparıb.
Bütün gecəni B.Haciyevi polis bölməsində saxlayaraq, yanvarın 14-də (bazar günü) Nərimanov Rayon Məhkəməsinə aparılmış və orada tələsik məhkəmə iclası keçirərək, barəsində 12 sutkalıq həbs cəzası çıxarılıb.
B.Hacıyevin hansı səbəblər üzündən həbs edilməsi, məhkəmədə vəkillə təmin edilib-edilməməsi, habelə hal-hazırda harada saxlanması barədə heç bir məlumat verilmir. Dünən axşam saatlarında Bəxtıyar Hacıyevin Müdafiə Komitəsinin üzvləri Ramin Hacılı və Təbriz Cabbarov məlumat almaq üçün Nərimanov Rayon Polis İdarəsinə getsələr də, burada onlara qarşı çox kobud davranaraq, hər hansı məlumat verməkdən imtina ediblər.
Artıq müdafiə komitəsi həbslə bağlı beynəlxalq təşkilatları və Avropa Şurasını məlumatlandırıb.
Bu gün “Azadlıq” radiosunun əməkdaşı və hüquq müdafiəçilərinin iştirakı ilə müdafiə komitəsinin üzvləri Nərimanov Rayon Polis idarəsinə gedərək, məlumat almağa, həmçinin B.Hacıyevlə ğörüşməyə çalışacaqlar.
Müdafiə Komitəsi B.Haciyevə hansısa işgəncələr verilə biləcəyi ehtimalından narahatdır.
Sabah, yanvarın 16-da saat 14.00-da BMM-də Müdafiə Komitəsinin geniş mətbuat konfransı keçiriləcək. Hadisəylə bağlı gün ərzində yeni məlumatları aşağıdakı internet səhifəsindən - www.aksiya2007.blogspot.com – əldə etmək olar.

Müdafiə Komitəsi
Ramin Hacılı
əlaqə telefonu 050-512-86-38

Bəxtiyar Hacıyevin Müdafiə Komitəsi yaradıldı

2007-01-15T09:30:00.000+04:00

15.01.2007.Yanvarın 13-də həbs olunaraq, bir gün sonra Nərimanov Rayon Məhkəməsi tərəfindən barəsində 12 sutklıq həbs cəzası verilən Bəxtiyar Hacıyevin Müdafiə Komitəsi (MK)yaradıldı.
Müdafiə Komitəsinin sədri Ramin Hacılıdır (DİP Gənclər Təşkilatı). Emin Milli, Təbriz Cabbarov (AlumniNetWoork-un həmtəsisçiləri), Emin Hüseynov (Məqam Gənclər Hərakatının koordinatoru), Ülvi Həsənli (Dalğa Gənclər Hərkatının sədri), Abbas Atilay (Norveç), Həbib Müntəzir və Qurban Ələkbərov (Almaniya), Azər Əhmədov (ABŞ) və başqaları daxildir.
Artıq MK beynəlxalq təşkiltları həbslə bağlı məlumatlandırıb. Bu gün isə MK jurnalistlər və hüquq müdafiəçiləri ilə birlikdə B.Hacıyevin saxlandığı Nərimanov Rayon Polis İdarəsinə gedilərək, rəsmən B.Hacıyevin həbsinin səbəbləri barədə məlumat istəniləcək.
Sabah isə geniş mətbuat konfransı keçiriləcək.